2 Korintios 11:1-33
11 Ta jkʼan ti akʼo xatsʼikbeikun ti muʼyuk bu lek chirasonaje. ¡Pe ta melel, yakal xa onoʼox chatsʼikbeikun!
2 Yuʼun oyoxuk ta koʼonton jech kʼuchaʼal oyoxuk ta yoʼonton li Diose, yuʼun laj kakʼ ke ti chkakʼ nupunanik xchiʼuk jun noʼox vinik jech kʼuchaʼal jun tojol tseb sventa muʼyukuk avikʼobalik chkakʼoxuk ta stojolal li Kristoe.
3 Pe chixiʼ ti jech xavichʼik loʼlael jech kʼuchaʼal manya loʼlaat yuʼun chon* li Evae, ti sokes anopbenike, ti muʼyuk xa tukʼ chavakʼ abaike xchiʼuk ti x-ayan avikʼobalik ti mu sta-o jech li Kristoe.
4 Ta skoj ti kʼusitik yakal chkʼot ta pasele, mi oy buchʼu chtal xcholboxuk skʼoplal Jesus ti mu jechuk kʼuchaʼal ta jcholkutike, o mi cha-albatik yan nopbenal ti mu jechuk kʼuchaʼal achʼamojike o mi chcholboxuk yan lekil aʼyejetik ti mu jechuk kʼuchaʼal achʼamojike, ta anil chachʼamik.
5 Yuʼun ta skotol li kʼusitike muʼyuk bu bikʼit jkʼoplal likʼot yuʼunik li pʼijil jtakboletik avuʼunike.
6 Yuʼun manchuk mi mu xitojob ta kʼopojel, oy lek yojtikinobil kuʼun; ta melel jamal chavichʼik albel kuʼunkutik ta skotol xchiʼuk ta kʼusiuk noʼox.
7 ¿Mi yuʼun van la jpas jmul ti la jbikʼtajes jba sventa xavichʼik toybel akʼoplalik ta skoj ti ta moton la jcholboxuk ta sjunul koʼonton li lekil aʼyejetik yuʼun Diose?
8 Laj yil svokolik kuʼun* li yan tsobobbailetik kʼalal la jchʼambeik li matanaletik* laj yakʼik ti voʼoxuk laj kakʼboxuke;
9 akʼo mi jech, muʼyuk buchʼu laj kakʼbe yikats kʼalal oy kʼusi tun kuʼun kʼalal te oyun ta atojolalike, yuʼun ep laj yakʼbeikun kʼusitik chtun kuʼun li ermanoetik ti likemik tal ta Masedoniae. Ta melel, laj onoʼox jkʼel jba sventa mu xkakʼ avikatsik xchiʼuk jech ta jpas-o batel.
10 Jech kʼuchaʼal ti oy ta jtojolal li kʼusi melel ta sventa Kristoe, jaʼ jech ximuyubaj-o* ta stojolal li buchʼutik te oyik ta yosilal Akayae.
11 ¿Kʼu yuʼun jech la jpas taje? ¿Mi yuʼun van muʼyuk jkʼanojoxuk? Snaʼoj Dios ti jkʼanojoxuke.
12 Pe oy junantik ti xtoyet xa chaʼi sbaike xchiʼuk chalik ti jaʼik la jtakboletik jech kʼuchaʼal voʼonkutike. Jaʼ yuʼun, jech ta jpas-o batel li kʼusi onoʼox ta jpase sventa muʼyukuk srasonal yuʼunik ti xtoyet chaʼi sbaike.
13 Yuʼun jecheʼ jtakboletik li viniketik taje, jloʼlavanej j-abteletik, ti tspʼis sbaik ta yajtakboltak Kristoe.
14 Pe mu labaluk sba taje, yuʼun li Satanas eke jech-o tspʼis sba ta jun anjel* ti xojobaj noʼoxe.
15 Jaʼ yuʼun, muʼyuk labal sba ti tspʼis sbaik ta tukʼil jtuneletik li yaj-abteltak eke. Jech oxal, ti kʼu yelan tspasike jaʼ jech chichʼ slajebik.
16 Xi chkalboxuk yan veltae: Mu me buchʼu snop ti bolune.* Pe mi jech chanopike jech xachʼamikun kʼuchaʼal jun krixchano ti bole, sventa xitoyet xa chkaʼi jba jutukuk ek.
17 Li kʼusi chkale maʼuk jech ta jpas jech kʼuchaʼal tspas li Kajvaltike, yuʼun kʼajomal jaʼ jech ta jpas jech kʼuchaʼal jun krixchano ti mu snaʼ xrasonaje, ti xtoyet xa tajek chaʼi sba ta skoj ti spatoj yoʼonton ta stojolal stuke.
18 Ta skoj ti oy ep buchʼu xtoyet xa chaʼi sbaik jech kʼuchaʼal tspas li krixchanoetike jech ta jkʼan xitoyet xa chkaʼi jba ek.
19 Ta skoj ti lek xanaʼ xarasonajik yilele, ta sjunul avoʼonton chatsʼikbeik li buchʼutik mu snaʼ xrasonajike.
20 Melel onoʼox, stsʼikbe avuʼunik li buchʼu tsmosoinoxuke, li buchʼu chilbajinoxuk ta sventa li kʼusitik oy avuʼunike, li buchʼu tspojboxuk li kʼusitik oy avuʼunike, li buchʼu xtoyet xa chaʼi sba ta atojolalike xchiʼuk li buchʼu tsyayijes asatike.
21 Jaʼ sventa muʼyuk ichʼbil ta mukʼ chikʼotkutik ti vaʼ yelan chkalboxuke, yuʼun xkoʼolaj kʼuchaʼal kʼun kakʼoj jbakutik yilel.
Pe mi oy buchʼu mu xkʼexav ti kʼu yelan tspas sbae —muʼyuk jrason ti kʼu yelan chikʼopoje— jech muʼyuk chikʼexav ti kʼu yelan ta jpas jba eke.
22 ¿Mi j-evreoetik?* J-evreoun ek. ¿Mi j-israeletik? J-israelun ek. ¿Mi snitilulalik* Abraan? Snitilulalun Abraan ek.
23 ¿Mi yajtuneltak Kristo? Jaʼ jech ta jtakʼ jech kʼuchaʼal li buchʼu likem xchuvaje: jtuk noʼox ti voʼon mas x-echʼ to jkʼoplale, mas abtejemun, mas nopolik noʼox kichʼoj tikʼel ta chukel, mu xa noʼox stakʼ chapel ti jayib velta tsots laj kichʼ majele xchiʼuk ep kʼusitik laj kil ti jutuk xa mu licham yuʼune.
24 Voʼob to velta laj kichʼ majel yuʼun li judaetike,* 39 ta moj laj kichʼ jujun velta,
25 oxib velta laj kichʼ jisbel vachʼ, jun velta li-akʼbat ton, oxib velta laj kil jvokol ta varko ta skoj ti lilije, jun akʼobal xchiʼuk jun kʼakʼal te xikajet ta oʼlol nab;
26 nopolik noʼox lixanav, kiloj xiʼel ta ukʼum, jnuptanoj j-elekʼetik, kiloj vokol ta stojolal li buchʼutik jmoj jtsʼunbalkutike, kiloj xiʼel ta stojolal jyanlumetik, kiloj xiʼel ta jteklum, kiloj xiʼel ta takixokol balumil, kiloj xiʼel ta nab, kiloj xiʼel ta stojolal li buchʼutik ermanoetik ta alele,
27 li-abtej xchiʼuk tsots laj kakʼ jvokol, nopolik noʼox la jtsʼik vayel jayibuk akʼobal, laj kil viʼnal xchiʼuk takitiʼil, nopolik noʼox chʼabal jveʼel, la jtsʼik sik xchiʼuk chʼabal lek jkʼuʼ jpokʼ.
28 Yuʼun maʼuk noʼox ta skoj li kʼusitik taje, yuʼun jujun kʼakʼal ta jvul koʼonton ta stojolal skotol li tsobobbailetik xtoke.
29 ¿Buchʼu ti kʼune? ¿Mi mu kʼunukun ek chaʼa? ¿Buchʼu ti tsmak yoke? ¿Mi mu chi-ilinuk chaʼa?
30 Mi ta jkʼan xitoyet xa chkaʼi jbae, jaʼ toyetkun yuʼun li kʼusitik chakʼ ta ilel ti kʼunune.
31 Li Dios ti jaʼ Stot li Kajvaltik Jesuse, li Buchʼu chichʼ muyubtael sbatel osile, snaʼoj ti muʼyuk yakal ta jut kʼope.*
32 Li ta Damaskoe, li ajvalil ti jaʼ ventainbil yuʼun li ajvalil Aretase laj yakʼ ta chabiel jteklum sventa xchukikun,
33 pe laj kichʼ jokʼanel yalel ta moch ta sventanail spat muro li ta jteklume, vaʼun jaʼ jech likol lokʼel ta skʼobik.
Tsʼibetik ta yok vun
^ O: «kiletel chon».
^ S.gr.: «li-elkʼaj».
^ O: «koltael».
^ O: «pʼij-o koʼn»; «nichim-o koʼonton».
^ Kʼelo glosario.
^ O: «sonsoune».
^ Kʼelo glosario.
^ O: «smomnichʼnabik»; «stsʼunbalik»; «stsʼakalulik».
^ Kʼelo glosario.
^ O: «jnop kʼope»; «chi-epal kʼopoje».
