1 Korintios 4:1-21
4 Akʼo yakʼik venta ti jaʼ yajtunelunkutik Kristo li jun krixchanoe xchiʼuk ti jaʼ ta jchabikutik li kʼusitik chʼul ti mukul skʼoplal ti jaʼ yuʼun li Diose.
2 Skʼan akʼo tukʼ xakʼ sbaik li jchabivanejetik* taje.
3 Li voʼone mu masuk tsots skʼoplal chkaʼi mi voʼoxuk chakʼelbeikun jkʼoplale o mi jaʼ tskʼelbun jkʼoplal li chapanobbail yuʼun krixchanoe. Ta melel, mi jaʼuk bu ta jkʼel jkʼoplal jtuk ek.
4 Yuʼun muʼyuk kʼusi chopol chalbun li jol koʼontone. Pe taje maʼuk skʼan xal ti tukʼ xa jkʼoplale, yuʼun jaʼ tskʼelbun jkʼoplal li Jeovae.
5 Jaʼ yuʼun mu me xachapanvanik kʼalal maʼuk to yoraile, jaʼ to mi tal li Kajvaltike. Jaʼ tslokʼes stuk ta sakil osil li kʼusi oy ta ikʼal osile xchiʼuk jaʼ tsvinajes li kʼusi tskʼan tspas li oʼontonale, vaʼun ta jujuntal chichʼik kʼupil kʼoptael yuʼun li Diose.
6 Jaʼ yuʼun ermanoetik, li kʼusitik taje jaʼ jech kakʼoj ta jkuxlejalkutik xchiʼuk Apolos sventa alekilalik, sventa xachanik ta jtojolalkutik li beiltasel liʼe: «Jaʼ noʼox me xapas li kʼusitik tsʼibabile», sventa mu xatoyetuk xapas abaik tajek ti jlom xa lek chavilik xchiʼuk ti junantik xa muʼyuk lek chavilike.
7 Yuʼun ¿kʼusi jelelot-o xchiʼuk li yantike? Ta melel, ¿kʼusi oy avuʼun ti muʼyuk bu la-akʼbate? Vaʼun chaʼa, mi la-akʼbate, ¿kʼu yuʼun xatoyet xa chavaʼi aba ti xkoʼolaj kʼuchaʼal muʼyuk buchʼu yakʼojbot yilele?
8 Oy xa avuʼunik skotol, ¿mi mu jechuk? Jkʼulejoxuk xa, ¿mi mu jechuk? Likemoxuk xa ta ajvalilal ti muʼyuk te oyunkutike, ¿mi mu jechuk? Ta melel, koʼontonuk ti likemukoxuk xa ta ajvalilal kʼuchaʼal ajvalil ti jechuke, sventa jmoj xij-ajvalilaj kʼuchaʼal ajvaliletik ti jechuke.
9 Yuʼun li jtakbolunkutike, ta slajeb to laj yakʼunkutik Dios ti bu chivinajkutike, ti jech kʼuchaʼal viniketik ti akʼbilik sventa xchamike, yuʼun kʼotemunkutik kʼuchaʼal j-akʼ-elov ta teatro ta sventa li balumile, ta stojolal anjeletik* xchiʼuk ta stojolal krixchanoetik.
10 Bolunkutik* ta skoj li Kristoe, yan li voʼoxuke pʼijoxuk ta stojolal li Kristoe; kʼununkutik li voʼonkutike, yan li voʼoxuke tsotsoxuk; lek akʼoplalik li voʼoxuke, yan li voʼonkutike muʼyuk bu ichʼbilunkutik ta mukʼ.
11 Yakal-o chkaʼikutik viʼnal kʼalal to tana, chkaʼikutik takitiʼil, chʼabal lek jkʼuʼ jpokʼkutik, chkichʼkutik ilbajinel, muʼyuk jnakutik,
12 tsots chi-abtejkutik xchiʼuk ta jkʼob jtukkutik chi-abtejkutik. Chkakʼkutik bendision kʼalal chchopol loʼilajik ta jtojolalkutike; tsʼikem kuchem kuʼunkutik kʼalal tskontrainunkutike;
13 ta slekil koʼonton chitakʼavkutik kʼalal chchopol kʼoptaunkutike; kʼalal to tana jech kʼotemunkutik kʼuchaʼal kʼaʼep ta balumil, jechunkutik kʼuchaʼal li kʼusi chichʼ chʼayel batele.
14 Maʼuk sventa chkakʼoxuk ta kʼexlal ti jech ta jtsʼibaboxuk tale, yuʼun jaʼ sventa ta jpʼijubtasoxuk jech kʼuchaʼal jnichʼnab ti lek jkʼanoje.
15 Yuʼun manchuk mi oy lajunmil jchabivanej* avuʼunik ta sventa li Kristoe, ta melel muʼyuk ep li atotike; yuʼun ta stojolal Kristo Jesus kʼotemun kʼuchaʼal atotik ta sventa li lekil aʼyejetike.
16 Jaʼ yuʼun ta jkʼanboxuk vokol: chanik li kʼusi ta jpase.
17 Jaʼ yuʼun ta jtakboxuk talel li Timoteo ti jaʼ jkʼanbil nichʼone xchiʼuk ti tukʼ yakʼoj sba ta stojolal li Kajvaltike; jaʼ tsvules ta ajolik ti kʼu yelan chichanubtasvan ta sventa li Kristo Jesuse, jech kʼuchaʼal ta buyuk noʼox chichanubtasvan ta skotol li tsobobbailetike.
18 Xtoyetik tajek li yantike, yuʼun xkoʼolaj kʼuchaʼal ti muʼyuk bu chbat jkʼeloxuk yilele.
19 Pe poʼot xa skʼan xbat jkʼeloxuk mi jech tskʼan Jeovae, vaʼun te chkakʼ venta mi yichʼojbeik li sjuʼel Diose, maʼuk sventa ti kʼu yelan xtoyetik tajek ta skʼopojelike.
20 Yuʼun maʼuk te chvinaj ta skoj kʼusi chichʼ alel li Ajvalilal yuʼun Diose,* jaʼ te chvinaj ta skoj juʼelal.
21 ¿Kʼusi ti mas lek chavaʼiike? ¿Mi jaʼ ti chbat jkʼeloxuk xchiʼuk jvachʼe o mi ta kʼanelal xchiʼuk ta slekil koʼonton chibat?
Tsʼibetik ta yok vun
^ Kʼelo glosario.
^ Kʼelo glosario.
^ O: «Sonsounkutik».
^ Li jpʼel kʼop ta griego taje jaʼ skʼoplal li buchʼu vaʼanbil sventa chchabi olole.
^ Kʼelo glosario.
