Apokalipsis 1:1-20
1 Jaʼ li kʼusi laj yakʼ ta naʼel Jesukristo ti akʼbat snaʼ yuʼun Dios sventa chakʼbe ta ilel smosotak li kʼusitik poʼot xa xkʼot ta pasele. La stak talel yaj-anjel* li Jesuse, vaʼun li anjele ta senyailtak laj yakʼbe ta ilel li smoso ti jaʼ li Juane,
2 ti jaʼ li buchʼu jamal laj yalbe skʼoplal li skʼop Diose xchiʼuk li kʼusi jamal laj yal li Jesukristoe, jech, skotol li kʼusitik laj yile.
3 Xmuyubaj* li buchʼu tsots chapta xchiʼuk li buchʼutik chaʼiik li albil kʼop* liʼe xchiʼuk ti chchʼunik li kʼusitik te tsʼibabile; yuʼun nopol xa li yorail albile.
4 Voʼon Juanun, sventa li vukub tsobobbail* ti oyik ta yosilal Asiae:*
Oyuk slekil yutsil oʼontonal* xchiʼuk jun oʼontonal ta atojolalik ti jaʼ chakʼ «li Buchʼu oy avie, ti oy onoʼox ta voʼnee xchiʼuk ti chtale» xchiʼuk li vukub chʼul espiritu* ti oyik ta yeloval chotlebal sventa ajvalilal yuʼune,
5 xchiʼuk jaʼ chakʼ ek li Jesukristo ti jaʼ «li Tukʼil Testigoe», ti jaʼ «li Buchʼu baʼyel* chaʼkuxie» xchiʼuk ti jaʼ «li Buchʼu Ajvalil yuʼunik li ajvaliletik ta balumile».
Ti jaʼ li buchʼu skʼanojutike xchiʼuk ti la spojutik lokʼel ta jmultik ta skoj xchʼichʼele
6 —xchiʼuk jaʼ laj yakʼ ti akʼo xijkʼot ta ajvalil xchiʼuk ta pale* ta sventa li Sdios xchiʼuk ti jaʼ Stote—, jech, jaʼ yuʼun li mukʼulal xchiʼuk li juʼelal sbatel osile. Jechuk.*
7 ¡Kʼelo avilik! Chtal ta tok, vaʼun chil skotolik xchiʼuk ch-ilvanik ek li buchʼutik jomvanik ta lansae; jaʼ yuʼun skotol li nitilulal* ta balumile tsmaj stiʼ yoʼontonik ta at-oʼonton ta skoj li Jesukristoe. Jech, jechuk.
8 «Alfaun xchiʼuk Omegaun»,* xi chal li Jeova* Diose, «jaʼ li Buchʼu oy avie, ti oy onoʼox ta voʼnee, ti chtale xchiʼuk ti skotol xuʼ yuʼune».
9 Voʼon Juanun, avermanoikun xchiʼuk koʼol chkil tsots jvokoltik, koʼol chij-och ta ajvalilal xchiʼuk koʼol chkuch kuʼuntik ta skoj ti yajtsʼaklomutik Kristoe,* te oyun ta lum joyol ta nab ta Patmos ta skoj ti laj kalbe skʼoplal li Diose xchiʼuk ti jamal laj kalbe skʼoplal li Jesuse.
10 Ta sventa chʼul espiritu likʼot ta skʼakʼalil Kajvaltik xchiʼuk laj kaʼi jun tsatsal yechʼomal eil ta jpat ti xkoʼolaj kʼuchaʼal okʼes
11 ti xi chale: «Tsʼibao ta balbalvun* li kʼusi chavile xchiʼuk takbo batel li vukub tsobobbaile, ta Efeso, Esmirna, Pergamo, Tiatira, Sardis, Filadelfia xchiʼuk ta Laodisea».
12 Lijoypʼij sventa ta jkʼel buchʼu ti yakal tskʼoponune, jaʼ yuʼun kʼalal lijoypʼije laj kil vukub xchotleb kantil ti pasbil ta oroe,
13 oy buchʼu te li ta oʼlol xchotleb kantiletik ti xkoʼolaj kʼuchaʼal Xnichʼon krixchanoe* xchiʼuk slapoj natil kʼuʼil pokʼil ti chkʼot kʼalal to ta yoke, jech xtok tstunes chukil pasbil ta oro ti chukul ta stiʼ yoʼontone.
14 Jech xtok, li sjol xchiʼuk li stsotsil sjole sak kʼuchaʼal sakil tsots, kʼuchaʼal taiv, xkoʼolaj kʼuchaʼal leb kʼokʼ li sbekʼ sate;
15 li yoktake xkoʼolaj kʼuchaʼal chʼulbil kovre kʼalal stsʼayayet ta ornoe; xkoʼolaj kʼuchaʼal epal voʼ yaʼel li yechʼomal yee.
16 Jech xtok oy vukpʼej kʼanal ta sbatsʼikʼob xchiʼuk chlokʼ talel jun natil espada ta ye ti tsʼubtsʼub sniʼe xchiʼuk ti chaʼjot yee. Ti kʼu yelan li sate xkoʼolaj kʼuchaʼal xkʼuxul sat Kʼakʼal ti xojobaj tajeke.
17 Liyal ta lum kʼalal laj kile xchiʼuk xkoʼolaj kʼuchaʼal chamem likʼot ta yok.
Vaʼun la skajanbun sbatsʼikʼob xchiʼuk xi laj yalbune: «Mu xaxiʼ, voʼon li Baʼyele, li Slajebe
18 xchiʼuk li Buchʼu kuxule; licham, pe ¡kʼelo avil!, kuxulun xa-o sbatel osil xchiʼuk kichʼojbe li syaveal lajelale xchiʼuk li syaveal Mukinale.*
19 Jaʼ yuʼun tsʼibao li kʼusitik laj avile xchiʼuk li kʼusitik yakal chkʼot ta pasel avie xchiʼuk li kʼusitik chkʼot ta pasel ta jelavel mi kʼot xaʼox ta pasel li kʼusitik liʼe.
20 Li kʼusi chʼul ti mukul skʼoplal* ta sventa li vukpʼej kʼanal laj avil ta jbatsʼikʼobe xchiʼuk li vukub xchotleb kantil ti pasbil ta oroe: li vukpʼej kʼanale jaʼ smelolal anjeletik li ta vukub tsobobbaile xchiʼuk li vukub xchotleb kantile jaʼ smelolal li vukub tsobobbaile.
Tsʼibetik ta yok vun
^ Kʼelo glosario.
^ O: «Pʼij yoʼn»; «Nichim yoʼonton».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «momnichʼonil»; «tsʼunbalil»; «tsʼakalulil».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «Ades». Kʼelo glosario.
^ Kʼelo glosario.
