1 Tesalonisenses 1:1-10
1 Voʼon Pablo xchiʼuk Silvano* xchiʼuk Timoteo, sventa li tsobobbail* ta Tesalonika ti jmoj oyik xchiʼuk li Dios ti jaʼ Totile, xchiʼuk li Kajvaltik Jesukristoe:
Oyuk slekil yutsil oʼontonal* xchiʼuk jun oʼontonal ta atojolalik.
2 Skotol ora ta jtojbekutik ta vokol Dios kʼalal ta jpaskutik tal orasion ta atojolalik akotolike,
3 yuʼun mu xchʼay jutebuk ta jolkutik li atukʼil abtelike, li kʼusitik chapasik ta skoj ti chakʼanvanike xchiʼuk ti kuchem avuʼunik ta skoj ti apatoj avoʼontonik ta stojolal Kajvaltik Jesukristo ta yeloval li Jdiostik ti jaʼ Jtotike.
4 Ermanoetik, yuʼun jnaʼojkutik ti jaʼ la stʼujoxuk li Dios ti skʼanojoxuke,
5 yuʼun maʼuk noʼox jecheʼ loʼil kʼot li lekil aʼyejetik* ta jcholkutike, yuʼun ta juʼelal kʼot xtok, ta chʼul espiritu* xchiʼuk ti ta sjunul oʼontonal chʼunbile, jech kʼuchaʼal anaʼojik lek kʼu yelan la jpaskutik ta aventaike.
6 Jech xtok la achanik li kʼusi la jpaskutike xchiʼuk la achanbeik li Kajvaltike, yuʼun tsots tajek avokolik kʼalal la achʼamik li skʼop Diose, pe xkuxet noʼox avoʼontonik* xtok ti jaʼ chakʼ li chʼul espiritue,
7 jaʼ yuʼun lek ta chanel atalelalik laj yilik skotol li jchʼunolajeletik ta Masedonia* xchiʼuk ta Akayae.*
8 Ta melel, yuʼun maʼuk noʼox ti vinajem batel tajek skʼoplal avuʼunik ta Masedonia xchiʼuk ta Akaya li skʼop Jeovae,* yuʼun ta buyuk noʼox pukem batel skʼoplal li xchʼunel avoʼontonik ta stojolal Diose, jech oxal mu kʼusi stakʼ xkalkutik.
9 Yuʼun yakal chalik-o batel ti kʼu yelan baʼyel la jtaotkutik ta kʼoponel akotolik xchiʼuk ti kʼu yelan lik apʼajik li asantoike,* ti jaʼ lik avichʼik ta mukʼ li Diose, sventa xatunik ta smoso li jun noʼox kuxul melel Diose,
10 chalik xtok ti chamalabeik li Xnichʼon chlik talel ta vinajele, jaʼ li buchʼu la xchaʼkuxese,* jaʼ xkaltik, li Jesuse, ti jaʼ tskoltautik li ta skʼakʼal oʼontonal chtale.
Tsʼibetik ta yok vun
^ Silas sbi xtok.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «pʼij noʼox avoʼnik»; «nichim noʼox avoʼontonik».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
