¡CHAPALUKUTIK˗O!
Li paskʼop ta Ucraniae chkil˗o jvokoltik ta viʼnal
Li ta 19 yuʼun mayo ta 2022, echʼ yuʼunik jun tsobajel li Consejo de Seguridad de la ONU, tee kʼotik mas ta 75 ta voʼ krixchanoetik ti tsots yichʼoj yabtelike. Xi laj yalike: «Kilojtik talel ti vokol xa ta tael veʼlil ta skoj li coronaviruse xchiʼuk ti chjelilaj li sikil xkʼixnal balumile, pe mas to xuʼ xkil jvokoltik ta viʼnal ta spʼejel balumil ta skoj li paskʼop ta Ucraniae». Ta tsʼakal jutuke, li revista The Economist laj yal ti sokem xa onoʼox talel li balumile xchiʼuk ti toj echʼ xa noʼox vokolile, pe ta skoj li paskʼop ta Ucraniae mas to xuʼ xkiltik viʼnal ta spʼejel balumil. Li Vivliae yaloj xa onoʼox ti chkiltik viʼnal li ta jkʼakʼaliltike, pe chalbutik lekil tojobtasel xtok xchiʼuk spatobil koʼontontik sventa xkuch kuʼuntike.
Li Vivliae yaloj xa onoʼox ti chtal viʼnale
Xi xa onoʼox yaloj li Jesuse: «Chlik skontrain sbaik jujun mukʼta jteklum, chlik skontrain sbaik ajvaliletik, chtal viʼnal» (Mateo 24:7).
Li ta slivroal Apokalipsise chalbe skʼoplal chanvoʼ jkajlejetik ta kaʼ. Li jun jkajlej ta kaʼe jaʼ skʼan xal paskʼop, li yane jaʼ skʼoplal viʼnal. Li albil kʼope chal ti oy kʼuk sjalil ti chtoy tajek stojol li veʼlile xchiʼuk ti chʼakbil xa noʼox chij˗akʼbate. «Jaʼ to laj quil te oy jcot icʼal caʼ. Li bochʼo scajlebinoje stsacoj ta scʼob jun skilo. Laj caʼay oy bochʼo chcʼopoj [...] jech laj yal: ‹Li stojol jun kilo trigoe jaʼ jech stojol chcʼot jech chac cʼu chaʼal jun cʼacʼal tojolil. Yan li cebadae jaʼ oxib kilo xtoj ta jun cʼacʼal tojolil›» (Apokalipsis 6:5, 6, Xchʼul Cʼop Jtotic Dios, ta skʼop Chenalhó).
Li albil kʼopetik ta sventa li viʼnale yakal xa chkʼot ta pasel li avie. Li Vivliae chal ti ta ‹slajebal xa kʼakʼal› kuxulutike (2 Timoteo 3:1). Mi chakʼan to chanabe mas skʼoplal ta sventa li slajebal kʼakʼale xchiʼuk ti yakalik˗o ta xanvil li jkajlejetik ta kaʼe, kʼelo li video Lik sokuk tal jkuxlejaltik li ta 1914 xchiʼuk kʼelo li mantal «¿Kʼusi skʼoplal li jkajlejetik ta kaʼ chal Apokalipsise?».
¿Kʼuxi tskoltautik li Vivliae?
Li Vivliae chakʼbutik lekil tojobtaseletik sventa xkuch kuʼuntik li kʼusitik ta jnuptantike. Jech kʼuchaʼal ti kʼusi xuʼ jpastik kʼalal chtoy stojol li veʼliletike xchiʼuk ti jutuk noʼox ta taele. Xuʼ xakʼel junantik tojobtaseletik li ta mantal «¿Kʼuxi xuʼ xijkuxi akʼo mi jutuk jtakʼintik?».
Li Vivlia xtoke chakʼbutik spatobil koʼontontik. Chal ti «ch-ayan ep kʼusitik stakʼ lajesel li ta balumile» xchiʼuk ti muʼyuk xa buchʼu chil viʼnale (Salmo 72:16). Sventa xavaʼibe smelolal ta sventa li spatobil oʼontonale xchiʼuk ti kʼu yuʼun xuʼ jchʼuntik ti chkʼot ta pasele, kʼelo li mantal «¡Oy kʼusitik kʼupil sba chtal!».