1 Timoteo 4:1-16
4 Akʼo mi jech, li skʼop yakʼoj ta naʼel Diose jamal chal ti oy junantik ti chiktaik komel li xchʼunel oʼontonale, jaʼ chchikintaik li kʼusi akʼbil ta naʼel ti jaʼ noʼox chchʼayvane xchiʼuk li chanubtaseletik ti jaʼ yuʼun pukujetike,*
2 jaʼ chloʼlaatik ta sjutbil kʼop* krixchanoetik ti alubem sjol yoʼontonike, ti xkoʼolaj kʼuchaʼal chikʼbil ta kʼakʼal takʼine.
3 Chalik ti mu xuʼ xijnupune xchiʼuk chlik spasik ta mantal krixchanoetik ti mu xuʼ slajesik li veʼlil ti jaʼ spasoj Dios sventa tstojik ta vokol li buchʼutik tslajesik ti oy xchʼunel yoʼontonike xchiʼuk ti xojtikinik lek li kʼusi melele.
4 Yuʼun lek tajek skotol li spasben Diose, jaʼ yuʼun muʼyuk kʼusi chichʼ pʼajel mi chichʼ tojel ta vokol kʼalal chichʼ chʼamele,
5 yuʼun chichʼ chʼultajesel ta skʼop Dios xchiʼuk kʼalal chichʼ pasel orasion ta stojolale.
6 Kʼalal mi la atojobtas li ermanoetik ta sventa li mantal taje, lekil j-abtel chakʼot ta stojolal Kristo Jesus, ti lek chamakʼlin aba ta sventa li aʼyej ta sventa xchʼunel koʼontontike xchiʼuk li ta lekil chanubtaseletik ti avakʼoj onoʼox ta avoʼonton spasel leke.
7 Pe pʼajo me li jecheʼ loʼiletik ti maʼuk chakʼ ta ichʼel ta mukʼ Dios jech kʼuchaʼal chloʼilajik li meʼeletike. Li kʼusi xuʼ xapase, chapano aba xchiʼuk akʼo ta avoʼonton stael ti chakʼan chavakʼ ta ilel ti chavichʼ ta mukʼ Diose.*
8 Yuʼun jutuk sbalil kʼalal ta jpastik ejersisioe, pe li yichʼel ta mukʼ Diose jaʼ oy sbalil ta skotol li kʼusitike, yuʼun te tsakal li kʼusi albil skʼoplal ta sventa li kuxlejal avie xchiʼuk ta sventa li kuxlejal chtal ta tsʼakale.
9 Xuʼ jpat koʼontontik yuʼun li kʼusi albil skʼoplale xchiʼuk sta-o ti jchʼamtik skotole.
10 Jaʼ ta skoj ti tsots yakal chij-abtej-oe, ti kakʼojbetik-o yipale, yuʼun jpatoj koʼontontik ta stojolal jun kuxul Dios ti jaʼ Jkoltavanej yuʼun skotol krixchanoetike, pe jaʼ mas to tskolta li buchʼutik tukʼike.
11 Jech alo-o batel li mantaletik taje xchiʼuk jech xavakʼ-o batel ta chanel.
12 Mu xavakʼ buchʼu spʼaj jsetʼuk li akeremale. Moʼoj, lekuk ta chanel atalelal chilik li buchʼutik tukʼike, akʼo ta ilel ta akʼopojel, ta sventa ti kʼu yelan chapas abae, ta sventa ti chakʼanvane, ta sventa li xchʼunel avoʼontone xchiʼuk ta sventa ti muʼyuk avikʼobale.
13 Yoʼ to mu xikʼote, akʼo-o me ta avoʼonton li skʼelel chʼul tsʼibetik ta stojolal krixchanoetike, akʼo-o me ta avoʼonton li tojobtasvaneje xchiʼuk li chanubtasvaneje.
14 Kʼelo me lek li matanal oy ta atojolale, ti laj avichʼ akʼbel ta jun albil kʼop kʼalal laj yakʼ skʼob ta atojolal li jtsop moletike.*
15 Nopbo skʼoplal li kʼusitik taje; akʼo me tajek ta avoʼonton sventa lek jamal xil skotol krixchanoetik ti lek chbat avuʼune.
16 Jechuk-o me xakʼel aba atuk xchiʼuk ta sventa li kʼusi chavakʼ ta chanele. Jechuk-o me xapas batel li kʼusitik taje, yuʼun mi jech chapase ta me xakol xchiʼuk ta me xkolik ek li buchʼutik chchikintabote.
Tsʼibetik ta yok vun
^ Kʼelo glosario.
^ O: «snopbil kʼop»; «yepal kʼop».
^ Kʼelo glosario.
^ Kʼelo glosario.
