1 Juan 3:1-24
3 ¡Kʼelo avilik ti toj echʼ xa noʼox skʼanojutik li Totile, ti jech xnichʼnabutik Dios chkichʼtik albele! Jaʼ xnichʼnabutik ta melel. Jaʼ yuʼun mu xojtikinutik li balumile, yuʼun mu xojtikinik li Diose.
2 Voʼoxuk ti jkʼanojoxuke, avie xnichʼnabutik xa Dios, akʼo mi muʼyuk to akʼbil ta ilel ti kʼu kelantik ta jelavele. Pe jnaʼojtik ti xijkoʼolajutik xchiʼuk kʼalal mi laj yichʼ akʼel ta ilele, yuʼun chkiltik ti kʼu yelan li stuke.
3 Skotol li buchʼutik te yakʼoj spatobil yoʼonton ta stojolale tsakubtas sbaik ek jech kʼuchaʼal sak li stuke.
4 Skotol li buchʼutik jaʼ tspasilanik li mulile jaʼ yakal tspasilanik li choplejale, jech oxal li mulile jaʼ li spasel choplejale.
5 Anaʼojik xtok ti jaʼ sventa tslokʼes jmultik ti jech laj yichʼ akʼel ta ilele xchiʼuk muʼyuk smul li stuke.
6 Skotol li buchʼutik jmoj te oyik xchiʼuke muʼyuk tspasilanik li mulile; mi oy buchʼu tspasilan li mulile muʼyuk to yiloj xchiʼuk muʼyuk to yojtikinoj.
7 Kuni nichʼnab, mu me buchʼu sloʼlaoxuk; tukʼ skʼoplal li buchʼu jaʼ tspasilan li kʼusi tukʼ jech kʼuchaʼal tukʼ li stuk eke.
8 Te likem talel ta stojolal Diablo* li buchʼu jaʼ tspasilan li mulile, yuʼun ta slikebal onoʼox spasoj-o talel smul li Diabloe. Jech oxal jaʼ sventa tslilinbe yabteltak Diablo ti laj yichʼ akʼel ta ilel li Xnichʼon Diose.
9 Skotol li buchʼu vokʼem* ta stojolal Diose muʼyuk bu tspasilan li mulile, yuʼun te oy-o ta stojolal li xchʼul espiritu* Diose xchiʼuk mu stakʼ spasilan li mulile, yuʼun te vokʼem ta stojolal Dios.
10 Li xnichʼnab Dios xchiʼuk li xnichʼnab Diabloe lek jamal xvinaj ta kʼelel ta sventa liʼe: maʼuk te likem ta stojolal Dios skotol li buchʼu muʼyuk tspas kʼusi tukʼe xchiʼuk li buchʼu mu skʼan yermanoe.
11 Liʼe jaʼ li aʼyej ti avaʼiojbeik xa onoʼox skʼoplal ta slikebale, ti skʼan jkʼan jbatik ta jujuntale;
12 mu jechuk jpastik jech kʼuchaʼal li Kaine, ti te likem talel ta stojolal li buchʼu toj chopole* xchiʼuk ti la smil li yitsʼine. ¿Kʼu yuʼun ti milvane? Yuʼun toj chopol li yabteltake, pe tukʼ yabteltak li yitsʼine.
13 Ermanoetik, mu me toj labaluk xavaʼiik ti tspʼajoxuk li balumile.
14 Jnaʼojtik ti xkoʼolaj kʼuchaʼal chamemutik toʼoxe, pe li avie kuxulutik xa ta skoj ti jkʼanojtik li ermanoetike. Te oy-o ta lajelal li buchʼu mu xkʼanvane.
15 Jaʼ jmilvanej skotol li buchʼu tspʼaj yermanoe xchiʼuk anaʼojik ti muʼyuk tsta kuxlejal sbatel osil li jmilvaneje.
16 Xkojtikintik kʼanelal ta skoj liʼe: yuʼun laj yakʼ xkuxlejal ta jtojolaltik; jaʼ yuʼun li voʼotik eke persa chkakʼ jkuxlejaltik ta stojolal li kermanotaktike.
17 Buchʼuuk noʼox ti oy kʼusi x-ayan yuʼun liʼ ta balumile, pe mi muʼyuk bu chkʼuxubin yermano kʼalal chil ti oy kʼusi chtun yuʼune, ¿kʼuxi onoʼox ti te to li kʼanelal yuʼun Dios ta stojolale?
18 Kuni nichʼnab, skʼan xijkʼanvan, yuʼun maʼuk noʼox ti chkaltike o ti ta ketik noʼox chlokʼe, moʼoj, yuʼun skʼan xkakʼtik ta ilel ta melel ta sventa li kʼusitik ta jpastike.
19 Jaʼ yuʼun jech ta jnaʼtik ti te likemutik talel ta stojolal li kʼusi melele xchiʼuk ta jpat lek koʼontontik ti skʼanojutik li Diose,
20 manchuk mi ta kʼusiuk noʼox ti oy jmul chkaʼi jbatik yuʼun li koʼontontike, yuʼun mas to toyol skʼoplal li Diose, jaʼ mu sta li koʼontontike xchiʼuk xojtikin skotol li kʼusitike.
21 Voʼoxuk ti jkʼanojoxuke, mi muʼyuk jmultik chkaʼi jbatik yuʼun li koʼontontike jamal chijkʼopojutik ta stojolal li Diose;
22 ta xakʼbutik ti kʼusiuk noʼox ta jkʼanbetike, yuʼun yakal ta jchʼunbetik li smantaltake xchiʼuk ta jpastik li kʼusitik lek chil ta sate.
23 Ta melel, liʼe jaʼ li smantaltake: ti oyuk xchʼunel koʼontontik ta sbi li Jesukristo ti jaʼ Xnichʼone xchiʼuk ti jkʼan jbatik ta jujuntal jech kʼuchaʼal laj yakʼbutik jun mantale.
24 Jech xtok, li buchʼu chchʼunbe smantaltake te jmoj oy-o xchiʼuk li Diose, li Dios eke te jmoj oy-o xchiʼuk ek. Ta skoj li chʼul espiritu laj yakʼbutike jnaʼojtik ti te jmoj oy-o ta jtojolaltike.
