2 Korintios 2:1-17
-
Oy ta yoʼonton chbat spat oʼontonal li Pabloe (1-4)
-
Akʼbat perton xchiʼuk laj yichʼ chʼamel yan velta jun jpasmulil (5-11)
-
Kʼot ta Troas xchiʼuk ta Masedonia li Pabloe (12, 13)
-
Li cholmantale jaʼ sventa chkichʼtik-o lekil kʼoptael (14-17)
-
Maʼuk jchonolajelunkutik ta buyuk noʼox ta sventa skʼop Dios (17)
-
2 Yuʼun jnopoj ti muʼyuk xa chkakʼ yatel avoʼontonik* kʼalal mi bat jkʼeloxuk yan veltae.
2 Yuʼun mi chkakʼ yatel avoʼontonike, ¿buchʼu van chakʼ muyubajkun?* Jaʼ noʼox chakʼbun jmuyubajel li buchʼu laj kakʼbe yatel yoʼontone.
3 Jaʼ yuʼun la jtsʼiba li kʼusi la jpase, yuʼun kʼalal mi libate mu xakʼbeikun yatel koʼonton li buchʼutik skʼoplal jaʼ chakʼbeikun jmuyubajele; yuʼun jpatoj koʼonton ti chakʼ amuyubajel akotolik li kʼusi chakʼbun jmuyubajel eke.
4 Tsots tajek jvokol, chkat tajek koʼonton xchiʼuk xmalmun yaʼlel jsat la jtsʼiba li kʼusi liʼe, pe maʼuk sventa chkakʼ yatel avoʼontonik, jaʼ sventa xanaʼik ti kʼu to yepal jkʼanojoxuke.
5 Mi oy buchʼu yakʼoj at-oʼontone, muʼyuk yakʼojbun yatel koʼonton li voʼone, jaʼ noʼox yakʼojboxuk yatel avoʼontonik jayvoʼuk avuʼunik —pe mu jkʼan xkalbe mas skʼoplal taje—.
6 Lek xa noʼox jech li mantal laj yichʼ akʼbel li vinike, ti jutuk mu skotolikuk laj yakʼbeik mantale,
7 jaʼ yuʼun chaʼa, ta slekil avoʼontonik xavakʼik ta perton xchiʼuk patbeik yoʼonton li vinik taje, sventa mu xlubtsanat ti chat tajek yoʼontone.
8 Jaʼ yuʼun, chkalboxuk mantal ti akʼbeik yil ti akʼanojike.
9 Ti jech la jtsʼibaboxuk tal xtoke jaʼ sventa chkakʼ venta mi chachʼunik skotol li mantale.
10 Mi chapasik ta perton buchʼuuk noʼox ti kʼusiuk noʼox ta spasboxuke, ta jpas ta perton ek. Ta melel, li kʼusi kakʼoj ta pertone (mi oy kʼusi kakʼoj ta pertone) jaʼ sventa xatabeik sbalil ta sat li Kristoe,
11 sventa mu sloʼlautik li Satanase,* yuʼun xkojtikinbetik lek li smanyae.
12 Jaʼ yuʼun kʼalal likʼot ta Troas sventa ta jchol li lekil aʼyejetik sventa Kristo xchiʼuk kʼalal laj kichʼ jambel jun tiʼ na sventa li Kajvaltike,
13 muʼyuk bu jun koʼonton ta skoj ti muʼyuk bu te la jta li kermano Titoe. Jech oxal la jkʼoponik komel, laje libat ta Masedonia.
14 ¡Pe koliyal chkalbetik Dios ti jaʼ koʼol tsbeiltasutik xchiʼuk Kristo sventa chkichʼtik lekil kʼoptael ta skotol li krixchanoetike xchiʼuk lek xmuet ta buyukal noʼox kuʼuntik li yojtikinel Diose!
15 Ta sventa li buchʼu yakal chkolike xchiʼuk ta sventa li buchʼu yakal chchamike, xijmuet ta stojolal Dios ta sventa li Kristoe;
16 ta sventa li buchʼu chchamike smuil xa lajelal chaʼiik ti ch-ikʼvan batel ta lajelale, ta sventa li buchʼu chkolike smuil xa kuxlejal chaʼiik ti ch-ikʼvan batel ta kuxlejale. ¿Buchʼu van lek chapal ta sventa li kʼusitik taje?
17 Li voʼonkutike maʼuk jchonolajelunkutik ta buyuk noʼox ta sventa skʼop Dios jech kʼuchaʼal tspas epal krixchanoetike, yuʼun melel kʼusi chkalkutik ta skoj ti jaʼ yajtsʼaklomunkutik li Kristoe,* jech, takbilunkutik yuʼun Dios xchiʼuk skʼelojunkutik Dios ti jech ta jpaskutike.
Tsʼibetik ta yok vun
^ Kʼelo glosario.
^ O: «spʼijil koʼn»; «xnichimal koʼonton».
^ Kʼelo glosario.
^ Kʼelo glosario.
