Apokalipsis 15:1-8
15 Laj kil yan senyail ta vinajel, mukʼ xchiʼuk toj labal sba: oy vukvoʼ anjel ti yichʼojik talel vuktos vokolile. Taje jaʼ xa li slajeb vokoliletike, yuʼun jaʼ xa te tstsuts* li skʼakʼal yoʼonton Diose.
2 Vaʼun oy kʼusi laj kil ti xkoʼolaj kʼuchaʼal nab ti nen* yilel ti kapbil ta kʼokʼe xchiʼuk laj kil li buchʼutik la stsalik li jtiʼaval chonbolome, ti la stsalbeik li slokʼole xchiʼuk li snumeroal sbie. Te vaʼajtik ta xokon nab ti xkoʼolaj kʼuchaʼal nene xchiʼuk stsakojbeik yarpatak Dios.
3 Jech xtok yakal tskʼejintabeik li skʼejoj Moises ti jaʼ smoso Diose xchiʼuk li skʼejoj Chʼiom Chije, xi chalike:
«Toj mukʼtik xchiʼuk toj labalik sba li avabteltake Jeova Dios, li Buchʼu skotol xuʼ yuʼune. Tukʼ xchiʼuk melel skotol li abee, Ajvalilot sbatel osil.
4 ¿Buchʼu xa noʼox muʼyuk chiʼtaot ta melel Jeova xchiʼuk ti mu stoybe skʼoplal abi ti voʼot noʼox lek tukʼ avoʼontone? Yuʼun chtal skotol li jyanlumetike xchiʼuk te akʼeloj chichʼikot ta mukʼ, yuʼun laj xa yichʼ akʼel ta ilel li atukʼil mantaltake».
5 Oy kʼusi laj kil kʼalal kʼot xaʼox ta pasel taje, lik jamuk ti bu chʼul li ta skarpanail kʼusi yaloj Diose, li karpana ti oy ta vinajele,
6 vaʼun te lokʼ talel li vukvoʼ anjel ti bu chʼul ti yichʼojik talel li vuktos vokolile, slapojik sakil lino kʼuʼil ti solel xojobaje xchiʼuk pechʼel chukil ta stiʼ yoʼontonik ti pasbil ta oroe.
7 Vaʼun oy jun li ta xchanibal kuxlejaletike laj yakʼbe vukub setsʼ li vukvoʼ anjeletike, li setsʼe pasbil ta oro ti noj ta skʼakʼal yoʼonton Diose, ti jaʼ li buchʼu kuxul-o sbatel osile.
8 Vaʼun noj ta chʼail ti bu chʼul ta skoj li smukʼulal Diose xchiʼuk ta skoj li sjuʼele, jech xtok muʼyuk buchʼu xuʼ x-och ti bu chʼule, jaʼ to xuʼ x-ochik mi tsuts xaʼox yuʼunik vukub vokolil li vukvoʼ anjele.
