1 Korintios 9:1-27
9 ¿Mi mu kolemukun? ¿Mi mu jtakbolukun? ¿Mi mu lajuk kil li Jesus ti jaʼ Kajvaltike? ¿Mi mu jaʼuk kabteloxuk ta stojolal li Kajvaltike?
2 Akʼo mi maʼuk jtakbolun ta stojolal li yantike, jtakbolun ta melel ta atojolalik, yuʼun voʼoxuk kʼotemoxuk ta seyo* ti jtakbolun ta stojolal li Kajvaltike.
3 Xi ta jpak jkʼoplal ta stojolal li buchʼutik tskʼelbeikun jkʼoplale:
4 oy jderechotik sventa chijveʼ xchiʼuk sventa oy kʼusi chkuchʼtik, ¿mi mu jechuk?
5 Oy jderechotik sventa oyuk kajniltik ti jchʼunolajeluke,* jech kʼuchaʼal li yan jtakboletike, li yermanotak Kajvaltike xchiʼuk li Sefase,* ¿mi mu jechuk?
6 ¿Mi jaʼ noʼox van xchiʼuk Bernabe ti chʼabal jderechokutik sventa chkiktakutik spasel li abtelal ti jaʼ kuxulunkutik-o yuʼune?
7 ¿Mi oy van junuk soltaro ti tsbain stuk li kʼusi chtun yuʼune? ¿Mi oy van buchʼu muʼyuk tslobe sat li tsʼusub tstsʼune? ¿Mi oy van buchʼu muʼyuk chuchʼbe yaʼlel xchuʼ chij kʼalal jaʼ chchabi li jtsop chije?
8 Maʼuk yakal chkal li kʼusitik tsnop krixchanoetike, ¿mi mu jechuk? ¿Mi mu jechuk chal Mantal* ek li kʼusitik taje?
9 Yuʼun xi tsʼibabil ta Smantal Moisese:* «Mu xavakʼbe svosal li tot vakax kʼalal yakal chpechʼilan ta tekʼel li trigoe». ¿Mi jaʼ van oy ta yoʼonton tot vakax li Diose?
10 ¿O mi jaʼ van jkʼoplaltik li kʼusi laj yale? Jaʼ jkʼoplaltik ta melel li kʼusi laj yichʼ tsʼibaele, yuʼun li buchʼu tslok osil xchiʼuk li buchʼu tsmaj trigoe skʼan spat yoʼonton ti tslajesbe sat li kʼusi stsʼunoje.
11 Mi jaʼ jtsʼunojkutik ta atojolalik li kʼusitik sventa mantale, ¿mi toj tsots van chavaʼiik ti xavakʼbunkutik li kʼusitik chtun kuʼunkutike?
12 Mi jech oy sderecho sventa xakoltaik li yan viniketike, ¿mi mu masuk van oy jderechokutik ta atojolalik li voʼonkutike? Akʼo mi jech, muʼyuk bu jtunesoj li jderechokutike, jaʼ noʼox tsʼikem kuʼunkutik li kʼusitike, sventa mu jmakutik mi jsetʼuk li lekil aʼyejetik sventa li Kristoe.
13 ¿Mi mu xanaʼik ti tslajesik kʼusitik oy ta templo li buchʼutik sbainojik li chʼul abtelale* xchiʼuk ti chichʼik kʼuk yepal li kʼusitik oy ta skajleb matanal* li buchʼutik tspasilanik li kʼusitik sbainojik ta skajleb matanale?
14 Ti kʼu yelan taje, jaʼ jech laj yal mantal xtok li Kajvaltik sventa li buchʼutik chchol lekil aʼyejetike, ti jaʼuk akʼo kuxiikuk-o li ta lekil aʼyejetike.
15 Pe li voʼone muʼyuk bu jtunesoj mi jutebuk li kʼusitik taje. Ta melel, maʼuk sventa ta jkʼan ti jechuk kʼotuk ta jtojolal li kʼusitik la jtsʼibae, ¡ti jechuke jaʼ mas lek ti xichame, jaʼ altik mi oy buchʼu tsmak ta be li kʼusitik chimuyubaj-o yuʼune!
16 Jaʼ yuʼun, mi ta jchol batel li lekil aʼyejetike maʼuk sventa xitoyet-o chkaʼi jba, yuʼun jaʼ li kʼusi jbainoje. Ta melel, ¡abol jba mi muʼyuk bu ta jchol batel li lekil aʼyejetike!
17 Oy jmoton mi ta sjunul koʼonton ta jpase; akʼo mi maʼuk ta sjunul koʼonton ta jpas, oy onoʼox kʼusi kʼubanbilun.
18 Jaʼ yuʼun chaʼa, ¿kʼusi jaʼ li jmotone? Jaʼ ti ta matanaluk chkakʼ li lekil aʼyejetik kʼalal ta jchol batel li lekil aʼyejetike, sventa mu xi-ilbajinvan ta skoj li jderecho kichʼoj ta sventa li lekil aʼyejetike.
19 Yuʼun akʼo mi kolemun ta stojolal skotol krixchanoetik, kakʼoj jba ta mosoinel yuʼun skotolik, sventa jpas ta kanal epal krixchanoetik ti bu kʼalal xuʼ kuʼune.
20 Ta skoj taje, la jpas jba kʼuchaʼal juda ta stojolal li judaetike sventa ta jpas ta kanal li judaetike; la jpas jba kʼuchaʼal ventainbilun yuʼun mantal ta stojolal li buchʼutik ventainbilik yuʼun mantale, akʼo mi muʼyuk bu sventainojun li mantale sventa ta jpas ta kanal li buchʼutik ventainbilik yuʼun mantale.
21 La jpas jba kʼuchaʼal muʼyuk ventainbilun yuʼun mantal ta stojolal li buchʼutik muʼyuk ventainbilik yuʼun mantale, akʼo mi ventainbilun yuʼun mantal li ta sat Diose xchiʼuk sventainojun li smantal Kristoe, sventa ta jpas ta kanal li buchʼutik muʼyuk ventainbil yuʼun mantale.
22 Kʼun la jpas jba ta stojolal li buchʼutik kʼunike, sventa ta jpas ta kanal li buchʼutik kʼune. La jpas jba ta kʼusiuk noʼox ta stojolal skotol li krixchanoetike, sventa akʼo xuʼ jech xkolik jayvoʼuk ta sventa li kʼusitik la jpase.
23 Ta jpas skotol ta skoj li lekil aʼyejetike, sventa xuʼ chkalbe batel li yantike.
24 ¿Mi mu xanaʼik ti ch-anilaj skotol li j-anilajeletik kʼalal oy anile, pe ti kʼajomal noʼox jun ti buchʼu tsta smotone? Anilajanik sventa xuʼ xapasik kanal li amotonike.
25 Jech xtok, skʼan snaʼ spajesel sba ta skotol kʼusitik li buchʼu ch-och ta tsalbaile. Ti jech tspasike jaʼ sventa tstaik jun korona ti snaʼ xlaje, pe li voʼotike jaʼ ta jtatik jun korona ti mu snaʼ xlaje.
26 Jaʼ yuʼun, mu altikuk noʼox ti kʼu yelan chi-anilaje; mu ikʼuk noʼox ta jmaj ti kʼu yelan chkakʼ majele;
27 ti kʼusi ta jpase, jaʼ ti ta jpas ta mantal* li jbekʼtale xchiʼuk jech chkʼot kuʼun kʼuchaʼal mosoil, sventa mu chopoluk chkʼot jkʼoplal ta stojolal Dios kʼalal mi laj xaʼox jcholbe mantal li yantike.
Tsʼibetik ta yok vun
^ Kʼelo glosario.
^ O: «ermanauke».
^ Pedro sbi xtok.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «chkakʼbe kastigo».
