¡CHAPALUKUTIK-O!
Li jpolitikoetike chalik ti xuʼ xlik li Armajedone | ¿Kʼusi chal li Vivliae?
Li ta sob lunes 10 yuʼun oktuvre ta 2022, li Rusiae laj yakʼ batel bombaetik li ta junantik jteklumetik ta Ucraniae. Ti jech la spase, jaʼ ta skoj ti laj yichʼ jipel batel bomba li ta mukʼta puente ti snitoj sba li ta Crimea xchiʼuk Rusia li ta 8 yuʼun oktuvre ta 2022. Kak xa onoʼox yalojik li jpolitikoetik ti jutuk xa skʼan xlik li Armajedon ti xibal sbae.
«Li ta skʼakʼalil Kennedy [presidente ta Estados Unidos] xchiʼuk ti la skʼanik bombaetik li ta Cubae te xa ox chlik yilel li Armajedone.[...] Pe li avie mas xa jamal xvinaj ti jaʼ xa yorail chlike. Mi jech-o chichʼ tunesel li mukʼta abtejebaletik xchiʼuk li bombaetike, ta onoʼox xlik li Armajedone» (Joe Biden, presidente ta Estados Unidos, 6 yuʼun oktuvre ta 2022).
Kʼalal laj yichʼ jakʼbel sloʼil li presidente ta Ucrania ti kʼusi xuʼ xkʼot ta pasel mi jech-o chichʼ tunesel li bombaetike, xi laj yale: «Jchʼunoj ti jaʼ li Armajedon eke, ti xuʼ xil˗o svokol li krixchanoetik ta spʼejel balumile» (Volodímir Zelenski, BBC News, 8 yuʼun oktuvre ta 2022).
¿Mi jaʼ te chlik˗o Armajedon ta skoj ti chichʼ tunesel li mukʼtikil bombaetike? ¿Kʼusi chal li Vivliae?
¿Mi jaʼ te chlik-o Armajedon ta skoj li bombaetike?
Maʼuk. Li jpʼel kʼop Armajedon xie jun noʼox velta chvinaj ta Vivlia, jaʼ ta Apokalipsis 16:16. Kʼalal «Armajedon» xi li ta Vivliae, maʼuk chalbe skʼoplal li paskʼop tspasik li ta mukʼta lumetike, yuʼun jaʼ chalbe skʼoplal li paskʼop yuʼun Dios xchiʼuk skotol li «ajvaliletik ta spʼejel [balumile]» (Apokalipsis 16:14). Li Diose tstunes li paskʼop ta Armajedon sventa slajesbe skʼoplal skotol li ajvaliletik ta balumile (Daniel 2:44).
Mi chakʼan to chachanbe mas smelolal kʼusi chkʼot ta stojolal li balumil mi lik li Armajedone, kʼelo li mantal «¿Kʼusi jaʼ li Armajedone?».
¿Mi chichʼ lajesel˗o balumil xchiʼuk krixchanoetik li ta paskʼop ta bombaetike?
Muʼyuk. Xuʼ van stunesik mukʼtikil bombaetik ta jelavel li ajvaliletike, pe li Diose muʼyuk chakʼ ti xichʼ lajesel li balumile. Yuʼun li Vivliae xi chale:
«Li balumile te oy˗o sbatel osil» (Eklesiastes 1:4).
«Chuʼuninik balumil li buchʼutik tukʼike xchiʼuk te chkuxiik˗o sbatel osil» (Salmo 37:29).
Akʼo mi jech, li albil kʼopetik ta Vivlia xchiʼuk li kʼusitik chkʼotanuk ta pasel avie, chakʼ kiltik ti poʼot xa xjel xkuxlejal li krixchanoetike (Mateo 24:3-7; 2 Timoteo 3:1-5). Mi chakʼan chanaʼ kʼusi chal Vivlia ta sventa li kʼusi chkʼot ta pasel ta jelavele, chʼamo li matanal chanubtasel chkakʼkutike.
Xuʼ van chakʼupin skʼelel xtok liʼe
KʼUSITIK TSJAKʼIK TA SVENTA VIVLIA
¿Mi chichʼ lajesel li balumile?
Li Vivliae jamal chal kʼusi snopoj tspas Dios ta sventa li jbalumiltike.
LI KʼUSI BAʼYEL SKʼAN JCHANTIK TA VIVLIAE
¿Kʼu yuʼun la spas Balumil li Diose?
Li balumile jaʼ jun planeta ti toj kʼupil sbae. Lek noʼox tajek ti kʼu snamal xil li kʼakʼale, ti kʼu stsatsal chbalalije xchiʼuk ti kʼu yelan tstsʼeʼan sba ta jujujote. ¿Kʼu yuʼun laj yakʼ tajek yoʼonton Dios ti lekuk smeltsane?
KʼUSITIK TSJAKʼIK TA SVENTA VIVLIA
¿Kʼuxi jnaʼojtik ti ta slajebal xa kʼakʼal kuxulutike?
Li Vivliae yaloj xa onoʼox li kʼusitik chkʼot ta pasel ti jaʼ senyail ti oyutik xa ta slajebal kʼakʼale.
Li Rusiae tstsak ta kʼop Ucrania | ¿Mi yakal xa chkʼot ta pasel li albil kʼopetik ta Vivliae?
Mi jaʼ jeche, ¿mi chal Vivlia xtok ti kʼuxi chkʼot ta tsutsele?
LI JKʼEL˗OSIL TA TOYOLE
¿Mi xuʼ van kuxul xijkom li ta Armajedone?
Li jpʼel kʼop Armajedone chak xiʼel, pe ¿kʼusi jaʼ ta melel?
