Apokalipsis 13:1-18
13 Vaʼun te kotol kom* li ta sjiʼal* nabe.
Vaʼun laj kil jkot jtiʼaval chonbolom ti yakal chlokʼ talel ta nabe, lajuneb xulub xchiʼuk vukpʼej sjol, lajuneb korona li ta xulubtake, pe li ta sjoltake oy biiletik ti chchopol kʼoptaik Diose.
2 Vaʼun li jtiʼaval chonbolom laj kile xkoʼolaj kʼuchaʼal jkot leopardo, pe xkoʼolaj kʼuchaʼal yok oso li yoke, xkoʼolaj kʼuchaʼal ye leon li yee. Vaʼun li dragone laj yakʼbe sjuʼel li jtiʼaval chonbolome, laj yakʼbe li chotlebal sventa ajvalilal yuʼune xchiʼuk mukʼta abtelal.
3 Jech xtok laj kil ti tsots yayijem jpʼej sjol yilel ti jutuk xa muʼyuk bu xchame, li syayijemal ti jutuk xa muʼyuk bu xcham-o xchiʼuke laj yichʼ poxtabel, vaʼun skotol krixchano labal sba laj yilik, jaʼ yuʼun la xchʼunbeik smantal li jtiʼaval chonbolome.
4 Jech xtok laj yichʼik ta mukʼ li dragon ta skoj ti laj yakʼbe yabtel li jtiʼaval chonbolome, xi laj yichʼik ta mukʼ li jtiʼaval chonbolome: «¿Mi oy van buchʼu xkoʼolaj xchiʼuk li jtiʼaval chonbolome xchiʼuk mi oy van buchʼu xuʼ stsakat ta kʼop?».
5 Jech xtok akʼbat ye sventa chal kʼusitik mukʼtik skʼoplal xchiʼuk ti chchopol kʼopoje xchiʼuk laj yichʼ yabtel sventa ch-abtej 42 u.
6 Vaʼun la sjam ye sventa chchopol kʼopta li Diose, sventa chchopol kʼoptabe li sbie xchiʼuk sventa chchopol kʼopta ti bu oye, jech xtok sventa chchopol kʼopta li buchʼutik te nakajtik ta vinajele.
7 Akʼbat ti akʼo spas kʼop xchiʼuk li buchʼutik chʼule xchiʼuk ti akʼo stsale, jech xtok akʼbat ti akʼo spas ta mantal skotol nitilulaletik,* jteklumetik, jeltos kʼopetik xchiʼuk lumetik.
8 Vaʼun ch-ichʼat ta mukʼ yuʼun skotol li buchʼutik nakajtik ta sba balumile. Yuʼun ti kʼuxi lik tal stsʼunbal li krixchanoetike mi junuk buchʼu tsʼibabil sbi li ta balbalvun sventa kuxlejal ti jaʼ yuʼun li Chʼiom Chij ti laj yichʼ milele.
9 Mi oy buchʼu oy xchikine akʼo yaʼi.
10 Mi oy buchʼu skʼoplal chichʼ chukele chbat ta chukel. Mi oy buchʼu chmilvan ta espadae skʼan xichʼ milel ta espada. Ta skoj taje skʼan xkuch yuʼunik xchiʼuk skʼan oyuk xchʼunel yoʼontonik li buchʼutik chʼule.
11 Jech xtok laj kil yan jtiʼaval chonbolom ti yakal chlokʼ talel ta balumile, oy chib xulub kʼuchaʼal chʼiom chij, pe lik kʼopojuk kʼuchaʼal jkot dragon.
12 Jaʼ jech tspas mantal kʼuchaʼal li baʼyel jtiʼaval chonbolom li ta yelovale. Jech xtok chakʼ ti akʼo yichʼik ta mukʼ li baʼyel jtiʼaval chonbolom li balumile xchiʼuk li buchʼutik te nakajtike, li jtiʼaval chonbolom taje jaʼ ti oy syayijemal ti jutuk xa muʼyuk bu xcham-oe, pe ti laj yichʼ poxtabele.
13 Tspas mukʼtik senyailtak, yuʼun tsyales tal kʼokʼ ta vinajel ta sat krixchanoetik ti te chkʼot ta balumil yuʼune.
14 Jech oxal tsloʼla li buchʼutik nakajtik ta sba balumil ta skoj ti akʼbat spas senyailtak ta yeloval li jtiʼaval chonbolome, jech xtok chalbe jnaklejetik ta balumil ti akʼo spasbeik slokʼol li jtiʼaval chonbolom ti laj yichʼ espadae, pe ti kuxi to yan veltae.
15 Jech xtok akʼbat ti akʼo yakʼbe yichʼ ikʼ li slokʼol jtiʼaval chonbolome, jaʼ yuʼun li slokʼol jtiʼaval chonbolome xuʼ xkʼopoj xchiʼuk tspas mantal ti akʼo yichʼik milel skotol li buchʼutik muʼyuk chichʼik ta mukʼ li slokʼol jtiʼaval chonbolome.
16 Jech xtok tsuj skotol krixchanoetik —ta bikʼit ta mukʼ, jkʼulejetik, meʼonetik, li buchʼutik kolemike xchiʼuk li mosoiletike— sventa xichʼ smarkail ta sbatsʼikʼobik o ta stibaik,
17 yuʼun mu xuʼ xmanolajik xchiʼuk mu xuʼ xchonolajik mi chʼabal smarkailike, jaʼ noʼox xuʼ xmanolajik xchiʼuk xuʼ xchonolajik li buchʼu oy smarkailike, ti jaʼ li sbi jtiʼaval chonbolome o li snumeroal sbie.
18 Skʼan jpʼijiltik ta sventa li kʼusi liʼe: li buchʼu oy spʼijile akʼo xchapbe li snumeroal jtiʼaval chonbolome, yuʼun jaʼ snumeroal krixchano; li snumeroale jaʼ 666.
Tsʼibetik ta yok vun
^ Jaʼ xkaltik, li dragone.
^ O: «syiʼal».
^ O: «momnichʼoniletik»; «tsʼunbalilaletik»; «tsʼakalulilaletik».
