Apokalipsis 10:1-11
10 Jech xtok laj kil chyal tal ta vinajel yan anjel ti lek tsotse, pixil tal ta tok xchiʼuk oy jun vaknakʼobal* ta sjol, xkoʼolaj kʼuchaʼal Kʼakʼal li sate xchiʼuk xkoʼolaj kʼuchaʼal natil leb kʼokʼ li yoktake,
2 jech xtok stsakoj bikʼit balbalvun ti jilchʼunbil xae. Vaʼun la stekʼan ta nab li sbatsʼi-oke, pe la stekʼan ta balumil li stsʼet-oke,
3 vaʼun tsots avan jech kʼuchaʼal ch-avan jkot leon. Kʼalal avane, avanik ek li vukub chauke.
4 Jaʼ yuʼun kʼalal kʼopojik li vukub chauke ta xaʼox jtsʼiba ta ora; pe laj kaʼi xi laj yal yechʼomal eil ta vinajele: «Pakʼo to li kʼusitik laj yalik li vukub chauke xchiʼuk mu to xatsʼiba».
5 Vaʼun li anjel ti laj kil ti te tekʼel yok ta nab xchiʼuk ti te tekʼel yok ta balumile la stoy muyel sbatsʼikʼob ta vinajel
6 xchiʼuk xi laj yakʼ ye ta stojolal li Buchʼu kuxul-o sbatel osile, ti jaʼ la spas li vinajele xchiʼuk li kʼusitik te oye, ti jaʼ la spas li balumile xchiʼuk li kʼusitik te oye xchiʼuk ti jaʼ la spas li nabe xchiʼuk li kʼusitik te oye: «Muʼyuk xa bu chjalij mas;
7 moʼoj, yuʼun mi kʼot yorail ti jutuk xa skʼan sventa sjupan yokʼes li svukvoʼal anjele, ta melel tstsʼaki xa me yorail un bi li kʼusi chʼul ti mukul skʼoplal ti laj yalbe skʼoplal Dios jech kʼuchaʼal lekil aʼyejetik* ta stojolal li smosotak ti jaʼ li yaj-alkʼoptake».
8 Vaʼun laj kaʼi xi chalbun yan velta li yechʼomal eil ta vinajele: «Batan, bat tsako talel li jilchʼunbil balbalvun ti te oy ta skʼob li anjel ti te tekʼel yok ta nab xchiʼuk ti te tekʼel yok ta balumile».
9 Jech oxal libat ti bu oy li anjele xchiʼuk laj kalbe ti akʼo yakʼbun li bikʼit balbalvune. Vaʼun xi laj yalbune: «Tsako xchiʼuk lajeso, chchʼaub yuʼun achʼut, pe chchiʼub tajek ta ave jech kʼuchaʼal pom».
10 Vaʼun la jtsak li bikʼit balbalvun ti te oy ta skʼob li anjele xchiʼuk la jlajes, chiʼ tajek jech kʼuchaʼal pom li ta kee, pe chʼaub yuʼun jchʼut kʼalal la jlajese.
11 Jaʼ yuʼun xi laj yalbeikune: «Alo me batel yan velta ta stojolal jteklumetik, ta lumetik, ta jeltos kʼopetik xchiʼuk ta stojolal epal ajvaliletik li albil kʼope».
