¿Mi xuʼ skap sba ta politika li relijione?
Ep krixchanoetik tikʼilik ta politika akʼo mi chalik ti jaʼ tstsʼakliik li Jesukristoe. Oy jlome tskoltaik junantik kandidatoetik xchiʼuk partidoetik sventa spukbeik skʼoplal li srelijionike xchiʼuk li kʼusi chakʼik ta chanele. Sventa stijbeik yoʼonton li buchʼu oy srelijionike, li jpolitikoetike chalbeik skʼoplal mantaletik sventa talelal xchiʼuk li kʼusi tsvul˗o yoʼonton li krixchanoetike. Xchiʼuk oy junantik jbeiltasvanejetik ta relijione tskʼan ch˗ochik ta ajvalil, ta junantik lum xtoke yaloj mantal ajvalil ti jaʼ noʼox jun relijion lek ilbil ta sjunul lume.
¿Pe kʼusi chanop li voʼote? ¿Mi xuʼ van skap sbaik ta politika li yajtsʼaklomtak Kristoe? ¿Kʼusi la spas li Jesuse? Xi laj yale: «Laj xa kakʼ avilik, jech kʼuchaʼal la jpasboxuke, jaʼ jech skʼan xapasbe abaik ek» (Juan 13:15). Jkʼeltik batel kʼusi la spas Jesus ta sventa li politikae.
¿Mi la stikʼ sba ta politika li Jesuse?
Muʼyuk. Li Jesuse mi jsetʼuk la stikʼ sba li ta politikae.
Li Jesuse muʼyuk la saʼ yabtel ta politika. Li Diabloe laj yalbe ti chakʼbe li «mukʼtik lumetik ta balumile», pe li Jesuse la spʼaj ti xuʼ spas ta mantal li ajvaliletik ta balumile (Mateo 4:8-10). a Oy jun velta xtoke, li krixchanoetike laj yilik ti xuʼ xkʼot ta lekil ajvalil li Jesuse, jaʼ yuʼun laj yalbeik ti akʼo stikʼ sba ta politikae. Pe «kʼalal laj yakʼ venta Jesus ti chtal xa tsakatuk sventa xvaʼanat ta ajvalile, lokʼ batel, bat yan velta stuk li ta vitse» (Juan 6:15). Muʼyuk xakʼ sba ta sujel li Jesuse, yuʼun muʼyuk la stikʼ sba jutebuk li ta politikae.
Li Jesuse muʼyuk la stikʼ sba ta junuk partido. Kalbetik skʼoplal li judaetik ta skʼakʼalil Jesuse, yuʼun mu skʼan stojbeik patan li ajvaliletik ta Romae. Jech xtok, tsnopik ti muʼyuk xa smelolal ti kʼu yepal chkʼanbatike. Pe kʼalal tskʼanik ox ti akʼo stikʼ sba li Jesuse, li stuke muʼyuk la stikʼ sba. Jaʼ noʼox xi laj yale: «Tojbeik Sesar li kʼusitik jaʼ yuʼun Sesare, yan li kʼusitik jaʼ yuʼun Diose tojbeik Dios» (Markos 12:13-17). Muʼyuk la stikʼ sba li ta politikae, pe jamal laj yal ti skʼan stojbeik patan li ajvaliletik ta Romae, yuʼun jaʼ yaj˗abteltak li Sesare. Pe oy noʼox spajeb bu kʼalal chchʼunbeik smantal li ajvaliletike, yuʼun mu xuʼ stakʼ xakʼbeik ajvalil li kʼusi jaʼ noʼox yuʼun Diose ti jaʼ li yichʼel ta mukʼe (Mateo 4:10; 22:37, 38).
Li Jesuse laj yakʼ ta ojtikinel li Ajvalilal yuʼun Dios ti jaʼ jun ajvalil ta vinajele (Lukas 4:43). Li stuke muʼyuk la stikʼ sba ta politika, yuʼun snaʼoj ti mu spas yuʼun ajvaliletik li kʼusi tskʼan tspas Dios liʼ ta balumile. Taje jaʼ noʼox spas yuʼun li Ajvalilal yuʼun Diose (Mateo 6:10). Li Jesuse snaʼoj ti muʼyuk tstunesatik yuʼun Dios li Ajvaliletik li ta balumile, yuʼun jaʼ chkʼot ta xkʼexolik li Ajvalilal yuʼune (Daniel 2:44).
¿Mi la stikʼ sbaik ta politika li yajtsʼaklomtak Kristo ta baʼyel sigloe?
Muʼyuk. Li yajtsʼaklomtak Kristoe la xchʼunik li mantal ti mu stakʼ skap sbaik li ta balumile (Juan 15:19). La xchanbeik stalelal li Jesuse xchiʼuk muʼyuk la stikʼ sbaik li ta politikae (Juan 17:16; 18:36). Jaʼ mas laj yakʼ ta yoʼontonik spasel li kʼusi akʼbat sbainike ti xcholik mantale xchiʼuk ti xakʼik ta ojtikinel li Ajvalilal yuʼun Diose (Mateo 28:18-20; Echos 10:42).
Li yajtsʼaklomtak Kristo ta baʼyel sigloe jaʼ mas tsots skʼoplal laj yaʼiik ti xchʼunbeik smantal li Diose, pe snaʼojik ti skʼan stsakik ta venta li ajvaliletike (Echos 5:29; 1 Pedro 2:13, 17). Jaʼ yuʼun, chchʼunik li smantal ajvalile xchiʼuk tstoj spatanik (Romanos 13:1, 7). Melel onoʼox ti muʼyuk tstikʼ sbaik ta politikae, pe tstabeik sbalil junantik li mantaletik yakʼoj ajvaliletike xchiʼuk li kʼusitik tspasike (Echos 25:10, 11; Filipenses 1:7).
Muʼyuk tstikʼ sbaik ta politika li yajtsʼaklomtak Kristo avie
Li Vivliae jamal chal ti mi jaʼuk Jesus xchiʼuk li baʼyel yajtsʼaklomtake, muʼyuk la stikʼ sbaik ta politika. Li stestigotak Jeova ta spʼejel balumil ti jaʼ tstsʼakliik li Kristoe, muʼyuk tstikʼ sbaik jsetʼuk ta politika. Jech kʼuchaʼal li jchʼunolajeletik ta baʼyel sigloe jaʼ chakʼ ta yoʼontonik spasel li abtelal akʼbat sbainik yuʼun Jesuse, xcholel «li lekil aʼyejetik ta sventa li Ajvalilale» (Mateo 24:14).
a Kʼalal la spʼaj Jesus taje, muʼyuk laj yal ti maʼuk sventainoj ajvaliletik li Diabloe, yuʼun ta tsʼakale laj yal ti jaʼ «ajvalil ta balumile» (Juan 14:30).
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yuʼun muʼyuk tstikʼ sbaik ta politika li stestigotak Jeovae?
¿Mi chil-o svokol jlumalkutik ti muʼyuk ta jtikʼ jbakutik ta politikae?
¡CHAPALUKUTIK˗O!
Li kʼusi spasojik talel li relijionetik ta sventa li paskʼop ta Ucraniae | ¿Kʼusi chal li Vivliae?
Li jnitvanejetik ta relijion li ta lumetik ti tstsak sbaik ta kʼope oy kʼusitik spasojik yoʼ xlik mas kʼop. Taje mu jechuk yakʼoj ta chanel li Jesuse.
LI KʼUSI BAʼYEL SKʼAN JCHANTIK TA VIVLIAE
¿Kʼusi jaʼ li Ajvalilal yuʼun Diose?
Kʼalal la xchol mantal li Jesuse, jaʼ mas laj yalbe skʼoplal li Ajvalilal yuʼun Diose. Li krixchanoetike voʼne xa lik skʼanik ti xtal li ajvalilal taje.
LI JKʼEL˗OSIL TA TOYOLE
¿Kʼusi tspas ta jtojolaltik li Ajvalilal yuʼun Diose?
Li Jesuse snaʼoj xa onoʼox ti jaʼ noʼox li Ajvalilal yuʼun Dios xuʼ xakʼbe slajeb li vokoliletik oy ta balumile. ¿Kʼusi xa spasoj li Ajvalil taje sventa jpat koʼontontik ta stojolale?
