Li ta 2024, ta spʼejel balumil chichʼ pasel ep votasion ti muʼyuk bu xkiltik-o jech ta jun jabile. Akʼo mi jech, epal krixchanoetike muʼyuk xa spatoj yoʼontonik ta stojolal li jpolitikoetike.

•    Kʼalal laj yichʼ jakʼbel sloʼilik jlom krixchanoetik li ta Estados Unidose, jutuk mu skotoluk laj yalik ti «jech tspasik li jpolitikoetik ta skoj ti jaʼ noʼox tsaʼ li kʼusi tskʼan yoʼonton stukike», maʼuk ta skoj ti tskʼan chtunik ta stojolal li krixchanoetike (Pew Research Center, 19 yuʼun septiembre ta 2023). a

 Epal kerem tsebetike muʼyuk xa tspat yoʼontonik ek ta stojolal li jpolitikoetike.

•    «Ep kerem tsebetik tskʼan chchapanik li kʼusitik chopol oy ta balumile, pe kʼalal laj yichʼ jakʼbel sloʼilike, jamal laj yalik ti muʼyuk bu chkoltaatik yuʼun li jpolitikoetike» (The New York Times, 29 yuʼun enero ta 2024).

•    «Jun velta kʼalal laj yichʼ jakʼbel sloʼil li kerem tsebetike, laj yalik ti jaʼ mas spatoj yoʼontonik ta stojolal li jyoutuberetike, ti maʼuk ta stojolal li jpolitikoetike» (The Korea Times, 22 yuʼun enero ta 2024).

 Vaʼun chaʼa, ¿mi mas to van chlekub yuʼun jkuxlejaltik ta jelavel li jpolitikoetike? ¿Buchʼu ta stojolal xuʼ jpat koʼontontik?

 Skʼan jkʼeltik lek li buchʼu ta jpat koʼontontik ta stojolale. Yuʼun xi chal li Vivliae: «Li buchʼu muʼyuk spʼijile chchʼun skotol li kʼusi ch-albate, yan li buchʼu pʼije tsnop lek li kʼusi tspase» (Proverbios 14:15).

•    Mi chakʼan chachanbe skʼoplal kʼuxi xuʼ xanaʼ bu li jecheʼ aʼyejetike xchiʼuk bu ti melele, kʼelo li mantal ti xi sbie: «¿Kʼuxi xuʼ jchabi jbatik li ta jecheʼ aʼyejetike?».

 Jech xtok, oy jpolitikoetik ti lek li kʼusi oy ta yoʼontonike, pe oy noʼox spajeb li kʼusi spas yuʼunike. Jaʼ yuʼun, xi chalbutik li Vivliae:

•    «Mu xapat avoʼntonic yuʼun li banquilaletique, yuʼun cristianoetic noʼox; mu xuʼ yuʼun chcoltavanic» (Salmos 146:3, Xchʼul cʼop Jtotic Dios ta skʼop Chenalhó).

 Li Vivliae chalbe skʼoplal ti oy jun bankilal vaʼanbil yuʼun Diose, mas xtojob xchiʼuk xuʼ jpat koʼontontik ta stojolal, jaʼ li Jesukristoe (Lukas 1:32, 33). Li Jesuse jaʼ li Ajvalil li ta Ajvalilal yuʼun Diose, jaʼ jun ajvalil ti te oy ta vinajele (Mateo 6:10).

•    Kʼelavil kʼu yuʼun xuʼ xapat avoʼonton ta stojolal li Jesuse xchiʼuk li kʼusi tspas ta jelavel sventa xchapan li vokoliletik ta jnuptantike. Kʼelo li mantaletik ti xi sbie: «¿Buchʼu stʼujoj Dios sventa x-och ta Ajvalile?» xchiʼuk «¿Kʼusi tspas ta jtojolaltik li Ajvalilal yuʼun Diose?».