2 Korintios 4:1-18
4 Jaʼ yuʼun, ta skoj li kʼuxubinel kichʼojkutike, jtaojkutik li abtelal liʼe, muʼyuk chilubtsajkutik;
2 ti kʼusie, laj xa kiktakutik spasel li kʼusitik kʼexlalik sbae, li kʼusitik mukul skʼoplale, ti muʼyuk chiloʼlavankutike, muʼyuk ta jsokeskutik li skʼop Diose, jaʼ noʼox chkakʼkutik ta naʼel li kʼusitik melele xchiʼuk lek jkʼoplalkutik ta sat Dios ta sventa sjol yoʼonton skotol krixchanoetik.
3 Mi yuʼun pixil skʼoplal li lekil aʼyejetik ta jcholkutike, jaʼ pixil skʼoplal ta stojolal li buchʼutik yakal chlajike,
4 jech, ta stojolal li buchʼutik maʼuk jchʼunolajeletik ti makbil snopbenik yuʼun li dios ta sventa li kʼusitik oy ta balumil liʼe,* yoʼ mu xjelav xojobal li slekil yutsil lekil aʼyejetik ta sventa li Kristo ti jaʼ slokʼol Diose.
5 Yuʼun maʼuk yakal chkalbe jba jkʼoplal jtukkutik, jaʼ chkalbekutik skʼoplal Jesukristo ti jaʼ Kajvaltike xchiʼuk ti xkoʼolaj kʼuchaʼal amosounkutik ta skoj li Jesuse.
6 Yuʼun jaʼ Dios ti xi laj yale: «Sakubuk osil li ta ikʼal osile», xchiʼuk sakubtasoj koʼontonkutik sventa xakʼ xojobal li slekil yutsil yojtikinobil Dios ta stojolal li Kristoe.
7 Akʼo mi jech, li kʼulejal liʼe oy kuʼunkutik ta kʼib ti patbil* ta achʼele sventa maʼukuk kuʼunkutik xkʼot li juʼelal ti mu kʼusi xkoʼolaj-oe, yuʼun likem tal ta stojolal Dios.
8 Ep ta tos kʼu yelan ta jta jvokolkutik, pe maʼuk ti tstsalunkutike; mu xa jnaʼ kʼusi ta jpaskutik, pe maʼuk skʼan xal ti solel mu xa stakʼ bu xilokʼkutike;
9 chkichʼkutik kontrainel, pe muʼyuk chkichʼkutik iktael; chkichʼkutik jipel ta lum, pe muʼyuk chkichʼkutik lajesel.
10 Skotol ora stsʼik kuʼun ta jbekʼtalkutik li tsatsal vokolil jech kʼuchaʼal la stsʼik li Jesuse, sventa xvinaj ta jbekʼtalkutik li xkuxlejal Jesus eke.
11 Voʼonkutik ti kuxulunkutike jkʼelojbekutik sat skotol ora lajelal ta skoj li Jesuse, sventa te xvinaj xkuxlejal Jesus ek li ta jbekʼtalkutik ti snaʼ xchame.
12 Jaʼ yuʼun, yakal ch-abtej lajelal ta jtojolalkutik, yan li voʼoxuke yakal ch-abtej kuxlejal ta atojolalik.
13 Jaʼ yuʼun, ta skoj ti koʼol oy ta koʼontonkutik li xchʼunel oʼontonal jech kʼuchaʼal ti xi tsʼibabil skʼoplale: «Laj kakʼ xchʼunel koʼonton, jaʼ yuʼun likʼopoj», jech laj kakʼ xchʼunel koʼontonkutik ek, jaʼ yuʼun chikʼopojkutik,
14 yuʼun jnaʼojkutik ti Buchʼu la xchaʼkuxes Jesuse jech chchaʼkuxesunkutik ek xchiʼuk jmoj tsvaʼanutik ta stojolal.
15 Jaʼ sventa alekilalik skotol li kʼusitik taje, sventa x-epaj to batel mas li slekil yutsil oʼontonale, yuʼun yantik x-epaj batel li buchʼutik yakal tstojik ta vokol ta sventa li smukʼulal Diose.
16 Jaʼ yuʼun mu me xijlubtsaj; akʼo mi yakal chlaj batel li jpat jxokontik ta skoj ti krixchanoutike, jujun kʼakʼal yakal ch-achʼub batel li jnopbentik xchiʼuk koʼontontike.
17 Yuʼun akʼo mi jlikel noʼox xchiʼuk ti muʼyuk tsots li vokolile, chichʼ talel mukʼulal ta jtojolaltik ti mas to toj mukʼ skʼoplale* xchiʼuk ti te oy-o sbatel osile;
18 yuʼun maʼuk te batem jsatik ta sventa li kʼusitik xkiltike, jaʼ te batem jsatik ta sventa li kʼusitik mu xkiltike. Yuʼun li kʼusitik xkiltike snaʼ xlaj, pe li kʼusitik mu xkiltike te oy-o sbatel osil.
