¡CHAPALUKUTIK˗O!
Vokol ta tael veʼlil ta skoj paskʼop xchiʼuk ti chjel sikil xkʼixnal balumile | ¿Kʼusi chal li Vivliae?
Ta skoj li paskʼop ta Ucrania xchiʼuk ti chjel li sikil xkʼixnal balumile, mas xa vokol ta tael li jveʼeltike, mas to jech chkʼot ta stojolalik li buchʼutik nakalik ta lumetik ti abol noʼox sbaike, yuʼun vokol tajek chaʼiik stael sveʼelik jujun kʼakʼal.
«Mas xa vokol xchʼi li kʼusitik stakʼ jlajestike xchiʼuk vokol ta tael ta skoj li paskʼopetik, ti chjel li sikil xkʼixnal balumile, ti xtoy li luse xchiʼuk ta skoj yan kʼusitik» (António Guterres, secretario general yuʼun Naciones Unidas, 17 yuʼun julio ta 2023).
«Ta skoj ti laj yal Rusia ti muʼyuk xa tstak batel veʼlil ta yantik lume, li buchʼutik xchanojbeik skʼoplale chalik ti mas xa chtoy li veʼlile xchiʼuk ti mas xa vokol ta taele, jaʼ mas chil svokolik li buchʼutik nakalik ta lumetik ti abol sbaike, jech kʼuchaʼal li ta snorteal Áfricae xchiʼuk Oriente Medioe» (Atalayar.com, 23 yuʼun julio ta 2023).
Kʼelo li kʼusi chal Vivlia ta venta ti vokol xa ta tael veʼlile xchiʼuk li kʼusi chkʼot ta pasel ta jelavele.
Li Vivliae laj xa onoʼox yal ti vokol ta tael veʼlile
Xi onoʼox laj yal komel li Jesuse: «Chlik skontrain sbaik jujun mukʼta jteklum, chlik skontrain sbaik ajvaliletik, chtal viʼnal» (Mateo 24:7).
Li ta slivroal Apokalipsise, chalbe skʼoplal chanvoʼ jkajlejetik ta kaʼ. Li jun jkajlej ta kaʼe jaʼ skʼan xal paskʼop, li yane jaʼ skʼan xal viʼnal. Li albil kʼope chal ti chkʼot skʼakʼalil ti chjutukaj li veʼlile xchiʼuk ti chtoy tajeke. Xi chale: «Jaʼ to laj quil te oy jcot icʼal caʼ. Li bochʼo scajlebinoje stsacoj ta scʼob jun skilo. Laj caʼay oy bochʼo chcʼopoj [...], jech laj yal: ‹Li stojol jun kilo trigoe jaʼ jech stojol chcʼot jech chac cʼu chaʼal jun cʼacʼal tojolil. Yan li cebadae jaʼ oxib kilo xtoj ta jun cʼacʼal tojolil›» (Apokalipsis 6:5, 6, Scʼop Dios ta Chenalhó).
Li albil kʼopetik ti chalbe skʼoplal viʼnale yakal xa chkʼot ta pasel li avie. Li Vivliae chal ti jaʼ skʼoplal li slajebal kʼakʼale (2 Timoteo 3:1). Mi chakʼan chanabe mas skʼoplal ta sventa li slajebal kʼakʼale xchiʼuk li jkajlejetik ta kaʼe, kʼelo li video Lik sokuk tal jkuxlejaltik li ta 1914 xchiʼuk li mantal «¿Kʼusi skʼoplal li jkajlejetik ta kaʼ chal Apokalipsise?».
¿Kʼuxi tskoltautik li Vivliae?
Li Vivliae chal lekil tojobtaseletik sventa xkuch batel kuʼuntik li jvokoltike, jech kʼuchaʼal ti chjutukaj li jveʼeltike xchiʼuk ti chtoy tajek stojole. Xuʼ xakʼel junantik tojobtaseletik li ta mantal «¿Kʼuxi xuʼ xijkuxi akʼo mi jutuk jtakʼintik?».
Li Vivliae chakʼ spatobil koʼontontik xtok, yuʼun chal ti chlekub li jkuxlejaltike. Chal ti «ch˗ayan ep kʼusitik stakʼ lajesel li ta balumile» xchiʼuk ti muʼyuk xa buchʼu chil viʼnale (Salmo 72:16). Sventa xanabe mas skʼoplal ta sventa taje xchiʼuk ti kʼu yuʼun xuʼ jchʼuntik ti chkʼot ta pasele, kʼelo li mantal «¡Oy kʼusitik kʼupil sba chtal!».