«Li krixchanoetike oy kʼusitik yakal tspasik ti xuʼ sok˗o li sikil xkʼixnal balumile: Chnoj ta voʼ li lumetike, chkʼixnaj tajek li balumile, ch˗echʼ tsatsal ikʼaloʼ ti xibalik sba tajeke, chjutukaj li voʼe, yantik xchʼay stsʼunbal jun miyon tsʼiʼleletik xchiʼuk chonbolometik. Maʼuk jecheʼ loʼil li kʼusi chkale xchiʼuk muʼyuk ta jpʼoles. Li sientifikoetike chalik ti mi muʼyuk tsjelik li kʼusi tspas ajvaliletike, jaʼ jech chkʼot ta pasel skotol taje» (Jech laj yal li António Guterres ti jaʼ sekretario jeneral yuʼun Naciones Unidas kʼalal oy kʼusi la sjakʼ li Grupo Intergubernamental de Expertos sobre el Cambio Climático ta 4 yuʼun avril ta 2022).

 «Li sientifikoetike chalik ti ta jabiletik chtale tsok jutuk mu skotoluk li 423 parkeetik oy ta Estados Unidos ta skoj ti chjel li sikil xkʼixnal balumile. Mas to tsok˗o li parkeetik ta skoj ti chkol kʼokʼe, li nojelal ta voʼe, ti chchʼi li nabe xchiʼuk ti chkʼixnaj tajeke» (“Floring Kiaos in Yellowstone, a Saign of Craisis to Com” [Li mukʼta nojelal ta voʼ ta Yellowstone jaʼ svinajeb li kʼusi chtal ta tsʼakale], The New York Taims, 15 yuʼun junio ta 2022).

 ¿Mi chlaj van skʼoplal li kʼusitik tsokes balumile? Mi jaʼ jeche, ¿kʼuxi chkʼot ta pasel? Kʼelavil li kʼusi chal Vivliae.

 Li Vivliae chal ti Diose tslajesbe skʼoplal «li buchʼutik yakal tsokesik li balumile», Apokalipsis 11:18. Li versikulo liʼe oxtos kʼusi chakʼ kiltik:

1.  Baʼyel.  Li krixchanoetike tsokesik tajek li balumile.

2.  Xchibal. Chlaj skʼoplal li kʼusitik tsokes balumile.

3.  Yoxibal. Jaʼ noʼox stuk Dios xuʼ slajesbe skʼoplal li kʼusitik tsokes balumile.

 Li Vivliae chal ti «balumile te oy˗o sbatel osil», Eklesiastes 1:4. Jech˗o chichʼ naklebinel.

•   «Chuʼuninik balumil li buchʼutik tukʼike xchiʼuk te chkuxiik˗o sbatel osil», Salmo 37:29.

 Tsmeltsaj ta j˗echʼel li balumile xchiʼuk kʼupil sba chkom.

•   «Li takixokol balumile xchiʼuk li takin balumile ta xmuyubajik, li stenlejaltik ti takin tajeke xkuxet noʼox yoʼonton likel xchiʼuk chnichin kʼuchaʼal li asafran nichime», Isaias 35:1.