Apokalipsis 16:1-21
-
Skʼakʼal yoʼonton Dios ti te oy ta vukub setsʼe (1-21)
16 Vaʼun laj kaʼi tsatsal yechʼomal eil ti te lik talel ti bu chʼule, xi laj yalbe li vukvoʼ anjeletike: «Batanik xchiʼuk malik yalel ta sba balumil li skʼakʼal yoʼonton Dios ti te oy ta vukub setsʼe».
2 Vaʼun bat li baʼyel anjele, la smal yalel ta sba balumil li sbel setsʼe. Jech oxal li buchʼutik yichʼojbeik smarkail li jtiʼaval chonbolome xchiʼuk ti laj yichʼbeik ta mukʼ li slokʼole laj yil svokolik ta kʼaʼal chopol chin ti toj kʼuxe.
3 Jech xtok li xchaʼvoʼal anjele la smal yalel ta nab li sbel setsʼe. Vaʼun kʼataj kʼuchaʼal xchʼichʼel anima li nabe, cham skotol li kʼusitik kuxajtike, jech, cham skotol li kʼusitik oy ta nabe.
4 Jech xtok li yoxvoʼal anjele la smal yalel ta ukʼumetik xchiʼuk ta nioʼetik li sbel setsʼe. Vaʼun kʼataj ta chʼichʼ.
5 Vaʼun laj kaʼi xi laj yal li anjel ti yichʼoj yabtel ta sventa li voʼe: «Voʼot li Buchʼu oy avie xchiʼuk ti oy onoʼox ta voʼnee, li Buchʼu tukʼe, tukʼot, yuʼun jaʼ jech chachapanvan kʼuchaʼal taje,
6 yuʼun li stukike la smalbeik xchʼichʼel li buchʼutik chʼule xchiʼuk li j-alkʼopetike, jech oxal laj avakʼbe yuchʼik chʼichʼ; yuʼun jech staik-o».
7 Laj kaʼi xi laj yal li skajleb matanale: «Jech, Jeova Dios, li Buchʼu skotol xuʼ yuʼune, melelik xchiʼuk tukʼik skotol ti jech chachapanvane».
8 Jech xtok li xchanvoʼal anjele la smal ta Kʼakʼal li sbel setsʼe; vaʼun li Kʼakʼale akʼbat yabtel ti akʼo xchikʼ ta kʼokʼ li krixchanoetike.
9 Vaʼun chikʼatik ta stsatsal xkʼixnal Kʼakʼal li krixchanoetike, pe la xchopol kʼoptabeik li sbi Diose, ti jaʼ oy yabtel ta sventa li vokoliletike, muʼyuk la sutes yoʼontonik xchiʼuk muʼyuk laj yichʼik ta mukʼ.
10 Jech xtok li svoʼobal anjele la smal ta chotlebal sventa ajvalilal yuʼun jtiʼaval chonbolom li sbel setsʼe. Vaʼun ikʼub li ajvalilal yuʼune xchiʼuk lik stiʼ yokʼik ta skoj ti solel toj kʼux chaʼiike,
11 pe lik xchopol kʼoptaik li Dios ta vinajel ta skoj ti solel toj kʼux chaʼiike xchiʼuk ta skoj li skʼaʼal chinike, pe muʼyuk la sutes yoʼontonik ta sventa li yabtelike.
12 Jech xtok li svakvoʼal anjele la smal ta mukʼta ukʼum Eufrates li sbel setsʼe, vaʼun ul li yaʼlele, taje jaʼ sventa xichʼ chapanbel sbeik li ajvaliletik ti chlikik talel ta slokʼeb Kʼakʼale.
13 Vaʼun laj kil oxpʼel ibal sba* kʼop akʼbil ta naʼel ti xkoʼolaj kʼuchaʼal ranaetik ti yakal chlokʼ talel ta ye li dragone, ta ye li jtiʼaval chonbolome xchiʼuk ta ye li jloʼlavanej j-alkʼope.
14 Ta melel jaʼ li kʼusi yakʼoj ta naʼel li pukujetike, tspasik senyailtak li kʼusi yakʼojik ta naʼele, jaʼ yuʼun chaʼiik skotol ajvaliletik ta spʼejel balumil sventa xichʼik tsobel li ta paskʼop ta smukʼta kʼakʼalil Dios ti jaʼ li Buchʼu skotol xuʼ yuʼune.
15 «¡Kʼelo avil! Chital kʼuchaʼal j-elekʼ. Xmuyubaj noʼox* li buchʼu jech-o julaveme* xchiʼuk ti xchabioj li skʼuʼtak tslap ta sbae, sventa mu tʼanaluk xkom xchiʼuk sventa mu x-ilbat xkʼexlal yuʼun li krixchanoetike.»
16 Vaʼun laj yichʼik tsobel ti bu Armajedon* sbi ta evreoe.
17 Jech xtok li svukvoʼal anjele la smal ta ikʼ li sbel setsʼe. Laj yichʼ aʼiel jun yechʼomal eil ti bu chʼul kʼalal jech kʼot ta pasel taje, li ta chotlebal sventa ajvalilale, xi laj yale: «¡Kʼot xa ta pasel!».
18 Jech xtok xvikʼlajet tajek saksevul, laj yichʼ aʼiel yechʼomal eiletik, lik chauk xchiʼuk tal tsatsal nikel ti muʼyuk bu jech kʼotem-o ta pasel ti kʼalal lik talel li jnaklejetik liʼ ta sba balumile, yuʼun toj echʼ xa noʼox tsots li nikele.
19 Jech oxal pas ta oxchʼak li mukʼta jteklume, jin yalel li jteklumetik ta jujun lume; jaʼ yuʼun li Diose la svules ta sjol li Mukʼta Babilonia sventa chakʼbe yuchʼ li stsatsal skʼakʼal yoʼonton ti te oy ta skopail svinoe.
20 Jech xtok jatav batel skotol lumetik ti joyajtik ta nabe xchiʼuk muʼyuk laj yichʼ tael li vitstike.
21 Vaʼun yal tal mukʼtik bot ta vinajel ta stojolal krixchanoetik, jun talento yalal jujupʼej, jech oxal la xchopol kʼoptaik Dios li krixchanoetik ta skoj li svokolik ta bote, yuʼun solel toj tsots tajek li vokolile.
Tsʼibetik ta yok vun
^ Kʼelo glosario.
^ O: «pʼij noʼox yoʼn»; «nichim noʼox yoʼonton».
^ O: «vikʼil sate».
^ Kʼelo glosario.
