¿Mi oy kʼusi lek chtal chavil ta jelavel? Akʼo mi ep vokoliletik ta jnuptantik li avie, ep krixchanoetik smalaojik ti lek kʼusi chtal ta jelavele. Pe ¿mi ta melel oy kʼusi lek chtal? Oy. Li Vivliae chal ti oy kʼusitik kʼupil sba chtale.

•  ¿Kʼusi chal ta jamal li Vivliae?

•  ¿Mi xuʼ jchʼuntik ta melel li kʼusi chal Vivliae?

•  ¿Kʼuxi chkʼot ta pasel li kʼusi jamal yaloj Vivliae?

•  ¿Kʼusi ora chkʼot ta pasel li kʼusi jamal yaloj Vivliae?

•  ¿Kʼuxi xuʼ skoltaot avi li kʼusi chal Vivliae?

 Li Vivliae jamal ta xal ti ep chkil jvokoltik li avie, pe jamal ta xal xtok ti mu teuk-o sbatel osil li vokoliletike. Kalbetik junchibuk skʼelobil.

•   Li kʼusi vokole: ti chʼabal bu lek xuʼ xijnakie

   Li kʼusi chal Vivliae: «Ta xlik svaʼan snaik sventa te chnakiik» (Isaias 65:21).

   Li kʼusi chkʼot ta pasele: Oy xa sna skotol li krixchanoetike.

•   Li kʼusi vokole: oy povreal xchiʼuk chʼabal abtelal

   Li kʼusi chal Vivliae: «Ta skʼupinik lek yabtel skʼobik li buchʼutik jtʼujoje» (Isaias 65:22).

   Li kʼusi chkʼot ta pasele: Ch-ayan yabtel skotol li krixchanoetike, tskʼupinik xchiʼuk tstabeik sbalil.

•   Li kʼusi vokole: chʼabal tukʼilal

   Li kʼusi chal Vivliae: «Bankilaletik ti tukʼ ta xventainvanike» (Isaias 32:1).

   Li kʼusi chkʼot ta pasele: Muʼyuk xa bu chtʼujvan li krixchanoetik ta skoj li jlumaltike o ta skoj ti kʼu yepal oy jtakʼintike. Parejo xa kʼusi tspasik ta jtojolaltik.

•   Li kʼusi vokole: oy viʼnal

   Li kʼusi chal Vivliae: «Ch-ayan ep kʼusitik stakʼ lajesel li ta balumile, li ta joljolvitse solel busul ti kʼusi stakʼ lajesele» (Salmo 72:16).

   Li kʼusi chkʼot ta pasele: Ch-ayan epal lekil veʼlil, chʼabal xa buchʼu xmichʼet xchʼut chvay mi jaʼuk buchʼu chcham ta viʼnal.

•   Li kʼusi vokole: oy j-elekʼetik xchiʼuk choplejal

   Li kʼusi chal Vivliae: «Ta jujuntal te chchoti ta yolon steʼel s-uvaik xchiʼuk ta yolon steʼel s-igoik, muʼyuk buchʼu tsibtasatik» (Mikeas 4:4).

   Li kʼusi chkʼot ta pasele: Jun xa noʼox yoʼonton skotol li krixchanoetike, yuʼun chʼabal xa buchʼu chopol xchiʼuk jaʼ chuʼuninik balumil li buchʼutik tukʼike (Salmo 37:10, 29).

•   Li kʼusi vokole: oy paskʼop

   Li kʼusi chal Vivliae: «Muʼyuk xa tstsak sbaik ta kʼop li mukʼtik lumetike xchiʼuk mi jaʼuk xa chchanik paskʼop» (Isaias 2:4).

   Li kʼusi chkʼot ta pasele: Oy xa jun oʼontonal ta spʼejel balumil (Salmo 72:7). Chʼabal xa buchʼu chil svokol, chʼabal xa buchʼu chjatav lokʼel ta slumal xchiʼuk chʼabal xa buchʼu ch-okʼ ta skoj ti oy buchʼu chcham yuʼunik ta paskʼope.

•   Li kʼusi vokole: oy chameletik

   Li kʼusi chal Vivliae: «Mi junuk jnaklej ta balumil xi chale: ‹Toj ipun›» (Isaias 33:24).

   Li kʼusi chkʼot ta pasele: Chʼabal xa buchʼu ip ta x-ayan xchiʼuk muʼyuk xa buchʼu ta x-ipaj (Isaias 35:5, 6). Jech xtok, li Vivliae chal ti muʼyuk xa lajelale (Apokalipsis 21:4).

•   Li kʼusi vokole: li kʼusi tsokes osil balumile

   Li kʼusi chal Vivliae: «Li takixokol balumile xchiʼuk li takin balumile ta xmuyubajik, li stenlejaltik ti takin tajeke xkuxet noʼox yoʼonton likel xchiʼuk chnichin kʼuchaʼal li asafran nichime» (Isaias 35:1).

   Li kʼusi chkʼot ta pasele: Ta xkʼataj ta nichimaltik li spʼejel balumil ti bu xuʼ xnaki li krixchanoetike, jech kʼuchaʼal oy onoʼox ta yoʼonton Dios ta slikebale (Jenesis 2:15; Isaias 45:18).

 Stalel ti jech chkʼot ta nopel kuʼuntike. Pe ¿kʼuchaʼal mu jkʼeltik kʼusi chal ta Vivlia li kʼusi chtal ta jelavele? Li kʼusi jamal yaloj chal Vivliae, mu xkoʼolaj xchiʼuk li kʼusi chal chkʼot pasel krixchanoetike, yuʼun li Vivliae likem talel ta stojolal Dios. Jech oxal, mu xkoʼolaj xchiʼuk li kʼusi chal krixchanoetike. Jkʼeltik batel chaʼtos srasonal:

•   Xuʼ jpat koʼontontik ta stojolal Dios. Li Vivliae chal ti mu snaʼ sjut kʼop li Diose (Tito 1:2). Jech xtok, jaʼ noʼox xuʼ xal kʼusi chtal ta jelavel (Isaias 46:10). Li ta Vivliae oy ep skʼelobiltak ti chakʼ ta ilel ti persa chkʼot ta pasel li kʼusi chal Diose. Mi chakʼan to chanabe mas smelolale, kʼelo li video ¿Kʼu yuʼun xuʼ jchʼuntik ti melel kʼusi chal li Vivliae?

•   Jaʼ noʼox xuʼ xchapan jvokoltik li Diose. Li Vivliae ta xal ti oy sjuʼel sventa spas «skotol li kʼusi tskʼan [tspase]» (Salmo 135:5, 6). Jaʼ xkaltik, ti muʼyuk kʼusi xuʼ xmakun-o sventa xkʼot ta pasel li kʼusi yaloj tspase. Tskʼan tskoltautik, yuʼun skʼanojutik (Juan 3:16).

 Xuʼ van xi chajakʼbe abae: «Mi tskʼan tskoltautik Dios xchiʼuk ti xuʼ yuʼun spasele, ¿kʼu yuʼun ti ep to vokoliletik ta jnuptantik avie?». Mi chakʼan to chanabe smelolale, kʼelo li video ¿Kʼu yuʼun yakʼoj to oyuk vokolil li Diose?

 Li Diose tstunes li Ajvalilal sventa xkʼot ta pasel skotol li kʼusi yaloje, li ajvalile tey ta vinajel. Jaʼ la vaʼan Jesus sventa x-ajvalilaj li ta Ajvalilale xchiʼuk jaʼ akʼbil ta sba sventa skʼel li balumile xchiʼuk li buchʼutik te nakajtike. Kʼalal ay ta balumil li Jesuse, la xpoxta jchameletik, laj yakʼbe sveʼel li buchʼutik chviʼnajike, la spajes tsatsal ikʼ xchiʼuk oy buchʼutik la xchaʼkuxesan (Markos 4:39; 6:41-44; Lukas 4:40; Juan 11:43, 44).Taje jaʼ noʼox jun skʼelobil li kʼusi tspas ta jelavel li ajvalil li ta Ajvalilal yuʼun Diose.

 Mi chakʼan to chanaʼ kʼusi tspas ta atojolal li Ajvalilal yuʼun Diose, kʼelo li video ¿Kʼusi jaʼ li Ajvalilal yuʼun Diose?

 Jutuk xa skʼan. ¿Kʼu yuʼun ti jech jchʼunojtike? Li Vivliae yaloj xa onoʼox ti oy kʼusitik chkʼotanuk ta pasel kʼalal jutuk xa ox skʼan sventain tal balumil li Ajvalilal yuʼun Diose (Lukas 21:10, 11). Jkotol kilojtik ti yakal xa chkʼot ta pasel li kʼusi yaloj xa onoʼox li Vivliae.

 Mi chakʼan to chanabe mas yaʼyejale, kʼelo li xchanobil liʼe «¿Bakʼin chlik spas mantal liʼ ta balumile?».

 Jun jtsʼibajom ta Vivliae laj yal ti li spatobil koʼontontik chakʼ Vivliae, xkoʼolaj kʼuchaʼal «s-anklail jkuxlejaltik» (Ebreos 6:19). Jech kʼu chaʼal li s-anklail jkot varkoe chkuch yuʼun kʼalal oy tsatsal ikʼal voʼe, ti jpatoj koʼontontik ti oy kʼusitik kʼupil sba chtal eke jaʼ tskoltautik sventa tsal kuʼuntik li kʼusi ta jnuptan ta jkuxlejaltike, jech xtok tskoltautik sventa lekuk noʼox kʼusi ta jnoptik, kʼu yelan chkaʼi jbatik xchiʼuk mu masuk xij-ipajutik (1 Tesalonisenses 5:8).