2 Korintios 13:1-14
13 Yoxibal xa velta chibat ta atojolalik. «Lek chapanbil chkʼot skotol kʼusiuk noʼox mi laj yal chaʼvoʼ o oxvoʼ testigoe.»
2 Akʼo mi chʼabal te oyun, xkoʼolaj kʼuchaʼal te xa oyun xchibal velta yaʼel xchiʼuk baʼyel xa onoʼox chkalbe mantal li buchʼutik laj xa onoʼox spas smulike xchiʼuk skotol li yantik eke: mi likʼot yan velta kʼusiuk noʼox orae, muʼyuk ta jpasik ta perton,
3 yuʼun li voʼoxuke chasabeik sprevail mi ta melel jaʼ yakal chkʼopoj Kristo ta jtojolal, muʼyuk bu kʼun ta atojolalik li Kristoe, tsots ta atojolalik.
4 Melel onoʼox ti laj yichʼ milel ta jtel teʼ* ta skoj ti kʼune, pe kuxul ta skoj li sjuʼel Diose. Melel onoʼox xtok ti kʼununkutik xchiʼuke, pe jmoj chikuxikutik xchiʼuk ta skoj li sjuʼel Dios oy ta atojolalike.
5 Kʼelo-o me abaik mi lek oy li xchʼunel avoʼontonike, kʼelo-o me abaik ti buchʼuoxuk ta melele. ¿Mi yuʼun muʼyuk avakʼojik venta ti jmoj oyoxuk xchiʼuk li Jesukristoe? Pe muʼyuk bu jmoj oyoxuk xchiʼuk Jesukristo mi muʼyuk lek ilbiloxuke.
6 Ta melel oy ta koʼonton ti xatsakik ta venta ti lek ilbilunkutike.
7 Li avi une ta jkʼoponkutik Dios ta atojolalik ti mu me xapasik li kʼusitik chopole, pe maʼuk sventa ti lek ilbilunkutik-o yilele, jaʼ sventa ti akʼo xapasik li kʼusitik lek tajeke, akʼo mi muʼyuk lek ilbilunkutik yilel li voʼonkutike.
8 Yuʼun mu stakʼ kʼusi jpaskutik jutebuk sventa jkontrainkutik li kʼusi melele, jaʼ noʼox ta jpakbekutik skʼoplal li kʼusi melele.
9 Ta melel ximuyubajkutik* kʼalal kʼununkutike, pe tsotsoxuk li voʼoxuke; li kʼusi yakal ta jkʼoponkutik-o Dios ta atojolalike jaʼ liʼe: tukʼibtasik yan velta li anopbenike.
10 Jaʼ yuʼun li kʼusitik liʼe baʼyel la jtsʼibaboxuk tal kʼalal nom toʼox oyune, sventa mu tsotsuk xkakʼ jba kʼalal mi te xaʼox oyun ta atojolalik ta skoj li kabtel yakʼojbun Kajvaltike, yuʼun jaʼ sventa tstsatsubtasoxuk, maʼuk sventa tskʼunibtasoxuk.
11 Ta slajebe kermanotak, jechuk-o me xamuyubajik, jechuk-o me xatukʼibtas abaik, jechuk-o me xavichʼ patbel avoʼontonik, koʼoluk li kʼusi chanopike, junuk avoʼonton kuxianik-o; te oy-o ta atojolalik li Dios ti chkʼanvane xchiʼuk ti chakʼ jun oʼontonale.
12 Ta chʼul tsʼutsʼeluk* me xakʼopon abaik ta jujuntal.
13 Chabanukoxuk la chal skotol li buchʼutik chʼule.
14 Li slekil yutsil yoʼonton Kajvaltik Jesukristoe, li kʼanelal yuʼun Diose xchiʼuk li chʼul espiritu ti jmoj yakal ta jtabetik sbalile, te oyuk ta atojolal akotolik.
Tsʼibetik ta yok vun
^ Kʼelo glosario.
^ O: «pʼij koʼnkutik»; «nichim koʼontonkutik».
^ O: «butsʼeluk»; «tsʼutsʼuneluk».
