¡CHAPALUKUTIK-O!
¿Mi tstsobutik ta melel li tajimol ta mundiale? | ¿Kʼusi chal li Vivliae?
Malabil ti tskʼelik voʼmil miyon krixchanoetik li Copa Mundial yuʼun FIFA. Ti lik ta 20 yuʼun noviembre kʼalal ta 18 yuʼun disiembre ta 2022. Ep buchʼutik tsnopik ti kʼalal ch-echʼ tajimoletik kʼuchaʼal taje, tstsob la yuʼun li krixchanoetike.
«Li tajimole xuʼ xjelbe yuʼun xkuxlejal li krixchanoetike, yuʼun tstijbe yoʼonton ti oyuk kʼusi spasike xchiʼuk jaʼ noʼox stuk ti xuʼ yuʼun tstsobvane» (Nelson Mandela pasaro presidente ta Sudáfrica).
«Li futbole […] tstsobvan, jmoj xijmuyubaj yuʼun, ta jkʼantik-o li yantike xchiʼuk muʼyuk chijtʼujvan, mu ventauk bu jlumaltik» (Gianni Infantino, presidente yuʼun FIFA). a
Li futbol o li yan tajimoletike, ¿mi xuʼ van yuʼun stsobutik ta melel, xijmuyubaj xchiʼuk ti xijkʼanvan-o yuʼune? ¿Mi xuʼ van jun xa koʼontontik xchiʼuk ti jmoj xa tsobolutik ta jelavele?
¿Mi ta melel tstsobvan?
Li mundial li jabil liʼe, maʼuk noʼox tajimol, yuʼun tslikes kʼop ta sventa li sderecho krixchanoetike xchiʼuk tstijbe yoʼonton krixchanoetik sventa stʼuj sbaik ta skoj slumalik o ta skoj chʼabal lek stakʼinik li yantike. Akʼo mi jech, ep buchʼutik tsnopik ti xmuyubaj yuʼun krixchanoetik li tajimoletik ta futbol ta spʼejel balumile.
Akʼo mi oy ta yoʼonton krixchanoetik ti stsobvan li tajimoletik taje, xuʼ van spas yuʼun, pe jlikel noʼox. Jaʼ noʼox tstijbe yoʼonton krixchanoetik ti oyuk chʼakbaile. Li Vivliae jech xa onoʼox yaloj ti jech stalelal li krixchanoetike, ti jaʼ svinajeb ti ‹ta slajebal xa kʼakʼal› kuxulutike (2 Timoteo 3:1-5).
Li kʼusi xuʼ stsobutik ta melele
Li Vivliae tspat koʼontontik, yuʼun te chal kʼuxi xuʼ tsobolutik ta spʼejel balumil. Chal xtok ti ta jelavele jmoj xa tsobol skotol li krixchanoetik ta spʼejel balumile, yuʼun jaʼ xa chventainatik yuʼun li «Ajvalilal yuʼun Diose» (Lukas 4:43; Mateo 6:10).
Li ta Ajvalilal yuʼun Diose jaʼ ch-ajvalilaj li Jesukristoe xchiʼuk jaʼ oy ta sba sventa oyuk jun oʼontonal ta spʼejel balumil. Xi chal li Vivliae:
«Xnichinajik noʼox li buchʼutik tukʼike, ta x˗epaj li jun oʼontonale» (Salmo 72:7).
«Tspoj li povreetik ti x˗avet tskʼanik koltaele [...]. Chpojatik kʼalal chichʼik ilbajinele xchiʼuk kʼalal tstsakatik ta kʼope» (Salmo 72:12, 14).
Li avie, skʼanoj sbaik ta smiyonal xa noʼox krixchanoetik ta skoj li kʼusi laj yakʼ ta chanel Jesuse. Li krixchanoetike likemik ta 239 jeltos lumetik xchiʼuk bikʼtal lumetik, la xchanik ti muʼyuk lek li pʼajbaile. Mi chakʼan chanabe mas skʼoplale, kʼelo li mantal: «Jlokʼes ta koʼontontik li pʼajbaile».
a Li Federación Internacional de Fútbol Asociación jaʼ sbainoj skʼelel li futbol ta spʼejel balumile.