¡CHAPALUKUTIK˗O!
Saʼkʼop ta skoj politika | ¿Kʼusi chal li Vivliae?
Ta spʼejel balumile ep buchʼutik chlajik ta milel ta skoj ti ch˗och yaʼiik ta ajvalile.
Li ta Mexicoe, li ta 2023 kʼalal ta 2024 lajik ta milel 39 ta voʼ krixchanoetik ti ch˗och yaʼiik ta ajvalile, sba to velta jech kʼot ta pasel taje. Toj echʼ xa noʼox saʼkʼop ta jkoj li politikae.
Li ta Europae, lek saʼik kʼop ta skoj li politikae. Jech kʼuchaʼal liʼe, li ta 15 yuʼun mayo ta 2024, jutuk xa ox mu laj ta milel li primer ministro ta Eslovaquiae.
Li ta 13 yuʼun julio ta 2024, li ta Estados Unidose, chʼayal to kʼot yoʼonton li krixchanoetik kʼalal tsmil xa ox yaʼiik li Donald Trump ti jaʼ toʼox presidentee.
¿Kʼu yuʼun toj echʼ xa noʼox milbail ta skoj li politikae? ¿Mi chlaj van skʼoplal junuk kʼakʼal? ¿Kʼusi chal li Vivliae?
Li Vivliae yaloj xa onoʼox ti chjuʼ chʼakbail ta skoj li politikae
Li Vivliae yaloj xa onoʼox «ti chtal tsots vokolil li ta slajebal xa kʼakʼale», yuʼun mas xa ep krixchanoetik ti tsaʼik kʼope xchiʼuk ti mu «jutebuk oy ta yoʼontonik tspas ta jmoj skʼopik[e]».
«Naʼo me ti chtal tsots vokolil li ta slajebal xa kʼakʼale, toj echʼ noʼox xibal sba. Yuʼun tskʼan sba stuk li krixchanoetike, [...] mu kʼusi snaʼ stojik ta vokol, muʼyuk stukʼil yoʼontonik, [...] mi jutebuk oy ta yoʼontonik tspas ta jmoj skʼopik, chchopol loʼiltavanik, [...] simaronik, [...] j˗akʼvanejetik ta kʼabal, pimik ta mantal, xtoyet xa tajek chaʼi sbaik» (2 Timoteo 3:1˗4).
Li Vivliae yaloj xa onoʼox ti avi kʼakʼale, ch˗epaj li buchʼutik tskontrainik li ajvaliletike xchiʼuk li saʼkʼop o vochlajetel ta skoj politikae (Lukas 21:9). Pe skotol taje mu jechuk˗o sbatel osil.
Chlaj skʼoplal li paskʼop ta skoj politikae
Li Vivliae chal ti tslajes skotol ajvaliletik ta balumil li Diose xchiʼuk tsvaʼan jun ajvalil ta vinajel.
«Li Dios te oy ta vinajele tsvaʼan jun ajvalilal [...]. Jaʼ bikʼitik tslilin xchiʼuk tslajesbe skʼoplal skotol li ajvalilaletik taje, vaʼun stuk xa noʼox te chkom sbatel osil» (Daniel 2:44).
Li Ajvalilal yuʼun Diose chakʼ talel jun oʼontonal xchiʼuk jmoj tsobolutik yuʼun ta spʼejel balumil.
Li buchʼu vaʼanbil ta ajvalile jaʼ li Jesukristoe. Xi chichʼ albel skʼoplale: «Bankilal J˗akʼ˗jun˗oʼontonal». Jaʼ chakʼ talel jun oʼontonal ta sbatel osil (Isaias 9:6, 7).
Li avie, li buchʼutik yakʼoj xa sbaik ta ventainel yuʼun li Ajvalilal taje, yakal xa tskʼupinik jun oʼontonal. Xi chal Vivlia ta sventa li krixchanoetik taje: «Tspasik ta slokobil balumil li s˗espadaike xchiʼuk tspasik ta jos li slansaike. Muʼyuk xa tstsak sbaik ta kʼop li mukʼtik lumetike xchiʼuk mi jaʼuk xa chchanik paskʼop» (Isaias 2:3, 4).
Mi chakʼan chanabe mas skʼoplale, kʼelo li mantal ti xi sbie: «¿Kʼusitik tspas li Ajvalilal yuʼun Diose?» xchiʼuk li video ¿Kʼusi jaʼ li Ajvalilal yuʼun Diose?