1 Timoteo 1:1-20
1 Voʼon Pabloun, yajtakbolun* Kristo* Jesus ti jaʼ ta smantal li Jkoltavanej Dios kuʼuntike xchiʼuk li Kristo Jesus ti jaʼ spatobil koʼontontike,
2 sventa Timoteo* ti jaʼ melel nichʼonil ta sventa li xchʼunel oʼontonale:
Oyuk slekil yutsil oʼontonal,* kʼuxubinel xchiʼuk jun oʼontonal ta atojolal ti jaʼ chakʼ li Dios ti jaʼ Totile xchiʼuk li Kristo Jesus ti jaʼ Kajvaltike.
3 Jech kʼuchaʼal la jtijbot avoʼonton ti akʼo te xakom ta Efeso kʼalal poʼot xaʼox xibat ta Masedoniae,* jaʼ jech ta jpas li avi xtoke, sventa xapas ta mantal junantik ti mu me yanuk kʼusi xakʼik ta chanele,
4 ti mu me xchikintaik li jecheʼ loʼiletike xchiʼuk li loʼiletik ta sventa li nitilulaletike.* Muʼyuk stu li kʼusitik taje, yuʼun muʼyuk chkoltavan ta sventa li kʼusitik chakʼ Dios ta sventa li xchʼunel oʼontonale, jaʼ noʼox oy kʼusi chlik snopbeik-o skʼoplal li loʼiletik taje.
5 Ta melel, ti kʼu yuʼun jech li mantal taje jaʼ sventa oyuk kʼanelal ti te chlik talel ta sakil oʼontonale, ta lekil jol oʼontonal xchiʼuk ta xchʼunel oʼontonal ti bu muʼyuk loʼlaele.
6 Oy junantik ti muʼyuk xa smelolal chkʼopojik ta skoj ti laj xa yiktaik li kʼusitik taje.
7 Tskʼan chkʼotik ta jchanubtasvanej ta sventa li mantale,* pe mu xaʼibeik smelolal li kʼusi chalike xchiʼuk mu xaʼibeik smelolal li kʼusi jpʼel xa chakʼik ta chanele.
8 Pe li voʼotike jnaʼojtik ti toj lek li Mantale, jaʼ noʼox venta mi lek chichʼ tunesele,
9 jnaʼojtik ti maʼuk sventa buchʼutik tukʼ ti laj yichʼ pasel li mantale, jaʼ sventa li batsʼi chopol krixchanoetike, li buchʼutik mu stakʼ pasel ta mantale, li buchʼutik toj chopolike, li jpasmuliletike, li buchʼutik muʼyuk stukʼil yoʼontonike,* li buchʼutik mu xichʼik ta mukʼ li kʼusitik chʼule,* li buchʼutik tsmil stotike, li buchʼutik tsmil smeʼike, li jmilvanejetike,
10 li jmulivajeletike,* li viniketik ti chchiʼin ta vayel viniketike, li jsekuestradoretike, li jutkʼopetike,* li buchʼutik jecheʼ chakʼ yeike xchiʼuk skotol li kʼusitik tskontrain li lekil chanubtasele
11 ti jaʼ jech kʼuchaʼal chal li yutsil lekil aʼyejetik* ti laj kichʼ kʼubanbele, ti jaʼ yuʼun li Dios ti xmuyubaje.*
12 Ta jtojbe ta vokol Kajvaltik Kristo Jesus ti laj yakʼbun juʼele, yuʼun tukʼ laj yilun kʼalal laj yakʼbun kabtele,
13 manchuk mi jchopolkʼoptavanejun toʼox, jkontrainvanejun xchiʼuk muʼyuk toʼox kʼexlal chkaʼi. Akʼo mi jech, laj kichʼ kʼuxubinel, yuʼun mu toʼox jnaʼ li kʼusi la jpase xchiʼuk chʼabal toʼox xchʼunel koʼonton.
14 Pe epaj tajek slekil yutsil yoʼonton Kajvaltik ta jtojolal, oy xchʼunel koʼonton xchiʼuk chikʼanvan ta skoj ti jaʼ yajtsʼaklomun li Kristo Jesuse.
15 Xuʼ jpat koʼontontik yuʼun li kʼusi chichʼ alel liʼe xchiʼuk sta-o ti xichʼ chʼamel leke: li Kristo Jesuse ay ta balumil sventa skolta li jpasmuliletike. Pe voʼon ti mas to jpasmulilun ta skotolike.
16 Akʼo mi jech, laj kichʼ kʼuxubinel manchuk mi voʼon mas to jpasmulilun sventa xakʼ ta ilel Kristo Jesus ti stsʼik yuʼune, ti jaʼ skʼelobil sventa li buchʼutik chakʼ xchʼunel yoʼontonik ta stojolal ta sventa li kuxlejal sbatel osile.
17 Vaʼun li Ajvalil ti oy-o sbatel osile, ti mu snaʼ xlaje, ti mu xvinaj ta kʼelel xchiʼuk ti stuk noʼox Diose, akʼo yichʼ ichʼel-o ta mukʼ xchiʼuk akʼo yichʼ albel smukʼulal sbatel osil. Jechuk.*
18 Kuni kerem Timoteo, ta jkʼubanbot li mantal liʼe, ti jech onoʼox albil skʼoplal ta albil kʼopetik* ta aventae, jechuk-o me xapas batel li lekil paskʼop ta sventa taje;
19 jechuk-o me li xchʼunel avoʼontone xchiʼuk lekuk-o me li ajol avoʼontone, yuʼun li yantike laj xa yiktaik li kʼusitik taje, jaʼ yuʼun chʼay xchʼunel yoʼontonik jech kʼuchaʼal jkot varko ti chmuk ta nabe.
20 Te kapal skʼoplalik li Imeneo xchiʼuk Alejandroe, jaʼ yuʼun kakʼojik xa ta yok skʼob Satanas* sventa xichʼik tukʼibtasel yoʼ mu chopoluk xkʼopojik.
Tsʼibetik ta yok vun
^ Kʼelo glosario.
^ Kʼelo glosario.
^ Jaʼ skʼan xal: «Li buchʼu chichʼ ta mukʼ Diose».
^ Kʼelo glosario.
^ Kʼelo glosario.
^ O: «momnichʼoniletike»; «tsʼunbalilaletike»; «tsʼakalulilaletike».
^ Kʼelo glosario.
^ O: «li buchʼutik muʼyuk tukʼil kʼanelal yuʼunike».
^ Kʼelo glosario.
^ Por·nei·a ta griego. Kʼelo glosario.
^ O: «jnopkʼopetike»; «j-epalkʼopetike».
^ Kʼelo glosario.
^ O: «pʼij yoʼne»; «nichim yoʼontone».
^ Kʼelo glosario.
^ Kʼelo glosario.
^ Kʼelo glosario.
