1 Timoteo 3:1-16
3 Tukʼ li kʼusi chichʼ alel liʼe: mi oy junuk vinik chakʼ persa sventa xkʼot ta jkʼelvaneje* jaʼ jun lekil abtelal li kʼusi oy ta yoʼonton tstae.
2 Jaʼ yuʼun skʼan lekuk skʼoplal li jkʼelvaneje, junuk noʼox yajnil, oyuk spʼisol li kʼusi nopem xaʼi spasele, oyuk lek xchʼulel, xchapetuk lek li kʼusi tspase, lekuk xchʼamvan, tojobuk ta chanubtasvanej,
3 maʼukuk jyakubel, maʼukuk jmajvanej, xtojobuk lek ta rason, maʼukuk jsaʼkʼop xchiʼuk maʼukuk batem yoʼonton ta takʼin,
4 tojobuk lek ta skʼelel li yutsʼ yalale, jchʼunej mantaluk li xnichʼnabe xchiʼuk lekuk stalelalik
5 (mi oy jun vinik ti mu xtojob ta skʼelel stuk li yutsʼ yalale, ¿kʼuxi xa onoʼox tskʼelbe li stsobobbail* Diose?),
6 maʼukuk me jun vinik ti achʼ to sjeloj xkuxlejale, yuʼun yikʼal xtoyet xa chaʼi sba xchiʼuk ti xichʼ chapanel jech kʼuchaʼal laj yichʼ chapanel li Diabloe.*
7 Jech xtok, skʼan lekuk skʼoplal ta stojolal li buchʼutik muʼyuk oyik ta tsobobbaile, sventa mu xichʼ sokesbel skʼoplal xchiʼuk ti xpʼaj ta spetsʼ li Diabloe.
8 Skʼan yijuk snopbenik li jtuneletik* eke, mu me chaʼtosuk kʼusi chalik, mu me epuk xbat ta uchʼel yuʼunik li vinoe, maʼukuk me ti tskʼan tajek tspasik kanal takʼin ta loʼlavaneje,
9 jechuk-o me xakʼ sba ta stojolal li kʼusi chʼul ti mukul skʼoplal* ta sventa li xchʼunel oʼontonale xchiʼuk sakuk* sjol yoʼonton.
10 Jech xtok, akʼo yichʼik kʼelel baʼyel mi xtojobik lek ta sventa li abtelale; vaʼun akʼo kʼotikuk ta j-abteletik ti muʼyuk tikʼbil smulike.
11 Skʼan yijuk snopbenik li antsetik eke, skʼan mu sabeik smul yantik, oyuk spʼisol li kʼusi nopem xaʼiik spasele xchiʼuk tukʼikuk me ta skotol.
12 Junuk noʼox me yajnilik li jtuneletike, kʼeluk me lek yuʼun li xnichʼnabike xchiʼuk li yutsʼ yalalike.
13 Yuʼun li viniketik ti lek tajek chtunike yakal tstaik batel ti lek skʼoplalike xchiʼuk ti lek tajek jamal chkʼopojik ta sventa li xchʼunel yoʼontonik ta stojolal li Kristo Jesuse.
14 Ta jtsʼibabot talel li kʼusitik liʼe, manchuk mi jutuk xa onoʼox skʼan xtal jkʼelot,
15 pe mi lijalij toe, jaʼ sventa xanaʼ kʼu yelan skʼan xapas aba li ta sna Diose, ti jaʼ li stsobobbail kuxul Dios ti kʼotem ta yoyal* xchiʼuk ti jaʼ yikoj li kʼusi melele.
16 Ta melel, li kʼusi chʼul ti mukul skʼoplal ta sventa li yichʼel ta mukʼ Diose* nabil ti mukʼ skʼoplale: ‹Laj yichʼ akʼel ta ojtikinel ta bekʼet, tukʼ laj yichʼ albel skʼoplal ta vinajel kʼuchaʼal jun kuxlejal, vinaj ta stojolal anjeletik,* laj yichʼ cholbel skʼoplal ta stojolal jyanlumetik, laj yichʼ chʼunel ta balumil xchiʼuk laj yichʼ chʼamel ta akʼol ta mukʼulal›.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
