1 Tesalonisenses 5:1-28
5 Jech oxal ermanoetik, ta sventa li yorail albil xa onoʼoxe mu xa persauk ti ta jtsʼibaboxuk tal jutebuke.
2 Yuʼun anaʼojik lek ti skʼakʼalil Jeovae jech chtal kʼuchaʼal chtal j-elekʼ ta akʼobaltik.
3 Kʼalal xi yakal chalik li krixchanoetike: «¡Jun koʼontontik xchiʼuk muʼyuk kʼusi chijxiʼo!», vaʼun jaʼo chtal ta anil ta stojolalik li lajelal ti chʼayal yoʼonton chtaatike, jaʼ jech kʼuchaʼal chlik xkʼuxul xchʼut jun ants kʼalal xchiʼuk yole; mi junuk buchʼu chjatav.
4 Pe li voʼoxuke ermanoetik muʼyuk oyoxuk ta ikʼal osil, sventa mu xataatik yuʼun li vaʼ kʼakʼale, jech kʼuchaʼal chtaatik li j-elekʼetike,
5 yuʼun jaʼ xnichʼnaboxuk sakil osil akotolik xchiʼuk jaʼ xnichʼnaboxuk li kʼakʼaltike. Muʼyuk oyutik ta akʼobaltik mi jaʼuk ta ikʼal osil li voʼotike.
6 Jaʼ yuʼun chaʼa, mu xa me vayemukutik-o jech kʼuchaʼal li yantike, jaʼ lek julavemukutik-o* me xchiʼuk jkʼel me jbatik lek.
7 Yuʼun ta akʼobaltik chvayik li buchʼutik chvayike xchiʼuk ta akʼobaltik yakubemik li buchʼutik chyakubike.
8 Pe li voʼotik ti yuʼunutik kʼakʼaltike jkʼel me jbatik lek, jlaptik me li xchʼunel oʼontonal xchiʼuk kʼanelal jech kʼuchaʼal li smak koʼontontike xchiʼuk jlaptik me spatobil oʼontonal sventa kolebal jech kʼuchaʼal li smak joltike;
9 yuʼun muʼyuk la stʼujutik Dios sventa xkilbetik li skʼakʼal yoʼontone, la stʼujutik sventa jtatik kolebal ta stojolal Kajvaltik Jesukristo.
10 Yuʼun cham ta jtojolaltik sventa jmoj xijkuxi xchiʼuk, akʼo mi julavemutik o mi vayemutik.*
11 Jaʼ yuʼun, jech-o xapatbe aba avoʼontonik xchiʼuk xatsatsubtasbe aba avoʼontonik ta jujuntal jech kʼuchaʼal yakal onoʼox chapasike.
12 Jaʼ yuʼun ermanoetik, ta jkʼanbotkutik vokol ti xavichʼik ta mukʼ li buchʼutik tsots ch-abtej ta atojolalike, ti oy ta sba tskʼeloxuk ta sventa Kajvaltike xchiʼuk ti tspʼijubtasoxuke;
13 jech xtok ta kʼanelaluk me xatsakik lek ta mukʼ ta skoj ti tsots ch-abtejike. Junuk me avoʼontonik ta jujuntal.
14 Xi to chkalbotkutik mantale ermanoetik: pʼijubtasik me li buchʼutik mu xichʼ smelolike, patbeik me yoʼonton li buchʼutik chat yoʼontonike, koltaik me li buchʼutik kʼunike, tsʼikbeik me skotolik.
15 Kʼelik me lek ti mu me buchʼu spakbe sbaik sutel li kʼusi chopol tspasbe sbaike; jaʼ lek jechuk-o xapasbe abaik batel li kʼusi lek ta jujuntale xchiʼuk jech xapasbeik ta stojolal li yantik eke.
16 Skotoluk me ora kuxetuk avoʼontonik.*
17 Skotoluk me ora xapasik orasion.
18 Tojik me ta vokol skotol, yuʼun jaʼ jech tskʼan yoʼonton Dios ta atojolalik ta sventa li Kristo Jesuse.
19 Mu me xatupʼbeik skʼakʼal li chʼul espiritue.
20 Mu me xapʼajik li albil kʼopetike.*
21 Jechuk-o me akʼik batel venta ta skotol li kʼusitike; tukʼ me xanapʼan abaik ta stojolal li kʼusi lek tajeke.
22 Tsʼiko me abaik ta skotol li kʼusitik toj chopole.
23 Ta skotoluk akʼo xchʼultajesoxuk stuk li Dios ti chakʼ jun oʼontonale. Voʼoxuk ti ermanooxuk ti lek skotol atalelalike, ti lek sjunul akuxlejalik xchiʼuk ti lek sjunul abekʼtalike, sakukoxuk me xchiʼuk muʼyukuk me amulik kʼalal liʼ xa oy li Kajvaltik Jesukristoe.
24 Tukʼ li buchʼu tstakoxuk ta ikʼele, xchiʼuk chkʼot onoʼox ta pasel yuʼun.
25 Ermanoetik, pasilanik-o me orasion ta jtojolalkutik.
26 Ta chʼul tsʼutsʼeluk* me xakʼoponik li ermanoetike.
27 Ta jkʼanboxuk tsots vokol ta stojolal Kajvaltik ti akʼo xichʼik kʼelbel skotol ermanoetik li karta liʼe.
28 Oyuk slekil yutsil yoʼonton Kajvaltik Jesukristo ta atojolalik.
Tsʼibetik ta yok vun
^ O: «vikʼiluk-o me jsatik».
^ O: «vayemutik ta lajelal».
^ O: «pʼijuk avoʼnik»; «nichimuk avoʼontonik».
^ Kʼelo glosario.
^ O: «butsʼeluk»; «tsʼutsʼuneluk».
