¡CHAPALUKUTIK-O!
Li sientifikoetike la sjelbeik yorail li Reloj del Juicio Final | ¿Kʼusi chal li Vivliae?
Li ta 24 yuʼun enero ta 2023, li sientifikoetike la sjelbeik yorail li Reloj del Juicio Final a (li yorail lajebale) ti jutuk xa skʼan xkʼot ta oʼlol akʼobal xkaltike.
«Li ta martese, la sjelik li Reloj del Juicio Final ti jaʼ skʼan xal li vokoliletik tsnuptan li krixchanoetik avie. Mas xa jutuk skʼan xkʼot li ta oʼlol akʼobal xkaltik ta skoj li paskʼop ta Ucraniae, ti xuʼ xlik paskʼop ti bu tstunesik tsatsal vombaetike xchiʼuk ti mas xa tsok li xkʼixnal sikil balumile» (Servicio internacional de noticias de la agencia AFP [Notisiaetik ta spʼejel balumil yuʼun AFP]).
«Li sientifikoetike laj yalik ta martes ti la sjelbeik yorail li Reloj del Juicio Finale. Avie, 90 segundo xa skʼan li ta oʼlol akʼobale. Muʼyuk bu jech ilbil˗o ti toj nopol xa li lajebale» (ABC News [Notisia ABC]).
«Oy jayvoʼuk sientifikoetik ti ta jeltos lumetik bu likemik tale laj yalik ti muʼyuk bu jech ilbil˗o ti xuʼ xtupʼ skʼoplal ta jpʼel li krixchanoetike» (periodiko The Guardian [Li jchabivaneje]).
¿Mi poʼot xa xchʼay skʼoplal li krixchanoetik xchiʼuk li balumile? ¿Mi skʼan van xijxiʼo li kʼusi chtal ta jelavele? ¿Kʼusi chal li Vivliae?
¿Kʼusi chkʼot ta pasel li ta jelavele?
Li Vivliae chal ti «te oy˗o sbatel osil» li balumile xchiʼuk ti oy buchʼutik ‹te chkuxiik-o sbatel osile› (Eklesiastes 1:4; Salmo 37:29). Jaʼ yuʼun, li krixchanoetike muʼyuk chlaj yuʼunik li balumile xchiʼuk muʼyuk tsok tajek yuʼunik ti mu xa stakʼ naklebinele.
Pe li Vivliae chal ti oy kʼusi chichʼ lajesele. Jech kʼuchaʼal liʼe, chal ti «ta xjelav li balumile» (1 Juan 2:17).
Mi chakʼan chanabe smelolal kʼusi skʼan xal kʼalal chal Vivlia ti chlaj li balumile, kʼelo li mantal «¿Mi jutuk xa skʼan xlaj li balumile? ¿Kʼusi jaʼ li apokalipsise?».
Mi chakʼan chanaʼ kʼusi chal Vivlia ta sventa li kʼusi poʼot xa xkʼot ta pasel ta spʼejel balumile, kʼelo li mantal «¿Cuándo será el fin del mundo?».
Junuk noʼox avoʼonton
Li Vivliae tskoltautik sventa junuk noʼox koʼontontik akʼo mi ep kʼusitik chopol chkʼot ta pasel li ta balumile. ¿Kʼuxi tskoltautik?
Li Vivliae chakʼbutik lekil tojobtaseletik ti jtunel kuʼuntike (2 Timoteo 3:16, 17). Jun skʼelobile, mi chakʼan chanaʼ kʼuxi xuʼ skoltaot Vivlia sventa junuk avoʼonton akʼo mi oy avokole, kʼelo li mantal «¿Kʼusi xuʼ jpas sventa mu jvul tajek koʼontone?».
Li Vivliae chakʼ spatobil koʼontontik, yuʼun chal ti oy kʼusi lek chkʼot ta pasel li ta jelavele (Romanos 15:4). Chalbutik li kʼusi chkʼot ta pasel li avie xchiʼuk li ta jelavele. Taje jaʼ tskoltautik sventa junuk noʼox koʼontontik akʼo mi ep kʼusitik chkʼot ta pasel ta spʼejel balumil.
Sventa xatabe sbalil li kʼusi chal Vivliae, chʼamo li chanubtasel chakʼ stestigotak Jeovae.
a «Li Reloj del Juicio Final jaʼ noʼox jun skʼelobil ti tspʼijubtas li krixchanoetike, yuʼun jutuk skʼan xlaj kuʼuntik li balumil ta skoj li kʼusitik achʼ chlokʼanuk ti xibalik sbae. Jaʼ jun skoʼoltasobil ti tsvules ta joltik ti skʼan oy kʼusi jpastik mi mu jkʼantik xchʼay jkʼoplaltik li ta balumile» (Bulletin of the Atomic Scientists [Svun sientifikoetik ti chchanbeik skʼoplal átomoe]).