1 Korintios 10:1-33
-
Sventa jchanubtasobiltik li kʼusitik kʼot ta pasel ta stojolal li j-israeletike (1-13)
-
Pʼijubtasel ta sventa li yichʼel ta mukʼ santoetike (14-22)
-
Xmexa Jeova. Xmexa pukujetik (21)
-
-
Kolemutik xchiʼuk skʼan jtsaktik ta venta li yantike (23-33)
-
«Jaʼuk me sventa chichʼ mukʼibtasbel skʼoplal Dios skotol li kʼusitik chapasike» (31)
-
10 Jaʼ yuʼun, oy ta koʼonton ti akʼo xanaʼike ermanoetik, ti te xanavik ta yolon tok xchiʼuk ti te echʼik ta nab skotol li jmoltotaktik ta voʼnee,
2 jech xtok laj yichʼik voʼ skotolik ta sventa Moises ta stojolal li tok xchiʼuk li nabe;
3 jtos noʼox veʼlil ta mantal la slajes skotolik
4 xchiʼuk jtos noʼox uchʼbolajel ta mantal laj yuchʼ skotolik. Yuʼun jaʼ te laj yuchʼik li ta ton sventa mantal ti te chiʼinbilik batele, jaʼ skʼoplal Kristo li ton taje.
5 Akʼo mi jech, jaʼ ep ti buchʼutik muʼyuk bu lek ilatik yuʼun li Diose, yuʼun te telajtik komik ta takixokol balumil.
6 Jaʼ yuʼun, jaʼ jchanubtasobiltik kʼot li kʼusitik kʼot ta pasele, sventa mu jkʼantik li kʼusitik xuʼ tsokesutik jech kʼuchaʼal la skʼanike.
7 Xchiʼuk mu me xkichʼtik ta mukʼ santoetik jech kʼuchaʼal la spasik junantike; jech onoʼox kʼuchaʼal xi tsʼibabile: «Chotiik ta veʼel, ta uchʼbolajel, vaʼun lik xchʼay yoʼontonik li krixchanoetike».
8 Mu me xijmulivaj* jech kʼuchaʼal mulivajik junantike, yuʼun lajik 23 mil ta jun noʼox kʼakʼal.
9 Mu me xkakʼtik ta preva Jeova jech kʼuchaʼal laj yakʼik ta preva junantike, jaʼ yuʼun lajik ta tiʼel ta chon.*
10 Mu me xijbikʼtal kʼopojutik jech kʼuchaʼal bikʼtal kʼopojik junantike, yuʼun milatik yuʼun jmilvanej.
11 Jaʼ yuʼun, jaʼ sventa jchanubtasobiltik li kʼusitik kʼot ta pasel ta stojolalike xchiʼuk laj yichʼ tsʼibael sventa jpʼijubtasobiltik li voʼotik ti vul xa ta jtojolaltik li slajeb skotol li kʼusitik oy ta balumile.*
12 Jaʼ yuʼun, li buchʼu tsnop ti lek vaʼale, akʼo me skʼel sba ti mu xyal ta lume.
13 Muʼyuk yan akʼel ta preva chavilik, jaʼ noʼox jech chavilik jech kʼuchaʼal chil li yantike. Pe tukʼ li Diose, muʼyuk chakʼ ti akʼo xavichʼik akʼel ta preva mi mu stsʼik avuʼunike, akʼo mi yakal chavichʼik akʼel ta preva, li Diose chakʼ avilik xtok kʼuxi xuʼ xakolik sventa xuʼ xkuch avuʼunik.
14 Jaʼ yuʼun li voʼoxuk ti jkʼanojoxuke, mu me xavichʼik ta mukʼ jsetʼuk* li santoetike.
15 Jaʼ jech ta jkʼoponoxuk talel jech kʼuchaʼal viniketik ti xtojobik ta yaʼibel smelolale; nopo avaʼi atukik li kʼusi chkalboxuke.
16 Li skopail bendision ti jaʼ ta jpastik-o orasione, ¿mi mu jaʼuk skʼan xal ti ta jtabetik sbalil li xchʼichʼel Kristoe? Li pan ta jvokʼtike,* ¿mi mu jaʼuk skʼan xal ti ta jtabetik sbalil li sbekʼtal Kristoe?
17 Yuʼun jun noʼox pan oy, manchuk mi eputik jun noʼox jbekʼtal jkotoltik, yuʼun jkotoltik ta jtabetik sbalil li pan taje.
18 Nopbeik skʼoplal avaʼiik li batsʼi j-israeletike:* ¿Mi mu tauk stabeik sbalil kʼusi oy ta skajleb matanal li buchʼutik tslajes li matanaletike?
19 Vaʼun chaʼa, ¿kʼusi ti yakal chkale? ¿Mi yuʼun jaʼ chkal ti oy stu li milbil matanal ti akʼbil ta stojolal santoe o ti oy stu li santoetike?
20 Mu jechuk maʼ taje; li voʼone chkal ti pukuj* chakʼbeik li milbil matanal chakʼik jyanlumetike, maʼuk chakʼbeik li Diose; pe mu jkʼan ti teuk akʼoplalik xchiʼuk li pukujetike.
21 Yuʼun mu me xuʼ ti te chavuchʼilanbeik sbel skopa Jeova mi yakal chavuchʼbeik li sbel skopa pukujetike; xchiʼuk mu me stakʼ ti te jech-o chalajesbeik li kʼusi oy «ta xmexa Jeova» mi yakal chalajesbeik li kʼusi oy ta xmexa pukujetike.
22 ¿O mi yuʼun ta jkʼan ta «jtijbetik yoʼonton Jeova sventa x-itʼixaj»? Maʼuk mas tsotsutik li voʼotike, ti jaʼ mu sta li stuke, ¿mi mu jechuk?
23 Stakʼ pasel skotol li kʼusitike; pe mu skotoluk oy sbalil. Stakʼ pasel skotol li kʼusitike; pe mu skotoluk tstsatsubtasvan.
24 Ta jujuntal akʼo saʼik li kʼusi lek chaʼi yan krixchanoe, maʼuk akʼo saʼik li kʼusi lek chaʼi stukike.
25 Xuʼ xatiʼo kʼusiuk ti chichʼ chonel ta chonob bekʼete, pe mu me kʼusi xajakʼ jsetʼuk ta skoj li ajol avoʼontone;
26 yuʼun «jaʼ yuʼun Jeova li balumile xchiʼuk li kʼusitik te oye».
27 Mi oy laj yikʼoxuk ta veʼel li buchʼutik maʼuk jchʼunolajele xchiʼuk mi chakʼan chabatike, lajesik li kʼusi cha-akʼbatike, pe mu me kʼusi xajakʼik jsetʼuk ta skoj li ajol avoʼontonike.
28 Pe mi oy buchʼu xi chalboxuke: «Liʼe akʼbil me ta milbil matanal», mi xie, mu xalajesik ta skoj li buchʼu laj yalboxuke xchiʼuk ta skoj li jol oʼontonale.
29 Maʼuk ta jkʼan chkalbe skʼoplal li ajol avoʼontone, jaʼ ta jkʼan chkalbe skʼoplal li sjol yoʼonton yan krixchanoe. ¿Kʼu yuʼun jaʼ chchapanun li sjol yoʼonton yan krixchano ti kolemun xae?
30 Mi ta jtojbe ta vokol Dios ti ta jtiʼe, ¿mi lek van ti chchopol kʼopojik ta jtojolal ta skoj ti ta jtiʼe?
31 Jaʼ yuʼun, mi chaveʼik, mi cha-uchʼbolajik o kʼusiuk noʼox ti chapasike, jaʼuk me sventa chichʼ mukʼibtasbel skʼoplal Dios skotol li kʼusitik chapasike.
32 Mu me xamakbeik yok li judaetike, li jgresiaetike xchiʼuk li tsobobbail yuʼun Diose,
33 jaʼ jech kʼuchaʼal ti jaʼ ta jpas li kʼusi lek chaʼi skotol krixchanoetik ta skotol li kʼusitike, maʼuk ta jsaʼ li kʼusi lek chkaʼi jtuke, jaʼ ta jsaʼ li kʼusi lek chaʼi epal krixchanoetik sventa xuʼ xkolike.
Tsʼibetik ta yok vun
^ Por·nei·a ta griego. Kʼelo glosario.
^ O: «kiletel chon».
^ Kʼelo glosario.
^ S.gr.: «jatavanik lokʼel ta stojolal».
^ O: «ta jxetʼtike»; «ta jxutike».
^ Kʼelo glosario.
^ Kʼelo glosario.
