1 Timoteo 5:1-25
5 Mu me xa tsatsal ut li jun vinik ti mol xae. Moʼoj, jaʼ lek jechuk xakʼanbe vokol jech kʼuchaʼal atot, li kerem viniketike jechuk xakʼanbe vokol jech kʼuchaʼal abankil avitsʼin,
2 li antsetik ti mas xa oy sjabilalike jechuk xakʼanbe vokol jech kʼuchaʼal ameʼ, li tsebal antsetike jechuk xakʼanbe vokol jech kʼuchaʼal avix avixlel, sakuk atalelal.
3 Ichʼo me ta mukʼ li meʼon antsetik ti meʼonik ta melele.*
4 Pe mi oy jun meʼon ants ti oy yalab xchiʼuk smamobtake,* li buchʼutik taje akʼo xchanik baʼyel lek yichʼel ta mukʼ Dios* ta sna stukik xchiʼuk akʼo stojbe stot smeʼik xchiʼuk smukʼtot syayaik* li kʼusi sta-oe, yuʼun jech lek chil li Diose.
5 Jaʼ yuʼun, li ants ti meʼon ta melele xchiʼuk ti muʼyuk xa kʼusi oy yuʼune, spatoj yoʼonton ta stojolal Dios xchiʼuk tskʼanilanbe vokol xchiʼuk tspas orasion ta kʼakʼal-akʼobal.
6 Pe li buchʼu jaʼ noʼox tspas li kʼusi kʼupil chaʼi sbekʼtale, chamem xa manchuk mi kuxul to.
7 Jaʼ yuʼun jech-o me xaval batel li mantal taje, sventa mu chopoluk skʼoplalik.
8 Ta melel, mi oy buchʼu mu xakʼbe kʼusi chtun yuʼun li buchʼutik oy ta sba skʼelele, mas to li buchʼutik te oyik ta snae, laj xa spʼaj li xchʼunel oʼontonale, mas to me chopol chkʼot, jaʼ mu sta li buchʼu chʼabal xchʼunel yoʼontone.
9 Xuʼ xichʼ tsakbel sbi ta lista li meʼon ants mi mas xa ta 60 sjabilal xchiʼuk mi jun noʼox smalale,
10 xchiʼuk mi lek ojtikinbil ta sventa li kʼusitik lek tspase: mi la stsʼites yalab, mi lek chʼamvan, mi la spokbe yok li buchʼutik chʼule, mi la skolta li buchʼutik chil svokolike xchiʼuk mi laj yakʼ ta yoʼonton spasel li lekil abtelale.
11 Jech xtok, mu me xatsakbeik sbi ta lista li tsebal meʼon antsetike, yuʼun jaʼ chmakatik ta be sventa Kristo kʼalal oy ta yoʼontonik li chiʼinejbail ta vayele, yuʼun tskʼan to chnupunik.
12 Tstaik chapanel, yuʼun laj xa yiktaik li kʼusi baʼyel laj yakʼ yeik ta sventa li xchʼunel oʼontonale.
13 Jech xtok, muʼyuk noʼox kʼusi stakʼ pasel chaʼiik, jaʼ noʼox xtal xbatik ta jujupʼej na; jech, maʼuk noʼox ti muʼyuk kʼusi stakʼ pasel chaʼiike, yuʼun chloʼiltavanik, te tstikʼ sbaik ti bu mu jaʼuk ta sventaike xchiʼuk jaʼ noʼox chalbeik skʼoplal li kʼusi mu sventaikuk-oe.
14 Jaʼ yuʼun oy ta koʼonton ti akʼo nupunikuk li tsebal meʼon antsetike, akʼo yil yalabik, akʼo tojobikuk ta skʼelel snaik sventa mu xlabanvanik jsetʼuk li jkontrainvanejetike.
15 Yuʼun li yantike laj xa yichʼik chʼakel lokʼel sventa stsʼakliik li Satanase.
16 Mi oy jun jchʼunolajel ants ti oy yutsʼ yalal ti meʼon antsetike, akʼo skolta sventa mu jaʼuk sbain li tsobobbaile. Vaʼun li tsobobbaile jaʼ xuʼ skolta li buchʼutik meʼon antsetik ta melele.
17 Akʼo me ichʼbilikuk lek ta mukʼ li moletik ti jaʼ oy ta sbaik chkʼelvanik leke, pe jaʼ mas to li buchʼutik tsots ch-abtejik ta skʼopojelik xchiʼuk ti chchanubtasvanike.
18 Yuʼun xi chal li tsʼibe: «Mu xavakʼbe svosal li tot vakax kʼalal yakal chpechʼilan ta tekʼel li trigoe»; xi chal xtoke: «Sta-o xichʼ stojol li j-abtel vinike».
19 Mu me xachʼun kʼalal chichʼ tikʼbel smul li jun mole, jaʼ to me xachʼun mi oy chaʼvoʼ o oxvoʼuk testigoe.
20 Sventa xpʼijubik li yantike* albo mantal ta sat krixchanoetik li buchʼutik tspasilanik mulile.
21 Tsots chkalbot ta stojolal Dios xchiʼuk ta stojolal Kristo Jesus xchiʼuk ta stojolal tʼujbil anjeletik ti xakʼel lek li mantaletike, mu me baʼyeluk oy kʼusi chopol xanop xchiʼuk mu me tʼujbiluk xavut.
22 Mu me xavakʼ akʼob* ta anil ta stojolal jun vinik,* mu me teuk kapal akʼoplal li ta smul yantike; muʼyukuk-o me avikʼobal.
23 Mu xa xavuchʼ li stuk noʼox voʼe, jaʼ lek uchʼan jutebuk vino ta sventa li achʼute xchiʼuk ta skoj ti nopajtik noʼox cha-ipaje.
24 Lek jamal xvinaj li smul junantik viniketike xchiʼuk tukʼ ch-ikʼvan batel ta chapanel, pe li smul yan viniketike ta mas to tsʼakal chvinaj.
25 Jech xtok, jaʼ jech lek xvinaj li lekil abtelal eke, mu teuk onoʼox nakʼal chkom-o li kʼusi mu lekuke.
Tsʼibetik ta yok vun
^ Jaʼ xkaltik, meʼon antsetik ti oy kʼusi chtun yuʼunike pe ti muʼyuk buchʼu xuʼ xkoltaatike.
^ O: «smomtake»; «smamabtake»; «syel alabtake»; «skia alabtake».
^ Kʼelo glosario.
^ O: «smukʼtot smukʼtameʼik»; «statamolik smeʼmbelik».
^ O: «Sventa xiʼik li yantike».
^ Kʼelo glosario.
^ Jaʼ xkaltik, mu me ta aniluk xabiiltas li viniketike.
