1 Pedro 5:1-14
5 Jech oxal, ta skoj ti jchiʼil jbatik ta molale,* ti laj kil laj yil svokol li Kristoe xchiʼuk ti te jkʼoplal ek li ta mukʼulal ti chichʼ akʼel ta naʼele, xi chkalbeik mantal li buchʼutik moletik avuʼunike:
2 jechukoxuk me kʼuchaʼal jchabichij ti chachabibeik li jtsop xchij Dios ti oy ta abaike, tunanik me ta jkʼelvanejetik, mu me sujbiluk xavaʼi abaik, ta slekiluk me avoʼonton xapasik ta stojolal Dios; jech xtok mu me jaʼuk ta skoj ti chakʼanik takʼine, ti chaloʼlavanike, moʼoj, ta sjunuluk me avoʼonton xapasik;
3 mu me jpʼeluk xa xavalik ta stojolal li buchʼutik jaʼ yuʼuntak Diose, moʼoj, akʼo yilik ti lek ta chanel atalelalik li jtsop chije.
4 Vaʼun kʼalal mi laj yichʼ akʼel ta ilel li bankilal jchabichije, chavichʼik li korona sventa mukʼulal ti mu snaʼ xtakije.
5 Jaʼ jechoxuk ek kerem viniketik, akʼo me abaik ta ventainel ta stojolal li viniketik ti oy xa sjabilalike. Pe bikʼit me xavakʼ aba akotolik ta jujuntal, yuʼun kontra chil Dios li buchʼu xtoyet xa chaʼi sbaike, pe chakʼbe slekil yutsil oʼontonal li buchʼutik bikʼit chakʼ sbaike.
6 Bikʼtajeso abaik li ta sjuʼel skʼob Diose, sventa stoy akʼoplalik mi sta yoraile,
7 jech xtok akʼbeik me sbain skotol li kʼusi chavul-o avoʼontonike,* yuʼun oyoxuk ta yoʼonton.
8 ¡Oyuk-o me lek achʼulelik, vikʼiluk me lek asatik! Li avajkontraik, ti jaʼ li Diabloe,* te xjoyet kʼuchaʼal jkot leon ti x-avete, yuʼun tskʼan oy buchʼu tsbikʼ.*
9 Pe kontrainik me, lekuk me tsots li xchʼunel avoʼontonike, yuʼun anaʼojik ti jaʼ jech yakal chilik vokoliletik ek li avermanotakik ta spʼejel balumile.
10 Pe mi laj xaʼox avil avokolik kʼuk sjalile, li Dios ti jaʼ chakʼ skotol li slekil yutsil oʼontonale, ti la stakoxuk ta ikʼel ta smukʼulal sbatel osil ta skoj ti jmoj oyoxuk xchiʼuk Kristoe, jaʼ tstsutses* stuk li chanubtasel chavichʼike. Jaʼ tskoltaoxuk sventa tukʼuk-o oyoxuk, jaʼ tskoltaoxuk sventa tsotsukoxuk-o.
11 Oyuk-o me sjuʼel sbatel osil. Jechuk.
12 Ta stojolal Silvano,* ti jaʼ jun tukʼil ermano chkile, jutuk noʼox kʼusitik la jtsʼibaboxuk tal sventa ta jpat avoʼontonik xchiʼuk sventa jamal chkalboxuk ti jaʼ melel li slekil yutsil yoʼonton Diose. Tukʼuk-o me oyanik ta sventa taje.
13 Li ants* ta Babiloniae, ti jech tʼujbil kʼuchaʼal voʼoxuke, chabanukoxuk la chal, jech chal ek li jnichʼon Markose.
14 Ta tsʼutsʼeluk* me xakʼopon abaik ta jujuntal sventa xavakʼik ta ilel ti akʼanoj abaike.
Junuk me avoʼonton akotolik li buchʼutik jmoj oyoxuk xchiʼuk Kristoe.
Tsʼibetik ta yok vun
^ Kʼelo glosario.
^ O: «li avokolike».
^ Kʼelo glosario.
^ O: «tsketel bikʼ»; «chchexel bikʼ»; «bikʼbil noʼox chut».
^ O: «tslajes».
^ Silas sbi xtok.
^ Li ants taje jaʼ skʼoplal jun tsobobbail.
^ O: «butsʼeluk»; «tsʼutsʼuneluk».
