1 Korintios 15:1-58
-
Xchaʼkuxesel Kristo (1-11)
-
Li chaʼkuxesele tsots skʼoplal sventa oyuk sbalil li xchʼunel oʼontonale (12-19)
-
Li xchaʼkuxesel Kristoe kʼot ta spatobil oʼontonal (20-34)
-
Bekʼtalil chichʼ mukel. Chchaʼkuxi kuxlejal ta vinajel (35-49)
-
Li kʼusi mu snaʼ xchame xchiʼuk li kʼusi mu snaʼ xkʼaʼe (50-57)
-
Ep kʼusi skʼan pasel li ta yabtel Kajvaltike (58)
15 Jaʼ yuʼun kermanotak, ta jvules ta ajolik li lekil aʼyejetik la jcholboxuke, ti la achʼamike xchiʼuk ti jaʼ lek tukʼ-o oyoxuke.
2 Yakal chata akolelik ek mi staoj-o yav chachʼunik li lekil aʼyejetik la jcholboxuke, pe muʼyuk me sbalil mi jecheʼ noʼox lakʼotik ta jchʼunolajele.
3 Yuʼun jaʼ baʼyel laj kalboxuk li kʼusi laj kichʼ albele, ti cham ta skoj jmultik li Kristo jech kʼuchaʼal chal li Tsʼibetike,*
4 ti laj yichʼ mukele, jech, ti laj yichʼ chaʼkuxesel ta yoxibal kʼakʼal jech kʼuchaʼal chal li Tsʼibetike,
5 ti laj yakʼ sba ta ilel ta stojolal Sefase,* laje laj yakʼ sba ta ilel ta stojolal li lajchaʼvoʼike.
6 Laje laj yakʼ sba ta ilel ta jun noʼox velta ta stojolal mas ta voʼob sien ermanoetik, akʼo mi oy xa buchʼutik vayemik ta lajelal, pe ep to li buchʼutik liʼ jchiʼinojtike.
7 Laje laj yakʼ sba ta ilel ta stojolal Santiago, laje ta skotol jtakboletik;
8 pe ta slajebale laj yakʼ sba ta ilel ta jtojolal ek, jech kʼuchaʼal li buchʼu muʼyuk staoj yual vokʼe.*
9 Voʼon li buchʼu mas bikʼit ta skotol li jtakboletike xchiʼuk mu jta-o ti jtakbol chkichʼ albele, yuʼun la jkontrainbe li stsobobbail Diose.
10 Ti kʼusi jtaoje, jaʼ koliyal li slekil yutsil yoʼonton Diose. Pe maʼuk jecheʼ li slekil yutsil yoʼonton jtaoje, yuʼun jaʼ mas li-abtej, jaʼ mu sta li yantike, pe maʼuk voʼon, jaʼ li slekil yutsil yoʼonton Dios oy ta jtojolale.
11 Akʼo mi voʼon o mi jaʼ li stukike, taje jaʼ li kʼu yelan la jcholkutike, ti kʼu yelan taje jaʼ jech la achʼunik.
12 Jaʼ yuʼun, mi yakal chichʼ cholbel skʼoplal ti laj yichʼ chaʼkuxesel li Kristoe, ¿kʼu yuʼun oy buchʼu chal avuʼunik ti muʼyuk chichʼ chaʼkuxesel li animaetike?
13 Ta melel, ti chʼabaluk bu chichʼ chaʼkuxesel li animaetike, xkoʼolaj kʼuchaʼal muʼyuk yichʼoj chaʼkuxesel li Kristo eke.
14 Pe mi muʼyuk bu yichʼoj chaʼkuxesel li Kristoe, muʼyuk sbalil ta melel ti ta jcholtik mantale xchiʼuk muʼyuk sbalil xtok li xchʼunel avoʼontonike.
15 Jech xtok, mi muʼyuk bu chichʼik chaʼkuxesel ta melel li animaetike, muʼyuk bu la xchaʼkuxes Kristo li Diose, mi jeche xkoʼolaj kʼuchaʼal yakal ta jutik kʼop* ta sventa Dios kʼalal chkaltik ti la xchaʼkuxes li Kristoe.
16 Yuʼun mi muʼyuk chichʼ chaʼkuxesel li animaetike, muʼyuk bu yichʼoj chaʼkuxesel li Kristo eke.
17 Jech xtok, mi muʼyuk bu yichʼoj chaʼkuxesel li Kristoe, muʼyuk sbalil li xchʼunel avoʼontonike; oy-o amulik.
18 Jech xtok, lajem xa-o skʼoplalik ek li buchʼutik vayemik xa ta lajelal ti jmoj oyik xchiʼuk Kristoe.
19 Mi jaʼ noʼox jmalaojtik Kristo li ta jkuxlejaltik liʼe, voʼotik mas abol jbatik, jaʼ mu sta li yantike.
20 Pe tana une laj xa yichʼ chaʼkuxesel li Kristoe, jaʼ sba sat tsʼunobil* kʼotem ta sventa li buchʼutik vayemik xa ta lajelale.
21 Ta skoj ti ta jun noʼox vinik och talel li lajelale, jaʼ jech ta stojolal jun noʼox vinik tstaik chaʼkuxesel li animaetike.
22 Jech kʼuchaʼal ta sventa Adan yakal chcham skotol li krixchanoetike, jaʼ jech ta sventa Kristo tsta xkuxlejal skotolik yan velta.
23 Pe ta jujuntal xkechet chkʼot ta pasel: jaʼ sba sat tsʼunobil li Kristoe, laje jaʼ li buchʼutik yuʼun Kristo kʼalal mi liʼ xa oye.*
24 Vaʼun chtal li slajebe, jaʼo kʼalal chakʼbe li Ajvalilal ta skʼob Sdios xchiʼuk ti jaʼ Stote xchiʼuk kʼalal mi slajesoj xaʼox skotol li ajvaliletike, li buchʼutik oy yabtelike xchiʼuk li buchʼutik oy sjuʼelike.
25 Yuʼun ch-ajvalilaj to batel kʼuchaʼal ajvalil jaʼ to kʼalal mi akʼbat xaʼox xpechʼ ta tekʼel yuʼun Dios skotol li yajkontratake.
26 Li slajeb jkontrainvanej ti chichʼ lajesele, jaʼ li lajelale.
27 Yuʼun li Diose «laj yakʼbe ta yok skʼob skotol li kʼusitike». Pe kʼalal ‹akʼbil ta yok skʼob skotol li kʼusitik›, xie, jamal xvinaj ti muʼyuk te tsakal skʼoplal li Buchʼu akʼbat ta yok skʼob skotole.
28 Pe kʼalal mi akʼbat xaʼox ta yok skʼob skotol li kʼusitike, li Nichʼonil eke chakʼ sba ta ventainel ta stojolal li Buchʼu akʼbat ta yok skʼob skotol li kʼusitike, sventa stuk xa noʼox chkʼot ta Ajvalil ta skotol kʼusitik li Diose.
29 Jaʼ yuʼun, ¿kʼusi stu mi jaʼ noʼox sventa chchamik li buchʼutik chichʼik voʼe? Yuʼun mi muʼyuk chichʼik chaʼkuxesel li buchʼutik chamemik xae, ¿kʼu yuʼun chichʼik voʼ ek sventa teuk tsakal skʼoplalik xchiʼuk li buchʼutik muʼyuk tstaik chaʼkuxesele?
30 Jaʼ yuʼun, ¿kʼu yuʼun ti chkakʼ ta vokol jkuxlejaltik skotol orae chaʼa?
31 Ermanoetik, ta skoj ti ximuyubaj* ta atojolalike, ti jaʼoxuk yajtsʼaklom Kristo Jesus ti jaʼ Kajvaltike, ta melel jutuk xa muʼyuk xicham jujun kʼakʼal.
32 Mi jpasoj kʼop xchiʼuk jtiʼaval chonbolometik ta Efeso jech kʼuchaʼal tspas li yantike, ¿mi oy van sbalil ti jech la jpase? Mi muʼyuk chichʼik chaʼkuxesel li animaetike, «veʼkutik, uchʼbolajkutik, yuʼun chijcham okʼom».
33 Mu me xavakʼ abaik ta loʼlael. Tsokes jlekil talelaltik li xchiʼinel chopol krixchanoetike.
34 Taluk xa achʼulelik sventa xapasik li kʼusi tukʼe xchiʼuk mu xa xapasilanik li mulile, yuʼun mu xojtikinik Dios li yantike. Jaʼ sventa chkakʼoxuk ta kʼexlal ti jech chkalboxuke.
35 Jaʼ yuʼun, oy van buchʼu xuʼ xi chale: «¿Kʼu yelan chichʼ chaʼkuxesel li animaetike? Jech, ¿kʼu van yelan sbekʼtal chtalik?».
36 ¡Bol* vinik! Mi muʼyuk baʼyel chcham li kʼusi chatsʼune, mu stakʼ xkuxi yan velta;
37 li voʼote muʼyuk chatsʼun li kʼusi chʼiem xae, jaʼ chatsʼun li sbekʼ tsʼunobile, manchuk mi sbekʼ trigo o yantik sbekʼ tsʼunobil.
38 Pe laj yakʼ chʼiuk Dios jech kʼuchaʼal lek laj yile, vaʼun chchʼi li jujupʼej sbekʼ tsʼunobile, pe jelel xa li kʼusi chchʼi tale, maʼuk xa li sbekʼ tsʼunobile.
39 Maʼuk noʼox jtos bekʼtalil oy, yuʼun jtos-o li sbekʼtal krixchanoetike, jtos-o li sbekʼtal vakaxe, jtos-o li sbekʼtal mutetike xchiʼuk jtos-o li sbekʼtal choyetike.
40 Oy kʼusitik ta vinajel xchiʼuk oy kʼusitik ta balumil; jtos-o slekilal li kʼusitik ta vinajele xchiʼuk jtos-o slekilal li kʼusitik ta balumile.
41 Jtos-o slekilal li Kʼakʼale, jtos-o slekilal li Ue, jtos-o slekilal li kʼanaletike; jech xtok, jelel slekilalik ta jujupʼej ek li kʼanaletike.
42 Jaʼ jech ta sventa li chaʼkuxesel eke. Li bekʼtalil ti chchame chkʼaʼ, pe mu snaʼ xkʼaʼ li bekʼtalil ti chichʼ chaʼkuxesele.
43 Muʼyuk ichʼbil ta mukʼ kʼalal chichʼ mukele, pe oy xa smukʼulal kʼalal chchaʼkuxie. Kʼun kʼalal chichʼ mukele, pe oy xa sjuʼel kʼalal chchaʼkuxie.
44 Bekʼtalil kʼalal chichʼ mukele, kʼalal chchaʼkuxi tale jaʼ xa kuxlejal ta vinajel. Mi oy bekʼtalile, oy xtok li kuxlejal ta vinajele.
45 Jaʼ yuʼun xi tsʼibabile: «Li baʼyel vinik Adane pas ta kuxlejal». Pe li slajeb Adane kʼot ta jun j-akʼkuxlejal ta vinajel.
46 Jaʼ yuʼun, maʼuk baʼyel li kuxlejal ta vinajele. Jaʼ baʼyel li bekʼtalile, jaʼ tsʼakal li kuxlejal ta vinajele.
47 Li baʼyel vinike liʼ likem ta balumile, pasbil ta pukuk;* li xchaʼvoʼal vinike likem tal ta vinajel.
48 Li krixchanoetik ta balumile jaʼ jechik kʼuchaʼal li buchʼu pasat ta pukuk yuʼun li Diose. Li kuxlejaletik ta vinajele jaʼ jechik kʼuchaʼal li buchʼu lik talel ta vinajele.
49 Jech kʼuchaʼal kichʼojbetik slokʼol li buchʼu pasbil ta pukuke, jaʼ jech chkichʼbetik slokʼol ek li buchʼu talem ta vinajele.
50 Pe xi chkalboxuke kermanotak: mu xuʼ xuʼunin Ajvalilal yuʼun Dios li bekʼtalile xchiʼuk li chʼichʼe, jech xtok, mu xuʼ xuʼunin kʼusi mu snaʼ xkʼaʼ li kʼusi snaʼ xkʼaʼe.
51 ¡Kʼelo avilik! Chkalboxuk li kʼusi chʼul ti mukul skʼoplale: mu jkotoltikuk chijvay ta lajelal, pe jkotoltik chkichʼtik jelel
52 ta anil, jech kʼuchaʼal ta jvikʼel ta jmutsʼel noʼox jsatik, jaʼo kʼalal chichʼ tijel li slajeb okʼese. Yuʼun chnik* li okʼese, vaʼun chchaʼkuxiik tal li buchʼutik muʼyuk xa bu chkʼaʼike xchiʼuk chkichʼtik jelel li voʼotike.
53 Yuʼun li kʼusi snaʼ xkʼaʼe chkʼot jech kʼuchaʼal li kʼusi mu snaʼ xkʼaʼe, li kʼusi snaʼ xchame, chkʼot jech kʼuchaʼal li kʼusi mu snaʼ xchame.
54 Kʼalal mi mu xaʼox snaʼ xkʼaʼ li kʼusi snaʼ xkʼaʼe xchiʼuk kʼalal mi mu xaʼox snaʼ xcham li kʼusi snaʼ xchame, chkʼot ta pasel li kʼusi xi tsʼibabile: «Chichʼ bikʼel-o sbatel osil li lajelale».
55 «¿Bu oy li atsatsale lajelal? ¿Bu oy li avenenoe lajelal?»
56 Li veneno ti chakʼ lajelale jaʼ li mulile, li juʼelal sventa li mulile jaʼ li Mantale.
57 ¡Pe koliyal Dios, yuʼun jaʼ chakʼ jtsatsaltik ta stojolal li Kajvaltik Jesukristoe!
58 Jaʼ yuʼun kuni kʼanbil ermanotak, oyuk-o me kʼusi chapasik, junuk-o me avavilik, oyuk-o me ep kʼusi chapasik ta sventa li yabtel Kajvaltike, yuʼun xanaʼik ti mu me jecheʼuk li avabtelik ta stojolal Kajvaltike.
Tsʼibetik ta yok vun
^ Kʼelo glosario.
^ Pedro sbi xtok.
^ O: «ayane».
^ O: «jnoptik kʼop»; «chij-epal kʼopojutik».
^ Kʼelo glosario.
^ Kʼelo glosario.
^ O: «pʼij koʼn»; «nichim koʼonton».
^ O: «Sonso».
^ O: «polvo»; «tsʼubil lum»; «tan».
^ O: «chbakʼ».
