1 Pedro 1:1-25
1 Voʼon Pedroun, yajtakbolun* Jesukristo, ta sventa ti voʼoxuk ti j-echʼelbeoxuke xchiʼuk ti pukemoxuk ta yosilal Ponto, Galasia, Kapadosia, Asia* xchiʼuk ta Bitinia ti voʼoxuk tʼujbiloxuk yuʼun Diose.
2 Ti stuke jaʼ li Totil ta vinajel ti la stʼujoxuk jech kʼuchaʼal li kʼusi oy ta yoʼonton tspase xchiʼuk ti la xchʼultajesoxuk ta xchʼul espiritu* ti jaʼ sventa xachʼunik mantal xchiʼuk xavichʼik vijbel li xchʼichʼel Jesukristoe:
Akʼo epajuk slekil yutsil oʼontonal* xchiʼuk jun oʼontonal ta atojolalik.
3 Muyubtabiluk li Dios ti jaʼ Stot li Kajvaltik Jesukristoe, yuʼun ta sventa ti xkʼuxubinojutik tajeke laj yakʼ lijvokʼutik* ta achʼ sventa jtatik li kuxul spatobil koʼontontik ta skoj ti chaʼkuxi* li Jesukristoe,
4 yoʼ jparteintik li kʼusi mu snaʼ xkʼaʼe, ti mu x-ikʼube xchiʼuk ti mu snaʼ xtakije. Te kʼejbil ta vinajel sventa chavuʼuninik
5 li voʼoxuk ti lek chabibiloxuk ta sjuʼel Dios ta skoj ti oy xchʼunel avoʼontonik yoʼ xataik li kolebal ti lek xa chapal sventa chichʼ akʼel ta ilel li ta slajebal xa yoraile.
6 Jaʼ yuʼun xkuxet tajek avoʼontonik,* manchuk mi oy to van kʼuk sjalil chavil avokolik ta skoj li ep ta tos prevae,
7 yuʼun mi laj xaʼox yichʼ akʼel ta preva li xchʼunel avoʼontonik ti mas ep sbalil chkʼot ti jaʼ mu sta li oro ti snaʼ xlaj manchuk mi laj yichʼ pasel ta preva ta kʼokʼe, jaʼuk sventa xavichʼik-o kʼupil kʼoptael, xavichʼik-o albel amukʼulalik xchiʼuk xavichʼik-o ichʼel ta mukʼ kʼalal tsta yorail chichʼ akʼel ta ilel li Jesukristoe.
8 Akʼanojik manchuk mi muʼyuk bu laj avilik. Avakʼoj xchʼunel avoʼontonik ta stojolal manchuk mi muʼyuk te akʼelojik, jech xtok, xkuxet tajek avoʼontonik ti mu xa xanaʼ kʼusi chavalik ta skoj ti xamuyubajik tajeke,
9 yuʼun lek achʼunojik ti chakolik ta skoj ti oy xchʼunel avoʼontonike.
10 Ta sventa li kolebal taje, li j-alkʼopetik ti laj xa onoʼox yalbeik skʼoplal li slekil yutsil oʼontonal ti voʼoxuk onoʼox chavichʼik skʼoplale, la sjakʼbeik tajek smelolal xchiʼuk la sabeik tajek lek skʼoplal.
11 Jech-o la sabeik skʼoplal kʼusi chkʼot ta pasel xchiʼuk kʼusi ora chkʼot ta pasel ta sventa Kristo* ti laj yal li chʼul espiritu ti te oy ta stojolalike, yuʼun laj xa onoʼox yalbe skʼoplal chʼul espiritu li vokoliletik tsnuptan Kristoe xchiʼuk ti chichʼ smukʼulal ta jelavele.
12 Li stukike akʼbat snaʼik ti maʼuk noʼox tunik ta sventa slekilal stukike, moʼoj, yuʼun jaʼ sventa alekilalik, li kʼusitik taje jaʼ li kʼusi la-akʼbat xa anaʼik yuʼun li buchʼutik laj yalboxuk li lekil aʼyejetik* ta sventa li chʼul espiritu ti takbil tal ta vinajele. Oy tajek ta yoʼontonik tskʼan tsnaʼik anjeletik* li kʼusitik taje.
13 Jaʼ yuʼun chaʼa, tsatsubtaso anopbenik ta sventa abtelal; tojobanik-o lek snopel; pato lek avoʼontonik ta slekil yutsil oʼontonal ti jaʼ li kʼusi chavichʼik akʼbel kʼalal chichʼ akʼel ta ilel li Jesukristoe.
14 Ta skoj ti jchʼunej mantal alab nichʼnabiloxuke, mu xa me jechuk xapasik jech kʼuchaʼal tskʼan toʼox avoʼontonik kʼalal mu toʼox xavojtikinik Diose,
15 ti kʼusi mas leke, jaʼ ti lekuk chʼul skotol atalelalik jech kʼuchaʼal ti chʼul li Buchʼu la stakoxuk ta ikʼele,
16 yuʼun xi tsʼibabile: «Skʼan me chʼulukoxuk, yuʼun chʼulun li voʼone».
17 Mi chataik ta kʼoponel li Totil ti mu tʼujbiluk noʼox yajval chchapan ta jujuntal ti kʼu yelan yabtel la spasike, xiʼanik me ta stojolal ti kʼu sjalil j-echʼelbeoxuke.
18 Yuʼun anaʼojik ti kʼalal laj avichʼik koltael lokʼel ta stojolal li kʼusi muʼyuk sbalil ta akuxlejalik ti laj yiktaboxuk komel li amoltotakik* ta voʼnee, maʼuk la skoltaoxuk lokʼel li kʼusitik snaʼ xkʼaʼe, li platae o li oroe.
19 Moʼoj, jaʼ la skoltaoxuk lokʼel li kʼupil sba chʼichʼe, jech kʼuchaʼal xchʼichʼel chʼiom chij ti chʼabal spaltail xchiʼuk ti chʼabal xchopolale, ti jaʼ xchʼichʼel li Kristoe.
20 Jaʼ melel ti laj xa onoʼox yichʼ tʼujel kʼalal muʼyuk toʼox likem tal stsʼunbal li krixchanoetike, pe laj yichʼ akʼel ta ilel ta aventaik li ta slajebal xa kʼakʼal* liʼe.
21 Jaʼ ta stojolal ti jchʼunolajeloxuk ta stojolal Diose, ti jaʼ li buchʼu la xchaʼkuxes xchiʼuk laj yakʼbe smukʼulale; sventa teuk ta stojolal Dios li xchʼunel avoʼontonik xchiʼuk li spatobil avoʼontonike.
22 Avi ti laj xa asakubtas akuxlejalik ta skoj ti la achʼunik li kʼusi melel ta sventa ti chakʼan achiʼilik ta chʼunolajel jech kʼuchaʼal skʼanoj sbaik ta jujuntal li buchʼutik xchiʼil sbaik ta vokʼel ti muʼyuk tsloʼla sbaike, ta sjunuluk me avoʼonton xakʼan abaik tajek ta jujuntal.
23 Yuʼun laj yakʼ vokʼanik ta achʼ, pe maʼuk li ta tsʼunobil ti snaʼ xkʼaʼe, moʼoj, jaʼ li ta tsʼunobil ti mu snaʼ xkʼaʼe, ti jaʼ ta sventa li skʼop kuxul Dios ti te oy-oe.
24 Yuʼun «jechik kʼuchaʼal tsʼiʼlel skotol li krixchanoetike xchiʼuk jech kʼuchaʼal xnich tsʼiʼlel li yutsil spat xokonike; mi takij li tsʼiʼlele, chpʼaj li xniche,
25 pe jaʼuk li kʼusi yaloj Jeovae* te oy-o sbatel osil». Li «kʼusi yaloj» taje jaʼ li lekil aʼyejetik ti laj avichʼik albele.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «lij-ayanutik».
^ Kʼelo glosario.
^ O: «echʼem pʼij avoʼnik»; «nichim noʼox avoʼontonik».
^ Kʼelo glosario.
^ Kʼelo glosario.
^ Kʼelo glosario.
^ O: «li kʼusi chichʼ iktael komel ti nopem xaʼiik spasele».
^ Kʼelo glosario.
^ Kʼelo glosario.
