2 Korintios 6:1-18
6 Ti jech koʼol chi-abtejkutik xchiʼuk Diose, ta jkʼan ta jtijkutik avoʼontonik ek ti mu me jecheʼuk xachʼambeik slekil yutsil yoʼonton mi muʼyuk bu chapasik li kʼusi tskʼane.
2 Yuʼun xi chale: «Laj kaʼibot kʼalal jaʼo yorail chichʼamvane xchiʼuk la jkoltaot kʼalal jaʼo yorail chikoltavane». ¡Kʼelo avilik! Jaʼ xa tajek yorail chʼamel li avie. ¡Kʼelo avilik! Jaʼ xa skʼakʼalil koltael li avie.
3 Mi jutebuk kʼusi ta jkʼan ta jmakutik-o okil sventa mu xichʼ tabel jutebuk spaltail li kabtelkutike;
4 ti kʼusie, chkakʼkutik ta ilel ti yajtunelunkutik Dios ta skoj ti ep chkuch kuʼunkutike, ta skoj li tsatsal vokolile, ta skoj ti oy kʼusi chtun kuʼunkutike, ta skoj ti oy kʼusi vokol ta jnuptankutike,
5 ta skoj ti chkichʼkutik majele, ta skoj ti chkichʼkutik chukele, ta skoj kʼop,* ta skoj li tsatsal abtelale, ta skoj ti oy jayibuk kʼakʼal muʼyuk chivaykutike, ta skoj ti muʼyuk jveʼelkutike,
6 ta skoj ti sakunkutike, ta skoj li yojtikinobile, ta skoj ti stsʼik kuʼunkutike, ta skoj slekil oʼontonal, ta skoj chʼul espiritu, ta skoj ti chikʼanvankutik ta melele,
7 ta skoj ti melel kʼusi chkalkutike, ta skoj li sjuʼel Diose; ta skoj li yabtejebtak tukʼilal ta batsʼikʼobil xchiʼuk ta tsʼetkʼobile,
8 ta skoj ti ichʼbilunkutik ta mukʼe xchiʼuk ta skoj ti muʼyuk ichʼbilunkutik ta mukʼe, ta skoj ti muʼyuk lek kʼusi chalik ta jtojolalkutike xchiʼuk ta skoj ti lek kʼusi chalik ta jtojolalkutike, akʼo mi melel likʼopojkutik, jech laj kichʼkutik pasbel kʼuchaʼal jun jloʼlavanej,
9 akʼo mi lek ojtikinbilunkutik, pe jech laj kichʼkutik pasbel kʼuchaʼal li buchʼu muʼyuk ojtikinbile, jech laj kichʼkutik pasbel kʼuchaʼal li buchʼu sta-o xchame, akʼo mi jech, ¡kʼelo avilik!, kuxulunkutik; chkichʼkutik kastigo,* pe maʼuk skʼan xal ti chichamkutik-oe,
10 jechunkutik kʼuchaʼal li buchʼu mu xa x-echʼ yuʼun at-oʼonton chaʼie, pe skotol ora xkuxet koʼontonkutik,* jechunkutik kʼuchaʼal povre, pe ep buchʼutik chkakʼbekutik skʼulejal, jechunkutik kʼuchaʼal li buchʼu mu kʼusi oy yuʼune, pe oy kuʼunkutik skotol.
11 Jkorintoetik, jamoj kekutik sventa ta jchiʼinotkutik ta loʼil xchiʼuk chʼiem tajek kʼanelal ta koʼontonkutik ta atojolalik.
12 Muʼyuk bu ta jalankutik ti kʼu yelan kʼuxoxuk ta koʼontonkutike, yan li voʼoxuke chajalanik ti kʼu yelan kʼuxunkutik ta avoʼontonike.
13 Jaʼ yuʼun sventa chatojbunkutike —jech chkalboxuk kʼuchaʼal jnichʼnab—, chʼieso ta avoʼontonik ek li kʼanelale.
14 Mu me xapasik ta jun xchiʼuk li buchʼutik maʼuk jchʼunolajeletike. Yuʼun ¿kʼusi xkoʼolaj-o xchiʼuk tukʼilal li choplejale? ¿O kʼusi xkoʼolaj-o li sakil osil xchiʼuk li ikʼal osile?
15 Jech xtok, ¿kʼusi xkoʼolaj-o li Kristo xchiʼuk li Beliale?* ¿O kʼusi xkoʼolaj-o li jchʼunolajel xchiʼuk li buchʼu maʼuk jchʼunolajele?
16 Jech xtok, ¿kʼusi tspas ta stemplo Dios li santoetike?* Yuʼun voʼotik kʼotemutik ta stemplo* li jun kuxul Diose; jech kʼuchaʼal xi laj yal li Diose: «Te chinaki xchiʼukik, jech xtok te chixanav xchiʼukik, voʼon chikʼot ta Sdiosik, vaʼun chkʼotik ta jteklumal».
17 «‹Jech oxal lokʼanik ti bu oyike xchiʼuk chʼako abaik —xi li Jeovae—, xchiʼuk mu xa xapikik li kʼusi ibal sbae›»;* «‹vaʼun ta jchʼamoxuk›».
18 «‹Vaʼun voʼon chikʼot ta atotik, voʼoxuk chakʼotik ta jkeremtak xchiʼuk ta jtsebetak›, jech chal Jeova ti Buchʼu skotol xuʼ yuʼune.»
Tsʼibetik ta yok vun
^ O: «vochlajetel».
^ O: «tojobtasel».
^ O: «pʼij koʼnkutik»; «nichim koʼontonkutik».
^ Li ta evreoe jaʼ skʼan xal ti «mu kʼusi xtun-oe». Taje jaʼ skʼoplal li Satanase.
^ Kʼelo glosario.
^ Kʼelo glosario.
^ Kʼelo glosario.
