Ep krixchanoetike tskʼan tsnabeik skʼoplal kʼu yelan xkuxlejal li jveganoetike.

•    «Li jveganoetike mu skʼanik ti xichʼ ilbajinel o xichʼ milel chonbolometik sventa slajesbeik li sbekʼtale o ti te xlik tal li skʼuʼ spokʼike o yan kʼusitik» (The Vegan Society).

 Ep li buchʼutik tspasik ta vegano o ti mu skʼan stiʼik o mu skʼan stunesik li kʼusi chlik tal ta chonbolometike jaʼ ta skoj ti skʼanojik li chonbolometike, pe maʼuk noʼox, yuʼun tskʼan chchabiik li balumile, sventa mu x˗ipajik˗o o jech tspasik ta skoj srelijionik.

•    «Oy junantik krixchanoetike jaʼ noʼox ti oy kʼusitik tstsʼikik tslajesike, pe li jveganoetike mu jechuk. Yuʼun tsots tajek skʼoplal chilik, xchʼunojik ti lek li kʼusi tspasike xchiʼuk tsnopik ti oy kʼusi xuʼ spasik ta jujuntal sventa xlekub yuʼunik li balumile» (Britannica Academic).

 Li buchʼutik tspasik jech taje, ¿mi chlekub van yuʼunik li balumile? ¿Kʼusi chal li Vivliae?

 Li Vivliae chal ti Jpasvanej kuʼuntik ti jaʼ li Jeovae a mas tsots skʼoplal chil li krixchanoetik kʼuchaʼal li chonbolometike. Kʼalal la spas li krixchanoe, laj yal ti xuʼ spas ta mantal li chonbolometike (Jenesis 1:27, 28). Kʼalal jelav kʼuk sjalile, li Diose laj yalbe li krixchanoetik ti xuʼ stiʼik li chonbolometike (Jenesis 9:3). Pe taje maʼuk me skʼan xal ti lek chil ti xkilbajintik li chonbolometike (Proverbios 12:10).

 Li Vivliae chal ti ta jujuntal ta jnoptik mi ta jtiʼtik o mi moʼoj li sbekʼtal chonbolometike. b Li kʼusi xkʼot ta nopel kuʼuntike maʼuk xa me lek chilutik˗o li Diose (1 Korintios 8:8). Skʼan me mu jchopol kʼoptatik li yantik ta skoj li kʼusi xkʼot ta nopel yuʼunike (Romanos 14:3).

 Li Vivliae chakʼ ta ilel ti mu xlekub˗o yuʼun balumil akʼo mi jel o jtʼuj li kʼusi ta jlajestike. Yuʼun ep li kʼusitik chkʼot ta pasele jaʼ ta skoj li politikae, li takʼine xchiʼuk yan kʼusitik. Pe taje muʼyuk buchʼu xchapaj yuʼun. Xi chal li Vivliae:

•    «Mu xa stakʼ tukʼibtasel li kʼusi xotxote» (Eklesiastes 1:15).

 Jaʼ chchapaj yuʼun skotol vokoliletik li Jpasvanej kuʼuntike. Li Vivliae chal ta jun lokʼolkʼop li kʼusi tspase.

•    «Laj kil jun achʼ vinajel xchiʼuk jun achʼ balumil; yuʼun echʼ xa li mol vinajel xchiʼuk li mol balumile, jech xtok, chʼabal xa li nabe» (Apokalipsis 21:1).

 Li Diose tsabe xkʼexol li ajvaliletik liʼ ta balumile. Li mol vinajele tsjel ta «achʼ balumil», jaʼ xkaltik, li Ajvalilal yuʼun ti te ta vinajele. Li Ajvalil taje tslajesbe skʼoplal li «mol balumile», jaʼ xkaltik, li chopol krixchanoetike. Jaʼ tspas ta mantal li achʼ balumile, jaʼ xkaltik, jaʼ li buchʼutik ta sjunul yoʼonton chakʼ sbaik ta ventainele.

 Mi jaʼ xa ox tsventainutik li Ajvalilal yuʼun Diose jaʼ to chlekub li balumile xchiʼuk jun xa koʼontontik xchiʼuk li chonbolometike (Isaias 11:6˗9).