2 Pedro 2:1-22
-
Jecheʼ jchanubtasvanejetik (1-3)
-
Chichʼik chapanel li jecheʼ jchanubtasvanejetike (4-10 sbavokʼal)
-
Ti kʼu yelanik li jecheʼ jchanubtasvanejetike (10 xchaʼvokʼal kʼalal ta 22)
2 Pe lik talel jloʼlavanej j-alkʼopetik ta jteklum jech kʼuchaʼal chlik talel jecheʼ jchanubtasvanejetik ta atojolalik eke. Ta mukul chlik chʼakvanikuk ti tslajesik li xchʼunel avoʼontonike, jech xtok, chlik spʼajik li yajvalik ti jaʼ manatike, jaʼ yuʼun ta anil xa noʼox chichʼ talel li slajelal stukike.
2 Pe maʼuk noʼox taje, yuʼun ep buchʼutik chlik xchanbeik ek li stalelalik ti toj kʼexlal sbae,* jaʼ yuʼun chopol xa chichʼ albel skʼoplal li sbelel kʼusi melele.
3 Jech xtok, chlik yilbajinoxuk ta xpichʼetel yoʼontonik ta skoj skʼopojelik ti jecheʼ noʼoxe. Pe mu kʼunkʼunuk chtal xchapanelik ti albil xa onoʼox skʼoplal ta voʼnee xchiʼuk jpʼel onoʼox skʼoplal chtal li slajelalike.
4 Ta melel, li Diose muʼyuk la sjalanbe kastigo li anjeletik* ti la saʼ smulike, yuʼun kʼalal la stenan ochel ta Tartaroe* la xchuk ta kadena* ta ikʼpulan osil sventa xichʼik chapanel mi sta yoraile.
5 Muʼyuk la sjalanbe kastigo li balumil ta voʼnee, pe la xchabi li Noee, ti la xcholbe skʼoplal li tukʼilale, jech xtok la xchabi yan vukvoʼ krixchanoetik kʼalal laj yakʼ talel Nojelal ta voʼ ta stojolal li krixchanoetik ti toj chopolike.
6 Jech xtok, pas ta tan yuʼun li jteklum Sodoma xchiʼuk Gomorra kʼalal laj yakʼbe stoj smule. Li kʼusi kʼot ta pasele jaʼ jun senyail li kʼusi chkʼot ta stojolal ta jelavel li krixchanoetik ti toj chopolike.
7 Koltaat yuʼun Dios li tukʼil Lote, ti toj vokol tajek laj yaʼi ta xkuxlejal ti toj kʼexlal sba stalelalik li chopol krixchanoetike,
8 yuʼun li tukʼil vinik taje jujun kʼakʼal te skʼeloj xchiʼuk te chaʼi li kʼusi chopol tspasik li krixchanoetik ti kʼalal te kapal ta naklej xchiʼuke, jaʼ yuʼun tsots tajek laj yil svokol li stukʼil kuxlejale.
9 Jaʼ yuʼun chaʼa, snaʼoj Jeova* kʼu yelan tskolta lokʼel ta preva li buchʼutik lek ch-ichʼat ta mukʼ ta sjunul yoʼontonike,* pe parte chakʼ li krixchanoetik ti muʼyuk tukʼike sventa xichʼik lajesel li ta skʼakʼalil chapanele,
10 pe mas to jech chkʼot ta stojolalik li buchʼutik jaʼ noʼox tsokesbeik sbekʼtal yantike xchiʼuk ti spʼajojik li buchʼutik oy yabtelike.
Jpʼel tajek xalik xchiʼuk jtoybaetik tajek, jech xtok muʼyuk chiʼik ta xchopol kʼoptael li buchʼutik ichʼbilik ta mukʼ yuʼun Diose,
11 pe jaʼuk li anjeletike manchuk mi mas oy stsatsalik xchiʼuk manchuk mi mas oy sjuʼelik, muʼyuk tsabeik smul li buchʼutik taje, yuʼun muʼyuk chchopol kʼoptaik ta skoj ti yichʼojik ta mukʼ li Jeovae.
12 Pe li viniketik taje, ti xkoʼolajik kʼuchaʼal chonbolometik ti mu snaʼik rason ti stalel onoʼox jech ti kʼusi tspasike, ti vokʼemik* sventa xichʼik tsakel xchiʼuk sventa xichʼik lajesele, chchopol kʼoptaik li kʼusi mu xojtikinike. Jaʼ ch-ikʼatik-o batel ta lajelal li kʼusi chopol tspasike,
13 jaʼ stojolik kʼotem li svokolik ta skoj li kʼusi chopol tspasike.
Lek tajek chilik ti jaʼ batem ta yoʼontonik spasel li kʼusi lek chaʼi sbekʼtalike manchuk mi ta kʼakʼaltik tspasik. Jaʼik ikʼobal xchiʼuk paltail ti xmuyubajik noʼox* ta sventa li jecheʼ chanubtasel yuʼunik ti kʼalal jaʼo te xchiʼinojoxuk ta veʼele.
14 Noj ta sloʼlael snup xchiʼilik* li sbekʼ satike, mu xkom yuʼunik ta spasel li mulile xchiʼuk tsloʼlaik li buchʼutik kʼunike. Chanem lek yoʼontonik ta pichʼ oʼontonal. Jaʼik kʼaʼ alab nichʼnabiletik.
15 Lajemik ta loʼlael ta skoj ti laj yiktaik li tukʼil bee. Jaʼ stamojbeik li sbe Balaam xnichʼon Beor ti jaʼ bat ta yoʼonton li stojol choplejale,
16 pe laj yichʼ tukʼibtasel ta skoj smul ta sventa li kʼusi tukʼe. Yuʼun li jkot vuro ti mu snaʼ xkʼopoje kʼopoj kʼuchaʼal jun krixchano ti la smakbe ta be li xchuvajil j-alkʼope.
17 Jaʼik nioʼ ti ulem yaʼlele xchiʼuk jaʼik lumal tok* ti chkuchatik batel ta tsatsal ikʼaloʼe, jech xtok te xa kʼejbil ta sventaik li ikʼal osil ti ikʼ tajeke.
18 Jun to slekil yaʼel li kʼusitik chalik ti muʼyuk sbalile. Tsabeik sjol li kʼusi tskʼan bekʼtalil xchiʼuk li talelal ti toj kʼexlal sba ti tsloʼlaik li buchʼutik jaʼ to jatavik lokʼel li ta chopol talelale.
19 Chalbeik yantik ti chkolike, pe li stukike mosoinbilik yuʼun li kʼusi snaʼ xkʼaʼe; yuʼun mi oy buchʼu laj yichʼ tsalele mosoinbil chkʼot ta stojolal li buchʼu tstsalvane.
20 Ta melel mi jatavik xaʼox lokʼel ta stojolal li kʼusi tsokesvan ta balumil ta sventa ti laj yojtikinik lek li Kajvaltik xchiʼuk li Jkoltavanej Jesukristoe, pe mi tsutik to batel yan velta li ta kʼusitik taje xchiʼuk mi chakʼ sbaik ta tsalele, mas to chopol kʼusi chkʼot ta stojolalik, jaʼ mu sta li ta baʼyele.
21 Yuʼun mas lek jechuk ti muʼyukuk laj yojtikinik lek li sbelel tukʼilale, jaʼ altik ti chchʼak sbaik lokʼel ta stojolal li chʼul mantal ti laj yichʼik akʼbel kʼalal laj xaʼox yojtikinike.
22 Jaʼ jech kʼotem ta stojolalik li melel pʼijil loʼil liʼe:* «Tsloʼ sutel xet* li tsʼiʼe xchiʼuk chbat sbalalin sba yan velta ta achʼel li meʼ chitom ti pokbil xae».
Tsʼibetik ta yok vun
^ «Aseljeia» ta griego. Kʼelo glosario.
^ Kʼelo glosario.
^ Kʼelo glosario.
^ O: «la stikʼ ta chʼen».
^ Kʼelo glosario.
^ Kʼelo glosario.
^ O: «ayanemik».
^ O: «pʼij noʼox yoʼnik»; «nichim noʼox yoʼontonik».
^ Kʼelo glosario.
^ O: «makal osil».
^ Kʼelo glosario.
^ O: «xe»; «xen».
