2 Korintios 10:1-18
10 Jaʼ yuʼun ti voʼon Pabloune, ta jkʼanboxuk vokol ta skoj xmanxoal xchiʼuk slekil yoʼonton Kristo, voʼon ti bikʼit chkakʼ jba kʼalal te jkʼelojbe jba jsatike, pe ti tsots koʼonton kʼalal nom oyune.
2 Ta jkʼan vokol ti kʼalal te oyun ta atojolalike, mu jkʼan tsots koʼonton chkakʼ jba xchiʼuk mu jkʼan chkakʼ tsots mantal ta stojolal li buchʼutik chalik ti jech ta jnopkutik jech kʼuchaʼal tsnop li krixchanoetike.
3 Akʼo mi jech kuxulunkutik jech kʼuchaʼal li krixchanoetike, maʼuk jech ta jpaskutik kʼop jech kʼuchaʼal li kʼusi tsnop krixchanoetike.
4 Yuʼun li abtejebaletik ta jpaskutik-o kʼope maʼuk sventa bekʼet, yuʼun jaʼ tsatsal abtejebaletik ti jaʼ yakʼojbunkutik Dios sventa tslilin li kʼusitik tsots yibeltake.
5 Yuʼun yakal ta jlilinkutik rasonetik xchiʼuk kʼusitik chmakvan ti skontrainoj li yojtikinobil Diose; xchiʼuk ta jchukutik skotol nopbenal sventa chchʼunbe smantal li Kristoe;
6 jech xtok, chapalunkutik sventa chkakʼbekutik kastigo li buchʼu mu xchʼunik mantale, pe jaʼo chichʼ pasel kʼalal mi laj xaʼox achʼunik skotol li mantaletike.
7 Ta spat xokon noʼox chakʼelbeik sbalil li kʼusitike. Mi oy buchʼu spatoj lek yoʼonton ti uʼuninbil yuʼun Kristoe, akʼo snopbe lek smelolal yan velta li kʼusi liʼe: jech kʼuchaʼal uʼuninbil yuʼun Kristoe, jech uʼuninbilunkutik ek.
8 Xkaltik noʼox ti xitoyet xa chkaʼi jba jutuk ta skoj li kabtelkutik yakʼoj Kajvaltik sventa chavichʼik tsatsubtasel ti maʼuk sventa chavichʼik jinesele, muʼyuk bu ta kʼexlal chikom.
9 Yuʼun mu jkʼan ti ta jsibtasoxuk yilel li ta jkartatake.
10 Yuʼun xi chalike: «Oy lek sbalil xchiʼuk oy lek yip li skartatake, pe kʼun noʼox xvinaj xchiʼuk muʼyuk sbalil skʼopojel kʼalal liʼ jkʼelojbetik sate».
11 Li buchʼutik jech taje, akʼo snopbe skʼoplal li kʼusi liʼe, li kʼusi chkal ta jkartakutik kʼalal nom oyunkutike jaʼ jech ta jpaskutik xtok ti kʼalal te oyunkutike.
12 Yuʼun li voʼonkutike mu jkʼan jechunkutik jech kʼuchaʼal junantik ti tstoy sbaike xchiʼuk muʼyuk ta jkoʼoltas jbakutik xchiʼukik ti jaʼ noʼox lek chalbe sba skʼoplal stukike. Pe kʼalal jaʼ noʼox jech tskʼel sba jech kʼuchaʼal tsnop stukike xchiʼuk kʼalal jaʼ noʼox tskoʼoltas sba stukike, muʼyuk kʼusi chaʼibeik smelolal.
13 Li voʼonkutike ximuyubajkutik,* pe jaʼ noʼox ti bu kʼalal smakoj li kabtel akʼbilunkutike, yuʼun jaʼ noʼox ti bu kʼalal xchʼakojbunkutik Dios ti bu smakoj ta sventa li kabtelkutike, ti te to kʼot ta atojolalike.
14 Ta melel jaʼ noʼox ta jpas kabtelkutik ti bu kʼalal smakoje, akʼo mi mu xa xikʼotkutik ta atojolalik yilel, pe voʼonkutik baʼyel likʼotkutik ta atojolalik sventa li lekil aʼyejetik ta sventa li Kristoe.
15 Jaʼ ximuyubajkutik-o li kʼusitik yakal ta jpaskutike, maʼuk li kʼusitik yakal tspas yantike. Oy ta koʼontonkutik ti akʼo chʼiuk batel mas li xchʼunel avoʼontonike sventa mas chatsakik ta mukʼ li kabtelkutik jpasojkutike. Taje jaʼ sventa ta jpaskutik-o batel mas li kabtelkutike,
16 sventa jcholbekutik lekil aʼyejetik li lumetik ti mas to nom xkom ti bu oyoxuke, yoʼ maʼuk ximuyubajkutik yuʼun li kʼusitik tspas yantik ti bu lek xa onoʼox laj yabtelanike.
17 «Akʼo mukʼuk skʼoplal ta stojolal Jeova li buchʼu tskʼan mukʼ skʼoplale.»
18 Maʼuk lek ilbil li buchʼu lek chalbe sba skʼoplal stuke, jaʼ lek ilbil li buchʼu lek ch-albat skʼoplal yuʼun Jeovae.
Tsʼibetik ta yok vun
^ O: «pʼij koʼnkutik»; «nichim koʼontonkutik».
