2 Korintios 7:1-16
7 Jaʼ yuʼun, ta sventa li kʼusitik albilutik skʼoplale kuni kʼanbil chiʼiltak, jsakubtas* jbatik ta sventa li kʼusi tsokes jbekʼtaltike xchiʼuk li kʼusi oy ta jnopbentike, sventa mas chʼul xijkʼot ta xiʼtael li Diose.
2 Akʼbunkutik jutebuk kavilkutik li ta avoʼontonike. Muʼyuk buchʼu chopol kʼusi jpasojbekutik, muʼyuk buchʼu jsokesojkutik, muʼyuk buchʼu kilbajinojkutik.
3 Maʼuk sventa ta jsaʼ amulik ti jech chkalboxuke. Yuʼun baʼyel laj kalboxuk ti oyoxuk ta koʼontonkutike, sventa koʼol xijcham xchiʼuk koʼol xijkuxi.
4 Jamal chikʼopoj ta atojolalik. Oy ep kʼusitik ximuyubaj-o* avuʼunik. Xpatet tajek koʼonton, xkuxet noʼox koʼonton, akʼo mi oy jvokolkutik.
5 Ta melel, muʼyuk bu xlaet xa jbekʼtalkutik kʼalal likʼotkutik ta Masedoniae, yuʼun ep ta tos kʼu yelan la jta jvokolkutik... oy noʼox paskʼop li ta spate, oy xiʼel xtok li ta yute.
6 Pe li Dios ti tspatbe yoʼonton li buchʼu chat tajek yoʼontonike, jaʼ la spatbun koʼontonkutik kʼalal vul li Titoe;
7 pe maʼuk noʼox ti vul ta jtojolalkutike, yuʼun jaʼ ta skoj ti xpatet tal yoʼonton avuʼunike, yuʼun kʼalal sut tale laj yalbunkutik ti oyun tajek ta avoʼontonik chakʼelikune, ti chavat avoʼontonik xchiʼuk ti oyun tajek ta avoʼontonike; jaʼ yuʼun mas to xkuxet-o tajek koʼonton.
8 Jaʼ yuʼun, akʼo mi laj kakʼ yatel avoʼontonik ta skoj li jkartae, muʼyuk bu chopol chkaʼi jba. Akʼo mi chopol toʼox laj kaʼi jba li ta slikebale (laj kakʼ venta ti muʼyuk bu jal laj yakʼ yatel avoʼontonik li karta taje),
9 xkuxet koʼonton li avie, pe maʼuk ta skoj ti laj kakʼ yatel avoʼontonike, jaʼ ta skoj ti la asutes avoʼontonik* kʼalal laj avat avoʼontonike. Yuʼun laj avat avoʼontonik jech kʼuchaʼal tskʼan yoʼonton li Diose, sventa mu xavil avokolik ta jkojkutik.
10 Yuʼun mi chkat koʼontontik jech kʼuchaʼal tskʼan Diose jaʼ chakʼ sventa jsutes koʼontontik ti xuʼ chikʼutik batel ta kolebal ti muʼyuk bu chopol chkaʼi jbatik yuʼune; pe mi chkat koʼontontik ta sventa balumile jaʼ chakʼ lajelal.
11 Yuʼun ¡kʼelo avilik, ti anil xa noʼox laj avat avoʼontonik jech kʼuchaʼal tskʼan Diose, jech oxal oy kʼusi laj avakʼ avipik spasel, jech, muʼyuk xa amul lakʼotik, jech, cha-ilinik xa yuʼun li choplejale, jech, chaxiʼik xa, jech, oy xa kʼusi lek chakʼanik, jech, ta sjunul xa avoʼonton chavakʼ avipalik sventa chajel li apaltailike! Ta skotol li kʼusitik taje laj avakʼik ta ilel ti sakoxuke.
12 Akʼo mi la jtsʼibaboxuk li kartae, maʼuk la jtsʼibabe li buchʼu chopol kʼusi la spase xchiʼuk maʼuk la jtsʼibabe li buchʼu chopol kʼusi pasbate, jaʼ sventa akʼo vinajuk ta atojolalik xchiʼuk ta sat Dios ti laj avakʼ avipik spasel li kʼusi laj kalkutike.
13 La jta spatobil koʼontonkutik ta skoj taje.
Pe maʼuk noʼox ti xpatet koʼontonkutike, yuʼun mas ximuyubajkutik ta skoj ti xkuxet yoʼonton li Titoe, yuʼun siket yoʼonton avuʼun akotolik.
14 Yuʼun mi ximuyubaj yuʼun ta atojolalike, muʼyuk bu kakʼoj jba ta kʼexlal; jech kʼuchaʼal melelik skotol li kʼusitik laj kalbotkutik avaʼiike, jaʼ jech melel ti ximuyubajkutik ta stojolal li Tito eke.
15 Jech xtok, toj mukʼ li xkʼuxul yoʼonton ta atojolalik kʼalal chvul ta sjol ti kʼu yelan chachʼunik mantal akotolike, yuʼun lek laj avichʼik ta mukʼ kʼalal ay skʼeloxuke.
16 Xkuxet koʼonton ta skotol li kʼusitik chapasike, yuʼun jpatoj lek koʼonton ta atojolalik.
