2 Korintios 12:1-21
-
Kʼusitik laj yil Pablo (1-7 sbavokʼal)
-
Chʼix ta sbekʼtal Pablo (7 xchaʼvokʼal kʼalal ta 10)
-
Muʼyuk bikʼit skʼoplal kʼot ta stojolal li pʼijil jtakboletik li Pabloe (11-13)
-
Oy ta yoʼonton jkorintoetik li Pabloe (14-21)
12 Skʼan xitoyet xa chkaʼi jba. Muʼyuk kʼusi sbalil; pe jaʼ chlik kalbe skʼoplal li kʼusi ilbil* ta skʼelobil juʼelale* xchiʼuk li aʼyejetik yuʼun Kajvaltike.
2 Xkojtikin jun vinik ti jmoj oy xchiʼuk Kristo ti oy xa ta chanlajuneb jabil ikʼat batel kʼalal to ta yoxkojal vinajele —mu jnaʼ mi ta sbekʼtal o mi maʼuk ta sbekʼtal; jaʼ noʼox Dios snaʼoj—.
3 Jech, xkojtikin li vinik taje —mu jnaʼ mi ta sbekʼtal o mi maʼuk ta sbekʼtal, jaʼ noʼox Dios snaʼoj—
4 ti laj yichʼ ikʼel batel ta paraiso* xchiʼuk laj yaʼi kʼopetik ti mu x-al yuʼun xchiʼuk ti mu stakʼ xal li krixchanoetike.
5 Xitoyet xa chkaʼi jba yuʼun li vinik taje, pe muʼyuk bu xitoyet xa chkaʼi jba ta jtojolal jtuk, jaʼ noʼox xitoyet xa chkaʼi jba ta skoj ti kʼunune.
6 Pe maʼuk skʼan xal ti bolun* ti xitoyetuk xa chkaʼi jba xtoke, yuʼun melel onoʼox li kʼusi chkale. Pe ta jtsʼik jba* ta spasel sventa mu stoy tajek jkʼoplal ta skoj li kʼusi chil xchiʼuk li kʼusi chaʼi ta jtojolale,
7 ti jaʼ noʼox ta skoj li kʼusi laj kichʼ akʼbel kil ti toj echʼ xa noʼox labalik sbae.
Sventa mu toj echʼemuk xitoyet xa chkaʼi jbae, laj kichʼ akʼbel chʼix ta jbekʼtal, jun yaj-anjel Satanas la syayijesun-o sventa mu toj echʼemuk xitoyet xa chkaʼi jba.
8 Oxib velta la jkʼanbe vokol Kajvaltik ti akʼo lokʼuk ta jtojolal li kʼusi taje.
9 Pe xi laj yalbune: «Lek xa-o li slekil yutsil koʼonton ta atojolale; yuʼun lek xa tsʼakal ta atojolalik li juʼel kʼalal kʼunoxuke». Mas to ximuyubaj* ti xitoyet xa chkaʼi jba ta skoj ti kʼunune, sventa jech teuk oy-o ta jtojolal kʼuchaʼal karpana li sjuʼel Kristoe.
10 Jech oxal chaʼa, jaʼ ximuyubaj-o kʼalal kʼunune, kʼalal chkichʼ ilbajinele, kʼalal jaʼo oy kʼusi chtun kuʼune, kʼalal jaʼo chkichʼ kontrainele xchiʼuk kʼalal jaʼo oy jvokol ta sventa Kristoe. Yuʼun jaʼo tsotsun kʼalal kʼunune.
11 Jech jpasoj jba jech kʼuchaʼal jun bol vinik. Voʼoxuk la asujikun ti jech la jpas jba taje, yuʼun lek laj avalik jkʼoplal ti jechuke. Jech xtok, ta skotol li kʼusitike muʼyuk bu bikʼit jkʼoplal likʼot yuʼunik li pʼijil jtakboletik avuʼunike, akʼo mi mu kʼusi xitun-o.
12 Ta melel, vinaj ta atojolalik ti jtakbolune, ti tsʼikem lek kuʼune, la jpas senyailtak,* la jpas kʼusitik labal sba xchiʼuk la jpas tsatsal skʼelobiltak juʼelal.
13 Jaʼ yuʼun, ¿kʼuxi ti voʼoxuk mas jutuk la ataik matanal ti jaʼ mas la staik li yan tsobobbailetike? Jaʼ ta skoj ti muʼyuk bu likʼot jech kʼuchaʼal ikatsil ta atojolalike. Akʼbeikun perton ta slekil avoʼontonik ti jech la jpase.
14 ¡Kʼelo avilik! Jaʼ xa yoxibal velta chapalun sventa chbat jkʼeloxuk, pe muʼyuk bu chikʼot jech kʼuchaʼal ikatsil ta atojolalik. Yuʼun maʼuk yakal ta jsaʼ li kʼusitik oy avuʼunike, voʼoxuk ta jsaʼoxuk; yuʼun maʼuk tstsob stakʼin alab nichʼnabiletik sventa li stot smeʼike, jaʼ tstsob stakʼin totil meʼiletik sventa li yalab xnichʼnabike.
15 Ta sjunul koʼonton ta jlajes kipal ta aventaik, ta xkakʼ sjunlej jkuxlejal ta atojolalik. ¿Mi mu jechuk van skʼan xakʼanikun ek ta skoj ti solel jkʼanojoxuke?
16 Pe kʼusiuk noʼox, muʼyuk bu laj kakʼ avikatsik. Akʼo mi jech, chavalik ti «manyaune» xchiʼuk ti la «jloʼlaoxuke».
17 Muʼyuk bu laj kilbajinoxuk ta stojolal li buchʼutik la jtakboxuk tale, ¿mi mu jechuk?
18 La jtijbe yoʼonton li Titoe xchiʼuk jmoj la jtak batel xchiʼuk li jun ermanoe. Muʼyuk bu laj yilbajinoxuk jsetʼuk li Titoe, ¿mi mu jechuk? Koʼol jnopbenkutik, ¿mi mu jechuk? Koʼol li kʼusi la jpaskutike, ¿mi mu jechuk?
19 ¿Mi jech yakal-o chanopik ti yakal-o ta jpak jkʼoplalkutik ta atojolalik ti vaʼ xa sjalile? Jaʼ ta stojolal Dios ti yakal chkalbekutik skʼoplal li Kristoe. Voʼoxuk ti jkʼanojoxuke, jaʼ sventa atsatsubtasobilik skotol li kʼusi ta jpaskutike.
20 Yuʼun chixiʼ mi mu jechuk chkʼot jtaoxuk jech kʼuchaʼal oy ta koʼontone, ti mu jechuk xataikun ek jech kʼuchaʼal oy ta avoʼontonike, yuʼun jaʼ chopol mi oy tsakbail ta kʼope, mi oy itʼixale, mi oy kʼakʼal oʼontonale, mi muʼyuk koʼol anopbenike, mi oy buchʼu chchopol kʼopojik ta mukule, mi oy buchʼu chloʼiltavane, mi oy junantik ti xtoyet xa tajek chaʼi sbaike xchiʼuk mi oy buchʼu tslikes kʼope.*
21 Xuʼ van chakʼun ta kʼexlal Jdios kʼalal chbat jkʼeloxuk yan veltae, vaʼun xuʼ van chkat koʼonton ta skoj li buchʼutik la spas smulik ta voʼnee, pe ti muʼyuk bu sutesoj yoʼontonik ta skoj li kʼusitik ibal sba la spasike, ti mulivajike* xchiʼuk ti toj kʼexlal sba la spasilan stalelalike.*
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ O: «sonsoun».
^ O: «jpajes jba»; «jtsʼin jba».
^ O: «pʼij koʼn»; «nichim koʼonton».
^ Kʼelo glosario.
^ O: «vochlajetele».
^ Por·nei·a ta griego. Kʼelo glosario.
^ «Aseljeia» ta griego. Kʼelo glosario.
