1 Korintios 16:1-24
16 Jaʼ yuʼun ta sventa li stsobel takʼin ta sventa li buchʼutik chʼule, xuʼ jech xapasik jech kʼuchaʼal laj kalbe li tsobobbailetik ta Galasiae.
2 Li ta sba kʼakʼal ta jujun xemanae, ta jujuntal skʼan parte xavakʼik ti kʼu yepal xuʼ avuʼunike, sventa mu xatsobik takʼin mi likʼote.
3 Pe kʼalal mi te xaʼox oyun ti bu oyoxuke, ta jtak batel ta Jerusalen jayvoʼuk viniketik ti lek laj avalbeik skʼoplal li ta akartaike sventa xichʼik batel li matanaletik laj avakʼik ta slekil avoʼontonike.
4 Pe mi persa skʼan chibat eke, chchiʼinikun batel.
5 Jaʼo chbat jkʼeloxuk mi li-echʼ xaʼox ta Masedoniae,* yuʼun chi-echʼ ta Masedonia;
6 yikʼaluk te chikom o xuʼ van te jmoj ch-echʼ kuʼuntik invierno sventa chachiʼinikun batel jtuchʼuk be ti bu chibate.
7 Yuʼun mu jkʼan ti j-echʼel be noʼox ch-echʼ jkʼeloxuke, yuʼun oy ta koʼonton te chikom jayibuk kʼakʼal mi jech tskʼan Jeovae.
8 Pe te to chikom ta Efeso kʼalal to ta Skʼinal Pentekostes;*
9 yuʼun laj kichʼ jambel jun mukʼta tiʼ na ti ch-ikʼvan batel ta spasel abtelaletike, pe oy ep buchʼutik chkontrainvanik.
10 Vaʼun mi kʼot li Timoteoe kʼelik me lek ti mu me kʼusi xiʼo kʼalal te achiʼukike, yuʼun yakal tspasbe yabtel Jeova jech kʼuchaʼal voʼone.
11 Jaʼ yuʼun, mu me buchʼu spʼaj avuʼunik. Junuk avoʼontonik xatakik talel sventa chtal ti bu oyune, yuʼun liʼ yakal ta jmalakutik xchiʼuk yan ermanoetike.
12 Ta sventa li kermanotik Apolose la jtijbe tajek yoʼonton ti akʼo xbat skʼeloxuk xchiʼuk li ermanoetike, pe muʼyuk to ta yoʼonton chbat skʼeloxuk; pe chbat onoʼox kʼalal mi xuʼ xaʼox yuʼune.
13 Vikʼiluk-o me asatik, tsotsuk-o me xchʼunel avoʼontonik, vinik me xapas abaik xchiʼuk tsotsuk me xapas abaik.
14 Ta kʼanelaluk me xapasik skotol li kʼusitike.
15 Jaʼ yuʼun chkalboxuk avaʼiik kermanotak: xanaʼik lek ti jaʼ kʼotemik ta sba sat tsʼunobil* ta Akaya* li buchʼutik te oy ta sna Estefanase xchiʼuk ti laj yakʼ ta yoʼonton chtunik ta stojolal li buchʼutik chʼule.
16 Jechuk-o me xachʼunbeik smantal ek li buchʼu jechik taje xchiʼuk li buchʼutik jmoj chkoltavanik xchiʼuk ti tsots ch-abtejike.
17 Pe ximuyubaj* ti liʼ oy li Estefanase, li Fortunatoe xchiʼuk li Akaikoe, yuʼun jaʼ kʼotem ta akʼexolik ti muʼyuk bu liʼ oyoxuke.
18 Yuʼun siket noʼox koʼonton yuʼunik xchiʼuk jech siket noʼox avoʼontonik yuʼunik ek. Jaʼ yuʼun tsakik me ta venta li viniketik taje.
19 Chabanukoxuk la chal li tsobobbailetik ta Asiae.* Li Akila, li Priska* xchiʼuk li tsobobbail te oy ta snaike, ta sjunul yoʼontonik ta sventa Kajvaltik chabanukoxuk la chalik ek.
20 Chabanukoxuk la chalboxuk ek skotol li ermanoetike. Ta chʼul tsʼutsʼeluk* me xakʼopon abaik ta jujuntal.
21 Voʼon Pabloun, chabanukoxuk, voʼon la jtsʼiba ta jkʼob jtuk ti jech chkalboxuke.
22 Akʼo kʼotuk ta kʼaʼ krixchano li buchʼu mu skʼan Kajvaltike. ¡O Kajvalkutik, laʼ me!
23 Teuk oy ta atojolalik li slekil yutsil yoʼonton Kajvaltik Jesuse.
24 Teuk oy ta atojolalik li kʼanelal kuʼune xchiʼuk li kʼanelal yuʼun Kristo Jesuse.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «pʼij koʼn»; «nichim koʼonton».
^ Kʼelo glosario.
^ Prisila sbi xtok.
^ O: «butsʼeluk»; «tsʼutsʼuneluk».
