Apokalipsis 14:1-20
14 Laj kil, vaʼun ¡kʼelo avilik!, te kotol ta Vits Sion* li Chʼiom Chij xchiʼuk li 144 mil ti tsʼibabil ta stibaik li sbie xchiʼuk li sbi Stote.
2 Jech xtok oy kʼusi laj kaʼi nik* ta vinajel ti xkoʼolaj kʼuchaʼal xchajajet epal voʼe xchiʼuk ti xkoʼolaj kʼuchaʼal chnik tsatsal chauke; li kʼusi laj kaʼie xkoʼolaj kʼuchaʼal jkʼejimoletik ti yakal stijel yarpaike.
3 Yakal tskʼejintaik jun achʼ kʼejoj yaʼel li ta yeloval chotlebal sventa ajvalilale, ta yeloval li chanib kuxlejaletike xchiʼuk ta yeloval li moletike; muʼyuk buchʼu chan yuʼun li kʼejoj taje, jaʼ noʼox chan yuʼun li 144 mil ti laj yichʼik manel lokʼel ta balumile.
4 Taje jaʼik li buchʼutik ti muʼyuk laj yikʼubtas sbaik ta stojolal antsetike, yuʼun muʼyuk buchʼu la xchiʼinik ta vayel. Jaʼik li buchʼutik tstsʼakliik batel li Chʼiom Chij ti mu ventauk bu xbate. Jaʼik li buchʼutik laj yichʼik manel lokʼel ta stojolal krixchanoetik ti jaʼik sba sat tsʼunobil* ta stojolal Dios xchiʼuk ta stojolal li Chʼiom Chije,
5 jech xtok mi jutuk bu tabat sjutbil kʼopik;* muʼyuk spaltailik.
6 Laj kil yan anjel ti te xvilet ta oʼlol vinajel ti yakal chchol lekil aʼyejetik ti te oy-o sbatel osile, chcholbe li buchʼutik te nakalik ta sba balumile, ta skotol lumetik, nitilulaletik,* jeltos kʼopetik xchiʼuk ta skotol jteklumetik,
7 xi tsots chale: «Xiʼtaik xchiʼuk albeik smukʼulal li Diose, yuʼun kʼot xa yorail ti chchapanvane, jaʼ yuʼun ichʼik ta mukʼ li Buchʼu la spas vinajel, balumil, nab xchiʼuk li nioʼetike».
8 Te tal xchaʼvoʼal anjel xtok ti xi laj yale: «¡Lom xa! ¡Lom xa li Mukʼta Babilonia ti jaʼ li buchʼu laj yakʼbe yuchʼ jyanlumetik li svinoe, li vino taje jaʼ ch-akʼbat ta yoʼontonik ti akʼo xmulivajik* xchiʼuke!».
9 Laje tal yoxvoʼal anjel xtok ti xi tsots laj yale: «Mi oy buchʼu chichʼ ta mukʼ li jtiʼaval chonbolom xchiʼuk li slokʼole xchiʼuk mi chichʼ smarkail ta stiba o ta skʼobe,
10 ta xuchʼbe ek li svinoal skʼakʼal yoʼonton Dios ti te oy ta skopail skʼakʼal yoʼonton ti muʼyuk bu kapbile, vaʼun chil svokol ta kʼokʼ xchiʼuk ta asufre ta sat chʼul anjeletik xchiʼuk ta sat li Chʼiom Chije.
11 Te xtomet-o sbatel osil li xchʼailal kʼokʼ ti jaʼ ch-akʼbat svokolike xchiʼuk muʼyuk bu chkuxik ta kʼakʼal-akʼobal li buchʼutik chichʼik ta mukʼ li jtiʼaval chonbolom xchiʼuk li slokʼole xchiʼuk li buchʼutik chichʼbeik li smarkail sbie.
12 Ta skoj li kʼusitik liʼe jaʼ ti bu skʼan xkuch-o yuʼunik li buchʼutik chʼule, li buchʼutik chchʼunbeik li smantal Diose xchiʼuk ti tukʼ-o xchʼunel yoʼontonik ta stojolal Jesuse».
13 Laj kaʼi yechʼomal eil ta vinajel ti xi chale: «Xi xatsʼibae: Xmuyubaj noʼox* li buchʼutik jmoj chchamik xchiʼuk Kajvaltik liʼ ta ora xchiʼuk ta jelavele. Jech, jech chal li chʼul espiritu ti akʼo la xkux li ta yabtelike, yuʼun te jmoj chbat xchiʼukik li kʼusitik la spasike».
14 Laj kil, vaʼun ¡kʼelo avilik!, oy jvol sakil tok xchiʼuk oy buchʼu te chotol li ta tok ti xkoʼolaj kʼuchaʼal Xnichʼon krixchanoe, slapoj skoronail sjol ti pasbil ta oroe xchiʼuk stsakoj jun jos* ti tsʼubtsʼub sniʼe.
15 Oy yan anjel xtok ti te lokʼ talel ti bu chʼul ta temploe, xi tsots laj yalbe li buchʼu te chotol ta toke: «Tikʼo ochel ajos, vaʼun tsobbo sat li kʼusitik chlokʼe, yuʼun kʼot xa yorail chichʼ tsobbel sat li kʼusitik chlokʼe, yuʼun lek xa yij li kʼusitik tsʼunbil ta balumile».
16 Vaʼun la stikʼ ochel sjos ta balumil li buchʼu te chotol ta toke, jech oxal laj yichʼ tsobbel sat li kʼusi tsʼunbil ta balumile.
17 Oy yan anjel xtok ti te lokʼ talel ti bu chʼul ta templo ti te ta vinajele; stsakoj jun jos ti tsʼubtsʼub sniʼ eke.
18 Oy yan anjel xtok ti te lokʼ talel ta skajleb matanal ti yichʼoj yabtel ta sventa kʼokʼe. Xi tsots laj yalbe li buchʼu stsakoj sjos ti tsʼubtsʼub sniʼe: «Tikʼo ochel ajos ti tsʼubtsʼub sniʼ sventa xatsob li jujuchoj tsʼusub ta balumile, yuʼun yij xa li tsʼusube».
19 Vaʼun la stikʼ ochel sjos ta balumil li anjele, la stsob li jujuchoj tsʼusub ta balumile, laje la sjip ochel ta smukʼta pitsʼobil skʼakʼal yoʼonton Dios li tsʼusube.
20 Vaʼun la xpechʼilanik ta tekʼel ta spat jteklum li spitsʼobil tsʼusube,* lokʼ talel epal chʼichʼ ti bu laj yichʼ pitsʼel li tsʼusube, kʼot kʼalal to kʼu staylej oy sfreno kaʼetik xchiʼuk te van oxib sien kilometrouk* bein batel li chʼichʼe.
Tsʼibetik ta yok vun
^ Kʼelo glosario.
^ O: «bakʼ».
^ Kʼelo glosario.
^ O: «snopbil kʼopik»; «yepal kʼopik».
^ O: «momnichʼoniletik»; «tsʼunbalilaletik»; «tsʼakalulilaletik».
^ Por·nei·a ta griego. Kʼelo glosario.
^ O: «Pʼij noʼox yoʼn»; «Nichim noʼox yoʼonton».
^ «Jun lukluk natil kuchilu ti jaʼ sventa xtuchʼobil li kʼusitik tsʼunbile o sventa chichʼ tsobbel-o sat.»
^ Kʼelo glosario.
^ S.gr.: «1,600 estadio».
