1 Juan 4:1-21
4 Voʼoxuk ti jkʼanojoxuke, mu me xachʼunik skotol li kʼusi akʼbil ta naʼele, moʼoj, jaʼ lek akʼik venta mi te likem talel ta stojolal Dios li kʼusi akʼbil ta naʼele, yuʼun ep jloʼlavanej j-alkʼopetik lokʼik talel li ta balumile.
2 Xi yelan sventa xanaʼik ti te likem talel ta stojolal Dios li kʼusi akʼbil ta naʼele: te likem talel ta stojolal Dios skotol li kʼusi akʼbil ta naʼel mi jamal chalbe skʼoplal ti ay kʼuchaʼal krixchano li Jesukristoe.
3 Pe maʼuk te likem talel ta stojolal Dios skotol li kʼusi akʼbil ta naʼel mi muʼyuk jamal chalbe skʼoplal li Jesuse. Jech xtok, liʼe jaʼ li kʼusi akʼbil ta naʼel ti jech onoʼox chal yajkontra Kristo* li kʼusitik taje xchiʼuk ti chichʼ xa alel liʼ ta balumil li avie.
4 Ta stojolal Dios likemoxuk talel li voʼoxuke kuni nichʼnab xchiʼuk atsalojik xa li krixchanoetik taje, yuʼun jaʼ mas mukʼ skʼoplal li buchʼu jmoj oy xchiʼuk voʼoxuke, jaʼ mu sta li buchʼu jmoj oy xchiʼuk balumile.
5 Likemik talel ta balumil li stukike; jaʼ yuʼun jaʼ chalik li kʼusi likem talel ta balumile xchiʼuk ch-aʼibatik yuʼun li balumile.
6 Likemutik ta stojolal Dios li voʼotike. Chaʼibutik li buchʼutik chojtikinik Diose; pe muʼyuk chaʼibutik li buchʼutik maʼuk te likemik talel ta stojolal Diose. Jaʼ yuʼun xkojtikintik li kʼusi akʼbil ta naʼel ta sventa li kʼusi melele xchiʼuk xkojtikintik li kʼusi akʼbil ta naʼel ti loʼlaele.
7 Voʼoxuk ti jkʼanojoxuke jechuk-o jkʼan jbatik ta jujuntal, yuʼun li kʼanelale jaʼ yuʼun li Diose, jech xtok vokʼem* ta stojolal Dios skotol li buchʼu chkʼanvane xchiʼuk xojtikin li Diose.
8 Li buchʼu mu xkʼanvane muʼyuk bu yojtikinoj li Diose, yuʼun jaʼ kʼanelal li Diose.
9 Jaʼ yuʼun laj yichʼ akʼel ta ilel ta jtojolaltik li kʼanelal yuʼun Diose, yuʼun la stak talel ta balumil li jun noʼox Xnichʼon sventa jtatik li kuxlejal ta stojolale.
10 Xi yelan li kʼanelale, mu yuʼunuk voʼotik la jkʼantik li Diose, moʼoj, yuʼun jaʼ la skʼanutik xchiʼuk la stakbutik talel Xnichʼon kʼuchaʼal milbil matanal sventa jmultik yoʼ lek xkil jbatik xchiʼuk li Diose.
11 Voʼoxuk ti jkʼanojoxuke, mi jech la skʼanutik li Diose persa skʼan jkʼan jbatik ta jujuntal ek.
12 Muʼyuk buchʼu yiloj li Diose. Mi jech-o ta jkʼan jbatik ta jujuntale te chkom-o ta jtojolaltik li Diose xchiʼuk tstsʼaki li kʼanelal yuʼun Dios ta jtojolaltike.
13 Jaʼ yuʼun li voʼotike jnaʼojtik ti jmoj oyutik-o xchiʼuke, li stuk eke te jmoj oy-o jchiʼuktik ek, yuʼun yakʼojbutik li xchʼul espiritue.
14 Jech xtok, kilojtik —ti jaʼ yakal chkalbetik skʼoplale— ti stakoj talel Xnichʼon li Totil ti jaʼ Jkoltavanej yuʼun li balumile.
15 Buchʼuuk noʼox ti jamal chalbe skʼoplal ti jaʼ Xnichʼon Dios li Jesuse, li Diose jmoj oy-o xchiʼuk li buchʼu jech chale, li buchʼu jech chale jmoj oy-o xchiʼuk li Dios eke.
16 Li voʼotike laj xa kojtikintik xchiʼuk jchʼunojtik ti te oy ta jtojolaltik li kʼanelal yuʼun Diose.
Jaʼ kʼanelal li Diose, jech xtok jmoj oy-o xchiʼuk Dios li buchʼu jech-o chkʼanvane, li Diose jmoj oy-o xchiʼuk ek.
17 Ta skoj taje laj xa yichʼ tukʼibtasel ta jtojolaltik li kʼanelal sventa jamaluk xijkʼopoj li ta skʼakʼalil chapanele, yuʼun jaʼ jechutik liʼ ta balumil ek ti kʼu yelan li stuke.
18 Muʼyuk xiʼel mi oy kʼanelale, yuʼun tsnuts lokʼel xiʼel li tukʼil kʼanelale, yuʼun tspajesutik li xiʼele. Ta melel, muʼyuk to tukʼibtasbil ta kʼanelal li buchʼu chiʼe.
19 Li voʼotike chijkʼanvanutik, yuʼun jaʼ la skʼanutik baʼyel li stuke.
20 Mi oy buchʼu xi chale: «Jkʼanoj Dios maʼ voʼone», pe jutkʼop* mi spʼajoj li yermanoe. Yuʼun li buchʼu mu skʼan yermano ti yiloj ta sate mu stakʼ skʼan Dios ti muʼyuk yiloj ta sate.
21 Jaʼ yakʼojbutik li mantal taje, akʼo me skʼan yermano xtok li buchʼu skʼanoj Diose.
Tsʼibetik ta yok vun
^ «Antikristo» ta griego. Kʼelo glosario.
^ O: «ayanem».
^ O: «jnopkʼop»; «j-epalkʼop».
