2 Timoteo 1:1-18
1 Voʼon Pabloun, yajtakbolun* Kristo* Jesus ti jech tskʼan yoʼonton Diose, jech kʼuchaʼal li kuxlejal albil onoʼox skʼoplal ta sventa li Kristo Jesuse,
2 sventa Timoteo ti jaʼ jun kʼanbil nichʼonile:
Oyuk slekil yutsil oʼontonal* xchiʼuk jun oʼontonal ta atojolal ti jaʼ chakʼ li Dios ti jaʼ Totile xchiʼuk li Kristo Jesus ti jaʼ Kajvaltike.
3 Ta jtojbe ta vokol Dios —ti sak* jol koʼonton ta jpas chʼul abtelal* ta stojolal jech kʼuchaʼal la spasik li jmoltotak ta voʼnee— sventa ta jvulesot-o ta jol ta kʼakʼal-akʼobal kʼalal ta jkʼan vokole.
4 Oy tajek ta koʼonton ta jkʼelot kaʼi —yuʼun xvul ta jol li yaʼlel asate— sventa xkuxetuk tajek koʼonton.*
5 Yuʼun xvul ta jol ti melel oy xchʼunel avoʼontone, ti jaʼ baʼyel kʼot ta stojolal li ayaya* Loida xchiʼuk li ameʼ Eunisee, pe —jnaʼoj lek ta melel— ti te oy ta atojolal eke.
6 Jech oxal ta jvules ta ajol ti ta sjunuluk avoʼonton xatunes li matanal yakʼoj Dios ti la ata kʼalal laj kakʼ jkʼob* ta atojolale.
7 Yuʼun li Diose maʼuk chakʼbutik chʼul espiritu* sventa xiʼel, moʼoj, yuʼun chakʼ juʼelal, kʼanelal xchiʼuk lekil nopbenal.
8 Jech oxal, mu me xakʼexav ta xcholbel skʼoplal li Kajvaltike mi jaʼuk me xakʼexav ta jtojolal ek ti jchukelun ta skoje; jaʼ lek tsʼiko avokol ta skoj ti chakontrainat ta sventa li lekil aʼyejetike,* pe pato avoʼonton ta sjuʼel Dios kʼalal jech chkʼot ta atojolale.
9 Jaʼ la skoltautik xchiʼuk la stakutik ta ikʼel sventa chʼul* xijkʼot, pe maʼuk ta skoj kabteltik, jaʼ ta skoj li kʼusi tskʼan tspas stuke xchiʼuk jaʼ ta skoj li slekil yutsil yoʼontone. Voʼne xa onoʼox tajek akʼbilutik ta stojolal Kristo Jesus taje,
10 pe li avie jamal xa lek xvinaj ta skoj ti chakʼ sba ta ilel li Jkoltavanej kuʼuntike, li Kristo Jesuse, ti la slajesbe skʼoplal li lajelale xchiʼuk ti yakʼojbe xojobal li kuxlejale xchiʼuk ti yakʼojbe xojobal li kʼusi mu snaʼ xkʼaʼ ta skoj li lekil aʼyejetike,
11 li kʼusitik taje jaʼ ta sventa ti laj kichʼ vaʼanel ta jcholmantal, ta jtakbol xchiʼuk ta jchanubtasvaneje.
12 Jaʼ ta skoj xtok ti yakal chkil li vokoliletik taje, pe muʼyuk bu chikʼexav. Yuʼun xkojtikin li Buchʼu kakʼoj xchʼunel koʼonton ta stojolale, xchiʼuk jpatoj koʼonton ti chchabi li kʼusi kakʼojbe ta sba jaʼ to mi sta li skʼakʼalil taje.
13 Mu me xchʼay xavaʼi ti kʼu yelan* li lekil chanubtasel laj kalbot ta sventa li kʼanelal xchiʼuk xchʼunel oʼontonal ti chichʼ tael ta stojolal Kristo Jesuse.
14 Chabio me lek li lekil kʼulejal akʼbil abain ta sventa li chʼul espiritu ti oy ta jtojolaltike.
15 Yuʼun anaʼoj liʼe, ti xchʼakoj sbaik lokʼel ta jtojolal skotol li krixchanoetik ta yosilal Asiae.* Jech spasoj ek li Fijelo xchiʼuk Ermojenese.
16 Oyuk xkʼuxul yoʼonton Kajvaltik ta stojolal li buchʼutik te oy ta sna Onesiforoe, yuʼun nopajtik noʼox laj yakʼbun siketel koʼonton xchiʼuk muʼyuk bu xkʼexav ta skoj ti chukulune.
17 Muʼyuk kʼexav, yuʼun laj yakʼ ta yoʼonton tsaʼun kʼalal ay ta Romae, vaʼun la staun.
18 Akʼo akʼbatuk yuʼun Kajvaltik ti akʼo sta kʼuxubinel ta stojolal Jeova* li vaʼ kʼakʼale. Yuʼun anaʼoj lek skotol li kʼusitik la spas ta Efesoe.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «echʼem pʼijuk koʼn»; «nichimuk noʼox koʼonton».
^ O: «amukʼtameʼ»; «ameʼmbel».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «splanoal».
^ Kʼelo glosario.
^ Kʼelo glosario.
