2 Tesalonisenses 1:1-12
1 Voʼon Pablo xchiʼuk Silvano* xchiʼuk Timoteo, sventa li tsobobbail* ta Tesalonika ti jmoj oyik xchiʼuk li Jtotik Diose xchiʼuk li Kajvaltik Jesukristoe:
2 Oyuk slekil yutsil oʼontonal* xchiʼuk jun oʼontonal ta atojolalik ti jaʼ chakʼ li Dios ti jaʼ Totile xchiʼuk li Kajvaltik Jesukristoe.
3 Skotol ora oy ta jba chkaʼikutik stojbel ta vokol Dios ta atojolalik ermanoetik. Sta-o ti jech ta jpaskutike, yuʼun yakal tajek chchʼi batel li xchʼunel avoʼontonike xchiʼuk akotolik yakal ch-epaj batel ti chakʼan abaik ta jujuntale.
4 Jaʼ yuʼun ta jkʼupil kʼoptaotkutik akotolik ta stojolal li stsobobbailtak Dios ta skoj ti stsʼik avuʼunike, ti oy xchʼunel avoʼontonik kʼalal chalajik ta kontrainele xchiʼuk ti yakal chkuch avuʼunik li vokoliletike.
5 Liʼe jaʼ sprevail ti lek tukʼ chchapanvan li Diose, ti tsbeiltasoxuk batel sventa xataik-o li takel ta ikʼel ta sventa li Ajvalilal yuʼun Dios* ti jaʼ ta skoj ti yakal chavil-o avokolik ta melele.
6 Lek me tukʼ ti vaʼ yelan chchapanvan li Diose, yuʼun chakʼbe tsots svokol li buchʼutik chakʼ tsots vokolile.
7 Pe li voʼoxuk ti chavil tsots avokolike, jmoj chakʼbutik siketel koʼontontik kʼalal mi vinaj ta vinajel ta jun kʼokʼ li Kajvaltik Jesus xchiʼuk li yaj-anjeltak* ti oy sjuʼelike.
8 Vaʼun jaʼo chakʼbe kastigo li buchʼutik mu xojtikinik Diose xchiʼuk li buchʼutik mu xchʼunik li kʼusi chal lekil aʼyejetik* ta sventa li Kajvaltik Jesuse.
9 Chchapanatik yuʼun Kajvaltik li buchʼutik taje. Li kastigo chichʼike jaʼ li lajelal sbatel osile, jaʼ yuʼun muʼyuk xa chkʼelatik mi jaʼuk bu chkoltaatik yuʼun li stsatsal juʼele.
10 Li vaʼ kʼakʼale chtal sventa jmoj chichʼ toybel skʼoplal xchiʼuk li buchʼutik chʼul* yuʼune xchiʼuk sventa labal sba ch-ilat yuʼun li buchʼutik laj yakʼ xchʼunel yoʼontonike. Yuʼun laj avakʼ xchʼunel avoʼontonik ta sventa li kʼusi laj kalbekutik skʼoplale.
11 Jaʼ yuʼun ta jpaskutik orasion ta atojolalik sventa xataik-o li takel ta ikʼel yuʼun Jdiostike xchiʼuk tsʼakaluk akʼo spas ta sjuʼel li kʼusi lek chile xchiʼuk ti lek batuk yuʼun skotol li yabtelal xchʼunel avoʼontonike.
12 Ti jech taje, jaʼ sventa chichʼ toybel sbi ta atojolalik li Kajvaltik Jesuse, jech xtok jmoj chavichʼik toybel akʼoplalik xchiʼuk ek, taje jaʼ koliyal li slekil yutsil yoʼonton Jdiostik xchiʼuk li Kajvaltik Jesukristoe.
Tsʼibetik ta yok vun
^ Silas sbi xtok.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
