2 Pedro 1:1-21
1 Voʼon Simon Pedroun, smosoun xchiʼuk yajtakbolun* Jesukristo ta sventa li buchʼutik oy xchʼunel yoʼontonik ti jech alakʼ sba yutsil kʼuchaʼal li xchʼunel koʼontonkutik ti jaʼ ta skoj li tukʼilal* yuʼun Jdiostik xchiʼuk li Jkoltavanej Jesukristoe:
2 Akʼo epajuk slekil yutsil oʼontonal* xchiʼuk jun oʼontonal ta atojolalik ta sventa li yojtikinel lek Dios xchiʼuk Jesus ti jaʼ Kajvaltike,
3 yuʼun ta sventa li sjuʼel Diose muʼyuk jalanbil laj kichʼtik skotol li kʼusi chtun kuʼuntik sventa jaʼuk xa noʼox xkichʼtik lek ta mukʼ Dios* li ta jkuxlejaltike, yuʼun laj xa kojtikintik lek li yojtikinobil yuʼun li Buchʼu la stakutik ta ikʼel ta mukʼulal xchiʼuk li ta lekil talelale.
4 Jaʼ yuʼun ta sventa li kʼusitik taje akʼbilutik li kʼusi albil skʼoplal ti kʼupil sba xchiʼuk ti batsʼi mukʼ tajeke, sventa teuk kapal akʼoplalik ta stalelaltak Dios ta skoj li kʼusitik taje, ti lajatavik xa lokʼel ta stojolal li chopol talelal liʼ ta balumil ta skoj ti muʼyuk xa noʼox spajeb li kʼusi chopol ta jkʼantike.
5 Jaʼ yuʼun, akʼbeik yipal ti bu kʼalal xuʼ avuʼunik sventa xavakʼbeik lekil talelal li xchʼunel avoʼontonike; li alekil talelalike skʼan me xavakʼbeik yojtikinobil;
6 li yojtikinobile skʼan me xavakʼbeik ti xanaʼ spajesel abaike; ti xanaʼ spajesel abaike skʼan me xavakʼbeik ti xkuch lek avuʼunike; ti xkuch lek avuʼunike skʼan me xavakʼbeik yichʼel ta mukʼ Dios ta sjunul avoʼontonik;
7 li yichʼel ta mukʼ Dios ta sjunul avoʼontonike skʼan me xavakʼbeik ti skʼan xakʼan achiʼilik ta chʼunolajel jech kʼuchaʼal skʼanoj sbaik ta jujuntal li buchʼutik xchiʼil sbaik ta vokʼele;* ti skʼan xakʼan achiʼilik ta chʼunolajel jech kʼuchaʼal skʼanoj sbaik ta jujuntal li buchʼutik xchiʼil sbaik ta vokʼele skʼan me xavakʼbeik kʼanelal.
8 Yuʼun mi oy avuʼunik li kʼusitik taje xchiʼuk mi yantik x-epaj batel avuʼunike, jaʼ tskoltaoxuk sventa mu xachʼajubik o jaʼ tskoltaoxuk sventa lekuk kʼusi chapasik ta sventa li yojtikinel lek Kajvaltik Jesukristoe.
9 Yan mi oy buchʼu muʼyuk yuʼun li kʼusitik taje, maʼsat kʼotem,* yuʼun mu skʼan skʼel li sakil osile xchiʼuk chʼayem xaʼi ti voʼne xa onoʼox pokbil lokʼel li smule.
10 Jaʼ yuʼun ermanoetik, akʼik me tajek persa sventa tukʼ xavakʼ abaik ti jech takbiloxuk ta ikʼel xchiʼuk ti tʼujbiloxuke, yuʼun mu me jutebuk chayalik ta lum mi jech chapasik-o li kʼusitik taje.
11 Ta melel, chataik epal bendision mi jech chapasike, jaʼ xkaltik, cha-akʼbatik permiso sventa cha-ochik li ta Ajvalilal sbatel osil yuʼun Kajvaltike, li Jkoltavanej Jesukristoe.
12 Jaʼ yuʼun skotol ora jpʼel ta koʼonton ta jvulesboxuk ta ajolik li kʼusitik taje, manchuk mi xavojtikinik xa xchiʼuk mi lek xa avakʼoj ta avoʼontonik li kʼusi melel ti laj xa achanike.
13 Pe lek chkaʼi ti ta jvulesboxuk ta ajolik sventa jtij avoʼontonik yoʼ to liʼ oyun ta axibalnae,*
14 yuʼun jnaʼoj ti poʼot xa ta xichʼ lokʼesel li axibalna jech kʼuchaʼal jamal onoʼox laj yalbun komel li Kajvaltik Jesukristo eke.
15 Chkakʼ tajek persa skotol ora bu kʼalal xuʼ kuʼun sventa mi libat xaʼoxe xuʼ xavules ta ajol* atukik li kʼusitik taje.
16 Kʼalal laj kakʼkutik avojtikinik li sjuʼel xchiʼuk ti liʼ xa oy* li Kajvaltik Jesukristoe maʼuk te la jlokʼeskutik ta jecheʼ loʼiletik ti spʼijil nopben noʼox krixchanoetike, moʼoj, yuʼun laj kilbekutik li yutsil slekilale.
17 Yuʼun ichʼat ta mukʼ xchiʼuk toybat skʼoplal yuʼun li Dios ti jaʼ Totile. Taje jaʼo kʼot ta pasel kʼalal xi laj yal li Dios ti oy tajek smukʼulale: «Liʼe jaʼ Jnichʼon, jaʼ li buchʼu jkʼanoje, jaʼ li buchʼu ximuyubaj* yuʼune».
18 Jech, li kʼusi laj yichʼ alel taje laj kaʼikutik ti te lik talel ta vinajel kʼalal jaʼo te jchiʼukutik ta chʼul* vitse.
19 Jaʼ yuʼun chaʼa, mas to xuʼ jpat koʼontontik yuʼun li albil kʼope,* lek ti jech chapasik ti lek chatsʼetanbeik xchikinal jech kʼuchaʼal jun kantil ti chojobaj ta ikʼal osil li ta avoʼontonike (jaʼ to mi sakub osile xchiʼuk mi lokʼ xaʼox talel li mukʼta kʼanale).*
20 Yuʼun baʼyel anaʼojik li kʼusi liʼe, ti muʼyuk bu likem tal ta snopben krixchanoetik mi junuk li albil kʼop ta Tsʼibe.*
21 Yuʼun mu ta yoʼontonuk krixchanoetik ti jech tal li albil kʼopetike, moʼoj, yuʼun likem talel ta stojolal Dios li kʼusi laj yal li viniketik kʼalal tijbat yoʼontonik yuʼun li chʼul espiritue.*
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «ayanele».
^ O: «mu xkʼot lek sat».
^ O: «karpanae», jaʼ xkaltik, li jbekʼtal liʼ ta balumile.
^ O: «xaval».
^ Kʼelo glosario.
^ O: «pʼij koʼn»; «nichim koʼonton».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
