2 Pedro 3:1-18
3 Voʼoxuk ti jkʼanojoxuke, jaʼ xa xchaʼlikal jkarta ta jtsʼibaboxuk talel liʼe, jech onoʼox kʼuchaʼal li ta baʼyel jkartae, jaʼ sventa ta jtij avoʼontonik sventa xatojobikuk snopel, melel onoʼox, jaʼ noʼox sventa ta jvules ta ajolik,
2 sventa xavules ta ajolik li kʼusi yalojik xa onoʼox li chʼul j-alkʼopetike xchiʼuk li smantal Kajvaltik ti jaʼ Jkoltavanej ti laj yal ta stojolal li jtakboletik avuʼunike.
3 Li kʼusi baʼyel ta jkʼan chkale jaʼ ti xanaʼik ti chtal jlabanvanejetik ti chlabanvanik li ta slajebal xa kʼakʼale,* jaʼ jech tspasik ti kʼu yelan tskʼan yoʼonton stukike
4 xchiʼuk xi chalike: «Yaloj onoʼox ti chtale, pe ¿bu oy un? Yuʼun ti kʼalal vayik ta lajelal li jmoltotakutik ta voʼnee jech-o li kʼusitik ti kʼuxi lik yichʼ pasel talel li kʼusitike».
5 Yuʼun li stukike yolbaj xa muʼyuk la skʼan la snaʼik ti oy toʼox vinajel ta voʼnee xchiʼuk ti ta skoj skʼop Dios ti lek nakal li jun balumil ti lokʼ talel ta voʼ xchiʼuk ti kakal kom ta voʼe;
6 ta sventa li kʼusitik taje jaʼ laj yichʼik-o lajesel li krixchanoetik li vaʼ kʼakʼal kʼalal laj yichʼik mukel ta voʼe.
7 Pe ta skʼop onoʼox Dios kʼejbilik sventa kʼokʼ li vinajel xchiʼuk balumil ti oy avie xchiʼuk kʼejbilik jaʼ to mi sta yorail li chapanele xchiʼuk ti chichʼik lajesel li krixchanoetik ti toj chopolike.
8 Akʼo mi jech, li voʼoxuk ti jkʼanojoxuke mu me xchʼay ta ajolik li kʼusi taje, yuʼun li jun kʼakʼale jmil jabil chil li Jeovae, li jmil jabile jun kʼakʼal chil.
9 Li kʼusi yaloj Jeova chkʼot ta pasele mu yuʼunuk chjalij jech kʼuchaʼal tsnopik junantike, yuʼun stsʼikojboxuk to, mu skʼan ti oy buchʼu xbat ta lajelal junuke; moʼoj, li kʼusi tskʼane jaʼ ti xasutes avoʼonton* akotolike.
10 Pe li skʼakʼalil Jeovae jaʼ jech chtal kʼuchaʼal jun j-elekʼ, vaʼun li vaʼ kʼakʼale, li vinajele xvoʼoʼet jelavel, chichʼ lilinel li kʼusitik oy ta vinajelbalumil ti toj echʼ xa noʼox kʼokʼe, vaʼun chichʼ akʼel ta ilel ta jamal li balumil xchiʼuk li yabtele.
11 Ta skoj ti jech chichʼ lilinel li kʼusitik taje, nopik me lek ti kʼu yelan skʼan xapas abaike. Skʼan me chʼuluk atalelalik xchiʼuk avichʼojikuk lek ta mukʼ Dios*
12 yoʼ to chamalaik xchiʼuk ti teuk tajek ta ajolik* ti liʼ xa oy li skʼakʼalil Jeovae, ti jaʼo chichʼ lajesel ta leb kʼokʼ li vinajele, pe li kʼusitik oy ta vinajelbalumile ch-unij ta xkʼixnal li kʼokʼ ti toj echʼ xa noʼox kʼokʼe.
13 Pe oy achʼ vinajel xchiʼuk jun achʼ balumil ti jmalaojtik ti jech onoʼox yaloje, oy-o xa tukʼilal te.
14 Jaʼ yuʼun li voʼoxuk ti jkʼanojoxuk ti yakal xa onoʼox chamalaik li kʼusitik taje, pasik me ti bu kʼalal xuʼ avuʼunik ti chʼabaluk achopolalike, ti chʼabaluk apaltailik xchiʼuk ti junuk avoʼontonik staoxuke.
15 Jech xtok, jaʼuk akolebalik xavilik ti stsʼik yuʼun li Kajvaltike, jech kʼuchaʼal la stsʼiba ek li kermanotik Pablo ti jkʼanojtike, jech kʼuchaʼal ti kʼu yelan akʼbat spʼijil
16 ti jech laj yal ta skotol li skartatake. Pe toj vokolik ta aʼibel smelolal junantik li kʼusi la stsʼibae, ti yakal tsokesik li buchʼutik mu snaʼik xchiʼuk ti kʼunike, jech kʼuchaʼal tsokesik xtok li yan Tsʼibetik ti jaʼ sventa slajelal stukike.
17 Jaʼ yuʼun ti voʼoxuk jkʼanojoxuk ti xavojtikinik xa li kʼusitik taje, kʼelo me abaik sventa mu xalajik ta loʼlael ta skoj smulik li jpaschoplejaletik taje yoʼ jech mu xaviktaik komel ti bu lek oyoxuke.
18 Ti kʼusi skʼan xapasike jaʼ ti jechuk-o akʼo epajuk ta atojolalik li slekil yutsil yoʼonton xchiʼuk li yojtikinobil yuʼun Kajvaltike, li Jkoltavanej Jesukristoe. Akʼo yichʼ albel smukʼulal avi xchiʼuk sbatel osil. Jechuk.*
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ O: «chakʼanik tajek».
^ Kʼelo glosario.
