Apokalipsis 12:1-17
12 Laj yichʼ ilel ta vinajel jun mukʼta senyail: oy jun ants ti pixil ta Kʼakʼale, te oy ta yok li Ue, oy jun korona ta sjol ti oy lajchaʼpʼej skʼanalile,
2 xchiʼinoj yol. Xviket tajek ta skoj xkʼuxul xchiʼuk mu xnel svokol ta skoj ti chvokʼ* xa yole.
3 Laj yichʼ ilel yan senyail ta vinajel. ¡Kʼelo avilik! Oy jkot mukʼta dragon ti xkoʼolaj skoloral kʼuchaʼal kʼokʼe, vukpʼej sjol xchiʼuk lajuneb xulub, jech xtok oy vukub skorona li ta sjoltake;
4 jun kuarto xa noʼox muʼyuk la xjoch batel ta sne li kʼanaletik ta vinajele xchiʼuk la sjipan yalel ta balumil. Vaʼun te kotol kom ta yeloval ants li dragone, jaʼ li ants ti chvokʼ xa yole, yuʼun kʼalal mi vokʼ li yole tstibe.
5 Vaʼun li antse vokʼ jun skerem ti jaʼ li buchʼu tsbeiltas jyanlumetik kʼuchaʼal jchabichij ti yichʼoj xvaxton ti pasbil ta takʼine. Jech xtok ikʼbat batel ta anil yuʼun Dios li yole xchiʼuk ikʼbat batel li ta chotlebal sventa ajvalilal yuʼune.
6 Jatav batel ta takixokol balumil li ants ti bu chapanbil yavil yuʼun Diose xchiʼuk jaʼ te tsmakʼlinik 1,260 kʼakʼal.
7 Jaʼ yuʼun lik paskʼop ta vinajel: la spasik kʼop xchiʼuk dragon li Miguel xchiʼuk li yaj-anjeltake, la spasik kʼop ek li dragon xchiʼuk li yaj-anjeltake,
8 pe muʼyuk bu kuch yuʼunik, jech xtok muʼyuk xa bu laj yichʼ tabel yavilik ta vinajel.
9 Jaʼ yuʼun laj yichʼ jipel yalel ta olon li mukʼta dragone, li voʼneal chone,* ti Diablo xchiʼuk Satanas akʼbil sbie, ti jaʼ li buchʼu yakal tsloʼla skotol li jnaklejetik ta spʼejel balumile; jipat yalel ta balumil, koʼol jipatik yalel tal ta olon xchiʼuk li yaj-anjeltake.
10 Laj kaʼi tsatsal yechʼomal eil ta vinajel ti xi chale:
«¡Kʼot xa yorail avi li koltaele, vinaj xa li sjuʼele xchiʼuk och xa ta abtel li Ajvalilal yuʼun Jdiostike* xchiʼuk lik xa spas mantal li Skristoe, yuʼun laj xa yichʼ jipel yalel tal ta olon li buchʼu tstikʼbe smul kermanotaktike, ti jaʼ li buchʼu tstikʼbe smul ta kʼakʼal-akʼobal ta stojolal li Jdiostike!
11 La stsalik ta sventa li xchʼichʼel Chʼiom Chij xchiʼuk ta sventa li aʼyejetik laj yalik echʼele, oy ta yoʼonton chakʼ xkuxlejalik, akʼo mi te skʼelojbeik sat li lajelale.
12 Ta skoj taje ¡kuxetuk me avoʼontonik* vinajel xchiʼuk li buchʼutik te nakale! ¡Abol sba li balumil xchiʼuk li nabe! Yuʼun te yalem talel Diablo ti bu oyoxuke, oy tajek skʼakʼal yoʼonton ta skoj ti snaʼoj ti toj komkom xa li yoraile».
13 Vaʼun kʼalal laj yakʼ venta li dragon ti jipat yalel ta balumile lik skontrain li ants ti vokʼ jun skereme.
14 Pe li antse laj yichʼ akʼbel li chib xikʼ mukʼta aguila sventa xvil batel ta takixokol balumil ti bu yavile, jaʼ ti bu chichʼ makʼlinel jun yorail xchiʼuk chib yorail xchiʼuk oʼlol yoraile, nom oy ta sat li chone.
15 Vaʼun li chone lik slokʼes voʼ ta ye ti xkoʼolaj kʼuchaʼal ukʼum sventa xjikʼav yuʼun li antse.
16 Pe li balumile tal skolta li antse, vaʼun la sjam ye li balumile xchiʼuk laj yuchʼ ochel li ukʼum ti la xeta lokʼel li dragone.
17 Pe ilin tajek ta stojolal ants li dragone, jaʼ yuʼun bat stsak ta kʼop li skomenal snitilulal* antse, ti jaʼik li buchʼutik chchʼunbeik smantal Diose xchiʼuk ti yichʼoj yabtelik ta xcholbel skʼoplal li Jesuse.
Tsʼibetik ta yok vun
^ O: «ch-ayan».
^ O: «kiletel chone».
^ Kʼelo glosario.
^ O: «pʼijuk me avoʼnik»; «nichimuk me avoʼontonik».
^ O: «smomnichʼon»; «stsʼunbal»; «stsʼakalul».
