2 Korintios 8:1-24
8 Tana un, oy ta koʼontonkutik ti akʼo xanaʼike kermanotak, ti laj xa yichʼik akʼbel slekil yutsil yoʼonton Dios li tsobobbailetik ta Masedoniae,
2 akʼo mi jaʼo oyik ta vokolil ta skoj li prevae laj yakʼik ta ilel ti xkuxet noʼox yoʼontonike* xchiʼuk laj yakʼik ta ilel slekil yoʼontonik manchuk mi toj povreik.
3 Yuʼun jaʼ jech laj yakʼik ti kʼu yepal xuʼ yuʼunike, jech, voʼon jamal chkal ti jeche, yuʼun mas to laj yakʼik ti bu kʼalal xuʼ yuʼunike,
4 lokʼ ta yoʼonton stukik la skʼanbunkutik vokol, yuʼun jaʼ jun matanal chilik kʼalal oy kʼusi chakʼ ta slekil yoʼontonik xchiʼuk ti teuk skʼoplalik li ta abtelal sventa tskoltaik li buchʼutik chʼule.
5 Pe maʼuk noʼox jech kʼot ta pasel ti kʼu yelan jnopojkutike, yuʼun baʼyel laj yakʼ sbaik ta stojolal li Kajvaltike, laje ta jtojolalkutik ti jech kʼuchaʼal tskʼan yoʼonton li Diose.
6 Ta jtijbekutik yoʼonton Tito ti akʼo stsutses* ta stsobel li kʼusitik chavakʼ ta slekil avoʼontonike, jech kʼuchaʼal la slikes ta atojolalike.
7 Jech kʼuchaʼal ch-epaj avuʼunik li kʼusitike, li xchʼunel avoʼontonike, li ta akʼopojelike, li yojtikinobil avuʼunike, ti oy kʼusi chavakʼ avipik ta spasele, ti kʼu yelan jkʼanojotkutike, jechuk me akʼo epajuk ek li matanal ti chavakʼik ta slekil avoʼontonike.
8 Maʼuk jun mantal ti vaʼ yelan chkalboxuke, jaʼ noʼox ta jkʼan chanaʼik ti yakʼoj ta yoʼontonik ta yakʼel li yantik eke xchiʼuk ti akʼo vinajuk ti ta melel chakʼanvanike.
9 Yuʼun li voʼoxuke xavojtikinbeik li slekil yutsil yoʼonton Kajvaltik Jesukristoe, yuʼun manchuk mi jkʼulej toʼox pas ta povre ta akojik, ti jech pas ta povree jaʼ sventa xakʼotik ta jkʼulej.
10 Xi chkal li kʼusi ta jnope: jaʼ sventa alekilalik li kʼusi taje, yuʼun oy xa ta jun jabil ti maʼuk noʼox la alikesik spasele, yuʼun laj avakʼik ta ilel ti jech oy ta avoʼontonik spasele.
11 Li avi une chaʼa, akʼo ta avoʼontonik stsutsesel xtok li kʼusi la alikesik ta sventa li kʼusitik chatsobike, jaʼ jech xapasik ti kʼu yelan xuʼ avuʼunike.
12 Yuʼun mi jaʼ baʼyel oy ta koʼontontik li kʼusi chkakʼtike, lek chʼambil chkʼot li kʼusi oy kuʼuntike, maʼuk li kʼusi muʼyuk kuʼuntike.
13 Maʼuk jech oy ta koʼonton ti mas kʼun chaʼiik spasel li yantike, ti voʼoxuk mas tsots chavaʼiik spasele;
14 pe sventa koʼoluk xichʼ pasele, li sovrail avuʼunike jaʼ akʼo stsʼakubtasbe avi li kʼusi skʼan to yuʼun yantike, sventa jaʼ stsʼakubtas kʼusi skʼan to avuʼunik li sovrail yuʼunik eke, sventa koʼol xkʼot.
15 Jech kʼuchaʼal xi onoʼox tsʼibabile: «Muʼyuk bu spas sovrail yuʼun li buchʼu ep yuʼune, xchiʼuk muʼyuk bu skʼan to yuʼun li buchʼu jutuk yuʼune».
16 Li avi une, chkalbekutik koliyal Dios ti jech laj yakʼbe ta yoʼonton Tito ti oyoxuk ta yoʼonton jech kʼuchaʼal oyoxuk ta koʼontonkutik eke,
17 yuʼun lek la xchʼam li kʼusi laj kalbekutike, pe ta skoj ti xmuyubaj tajek ta sventa li kʼusi laj kalbekutike, lokʼ ta yoʼonton stuk ti chbat skʼeloxuke.
18 Jmoj ta jtakkutik talel xchiʼuk jun ermano ti lek skʼoplal ta skotol tsobobbailetik ta sventa li lekil aʼyejetike.
19 Pe maʼuk noʼox taje, yuʼun vaʼanbil yuʼun tsobobbailetik xtok ti akʼo xchiʼinunkutik ta xanbal ta sventa li abtelal ta yakʼel li matanal taje ti ta slekil oʼontonal chichʼ pasel ti jaʼ sventa smukʼulal li Kajvaltike xchiʼuk ti jaʼ sprevail ti ximuyubaj chikoltavankutike.
20 Jaʼ jech muʼyuk buchʼu sta jpaltailkutik ta sventa li matanal akʼbil ta slekil oʼontonal ti jaʼ kichʼojkutik ta ventae.
21 Yuʼun «ta jtukʼulankutik lek skotol li kʼusitike, maʼuk noʼox ta stojolal Jeova, yuʼun jech ta jpaskutik ta stojolal li krixchanoetik xtoke».
22 Jech xtok, jmoj ta jtakkutik talel xchiʼukik li jun kermanotik ti kakʼojkutik venta ti baxbol ta spasel li kʼusitike, pe li avie mas to baxbol ta skoj ti spatoj yoʼonton ta atojolalike.
23 Pe mi oy kʼusi chakʼan chanaʼik ta sventa li Titoe, jaʼ jchiʼil ta abtel xchiʼuk jaʼ jkoltavanej ta sventa alekilalik; o mi oy kʼusi chakʼan chanaʼik ta sventa li yantik kermanotike, jaʼ jtakboletik li ta tsobobbaile xchiʼuk jaʼik smukʼulal Kristo.
24 Jaʼ yuʼun, akʼbeik yil ti chakʼanike xchiʼuk akʼbeik yil li tsobobbailetik ti kʼu yuʼun ximuyubajkutik ta atojolalike.
