2 Timoteo 4:1-22
4 Tsots mantal chkalbot ta stojolal Dios xchiʼuk ta stojolal Kristo Jesus, ti jaʼ li buchʼu chchapan li buchʼutik kuxul xchiʼuk li buchʼutik chameme xchiʼuk ta skoj ti chakʼ sba ta ilel xchiʼuk ta skoj li Ajvalilal yuʼune:
2 cholo li skʼop Diose, akʼo me ta avoʼonton spasel ta anil kʼalal muʼyuk vokolile xchiʼuk kʼalal oy vokolile, tukʼibtasvanan, beiltasvanan, alo mantal, kʼalal jech chapase tsʼikuk me avuʼun xchiʼuk tojoban me lek ta chanubtasvanej.
3 Yuʼun chkʼot skʼakʼalil ti mu skʼan xchikintaik li lekil chanubtasele, yuʼun ta skoj li kʼusi tskʼan yoʼonton stukike kʼajomal noʼox chbat xchiʼinik li jchanubtasvanejetik ti lek chaʼi chchikintabeik li kʼusi lek chaʼi stukike.
4 Jech xtok, chchʼak sbaik lokʼel ta xchikintael li kʼusi melele xchiʼuk jaʼ chchikintaik li jecheʼ loʼiletike.
5 Pe li voʼote teuk me achʼulel ta skotol kʼusitik, kuchuk me avuʼun vokolil, abtejan batel li ta xcholel lekil aʼyeje, lek me tsʼakal xapas batel li avabtele.
6 Yuʼun ta melel yakal chkichʼ malel jech kʼuchaʼal matanal vino* xchiʼuk poʼot xa tajek sta yorail li jkolebale.
7 Jpasoj kʼop ta sventa li paskʼop ti lek tajeke, tsutsem* xa kuʼun li anilajele, tsots-o li xchʼunel koʼontone.
8 Liʼ ta ora xchiʼuk ta jelavele te xa kʼejbil li jkorona ti jaʼ sventa li buchʼutik tukʼike, ti jaʼ chakʼbun li Kajvaltik ti jaʼ li tukʼil jchapanvaneje, chakʼbun ta jmoton li vaʼ kʼakʼale; pe maʼuk noʼox voʼon, chakʼbe ek li buchʼutik oy onoʼox ta yoʼontonik ti chakʼ sba ta ilel li Kajvaltike.
9 Akʼo me persa ti xtal noʼox akʼelune.
10 Yuʼun laj yiktaun komel li Demas ta skoj ti jaʼ skʼanoj skotol li kʼusitik oy ta balumil* avie, bat ta Tesalonika; yan li Kresentee bat ta Galasia; li Titoe bat ta Dalmasia.
11 Jaʼ xa noʼox Lukas liʼ xchiʼinojune. Ikʼo talel li Markose, yuʼun jtunel kuʼun ta sventa li abtelale.
12 Yan li Tikikoe la jtak batel ta Efeso.
13 Mi latale ichʼo me talel li natil kʼuʼil laj kiktabe Karpo te ta Troase xchiʼuk ichʼo talel li balbalvunetike,* pe jaʼ mas tsots skʼoplal li tsʼibabil nukuletike.*
14 Ep tajek kʼusi chopol la spasbun li Alejandro ti chabtelan kovree. Jaʼ chtojbat yuʼun Jeova ta skoj li kʼusitik la spase.
15 Skʼan me xakʼel aba ta stojolal ek, yuʼun tsots tajek la skontrain li kʼusi laj kalkutike.
16 Muʼyuk buchʼu tal skoltaun kʼalal la jpak jkʼoplal ta sba veltae, yuʼun laj yiktaikun komel skotolik, jaʼ noʼoxe mu me xkom ta sbaik.
17 Pe te onoʼox oy ta jtsʼel li Kajvaltike xchiʼuk laj yakʼbun kipal, la stunesun sventa lek tsʼakal xichʼ cholel mantal xchiʼuk ti akʼo yaʼiik skotol li jyanlumetike; jech xtok laj kichʼ koltael lokʼel ta ye leon.
18 Jaʼ tskoltaun Kajvaltik ta skotol li kʼusitik toj chopole xchiʼuk jaʼ tspojun sventa chikʼun batel li ta Ajvalilal yuʼun ta vinajele. Jaʼuk noʼox stuk akʼo yichʼ ichʼel-o ta mukʼ sbatel osil. Jechuk.*
19 Chabanuk xavalbeik li Priska,* Akila xchiʼuk li buchʼutik te oy ta sna Onesiforoe.
20 Te kom ta Korinto li Erastoe, yan li Trofimoe ip kom kuʼun ta Mileto.
21 Akʼo me persa sventa xavul noʼox kʼalal skʼan to inviernoe.
Chabanukot la chal li Eubuloe, jaʼ jech chalik ek li Pudente, Lino, Klaudia xchiʼuk skotol li ermanoetike.
22 Teuk me oy Kajvaltik ta atojolal ta skoj ti baxbolote. Teuk me oy ta atojolalik li slekil yutsil yoʼontone.
Tsʼibetik ta yok vun
^ Kʼelo glosario.
^ O: «lajem».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Prisila sbi xtok.
