Apokalipsis 18:1-24
18 Laj kil yal talel yan anjel ta vinajel kʼalal kʼot xaʼox ta pasel taje, tsots yabtel yichʼoj; vaʼun xojobaj yuʼun balumil ta skoj li smukʼulale.
2 Xi tsots laj yale: «¡Lom xa! ¡Lom xa li Mukʼta Babiloniae, kʼot xa ta sna pukujetik xchiʼuk kʼot xa ta snakʼobbail skotol veneno ikʼ xchiʼuk skotol ibal sba pʼajbil mutetik!
3 Yuʼun ta skoj li vino ti chakʼ tajek ta oʼontonal chmulivaje* jaʼ yakubemik-o skotol li lumetike, jech xtok mulivajik xchiʼuk li ajvaliletik ta balumile, li jpʼolmajeletik ta balumile pasik ta jkʼulej ta skoj ti toj echʼem kʼusitik oy yuʼun ta xkuxlejal ti muʼyuk xkʼexlale».
4 Laj kaʼi yan yechʼomal eil ta vinajel xtok ti xi chale: «Jteklumal, lokʼanik tal te, yuʼun jech mu teuk kapal akʼoplalik li ta smultake xchiʼuk jech mu xatabeik ta makiel ek li vokoliletik tsnuptane.
5 Yuʼun stsoboj xa sba li smule, kʼotem xa kʼalal to ta vinajel, jech oxal vul ta sjol Dios li kʼusitik muʼyuk tukʼ la spase.
6 Jaʼ jech xapasbeik ti kʼu yelan la spasbe li yantike, jech, chib to velta jech xapasbeik ti kʼusi spasoje; ta sventa ti kʼu yelan skapojbe sbel li kopae chib to me velta jech xakapbeik ek.
7 Yuʼun ti kʼu to yelan la stoybe sba skʼoplal stuke xchiʼuk ti kʼu yelan toj echʼem kʼusitik oy yuʼun ta xkuxlejal ti muʼyuk xkʼexlale, jaʼ to me jech yepal xavakʼbeik svokol xchiʼuk yatel yoʼonton.* Yuʼun xi chalilan ta yoʼontone: ‹Chotolun kʼuchaʼal meʼ ajvalil, maʼuk meʼon antsun, jech xtok muʼyuk bu chkil-o at-oʼonton›.
8 Jech oxal ta jun noʼox kʼakʼal chtal li svokoltake: lajelal, at-oʼonton xchiʼuk viʼnal, jech xtok chchikʼik ta kʼokʼ sjunul, yuʼun tsots li Jeova Dios ti jaʼ la xchapane.
9 »Li ajvaliletik ta balumil ti mulivajik xchiʼuk li antse, ti la xkuxlebinik xchiʼuk li kʼusitik oy yuʼun ta xkuxlejal ti muʼyuk xkʼexlale, chlik yokʼitaik xchiʼuk chlik smaj stiʼ yoʼontonik ta stojolal kʼalal chilbeik li xchʼailal skʼakʼale.
10 Nom te vaʼal chkomik ta skoj ti chiʼik-o ti chil svokole, xi chalike: ‹¡Abol aba, abol aba, voʼot ti mukʼta jteklumote, voʼot ti tsatsal jteklum Babiloniaote, yuʼun ta jun noʼox ora laj avichʼ chapanel!›.
11 »Jaʼ noʼox jech ek, yakal ch-okʼik ta stojolal xchiʼuk tsmajilan stiʼ yoʼontonik li jpʼolmajeletik ta balumile, yuʼun muʼyuk xa buchʼu xmanbat skotol li yikatsike,
12 li yikatsike jaʼ oro, plata, kʼupil sba tonetik, perla ton, lekil lino, kuxul morado pokʼ, xela pokʼ xchiʼuk kuxul tsajal pokʼ; jech xtok skotol li kʼusitik pasbil ta teʼ ti lek xmuete, skotol li kʼusitik pasbil ta marfile, li kʼupil sba teʼe, kovre, takʼin xchiʼuk marmol ton;
13 xchiʼuk kanela, muil poxil ta India, pom,* muil aseite, sakil pom,* vino, yaseiteal oliva, lekil arina, trigo, vakaxetik, chijetik, kaʼetik, karetaetik, mosoiletik xchiʼuk krixchanoetik.
14 Jech, laj xa yiktaot li kʼusitik chakʼupin toʼox ta akuxlejale, laj xa yiktaot skotol li lekil veʼliletike xchiʼuk li kʼusitik kʼupil sbae, taje jaʼ sventa chlaj-o skʼoplal.
15 »Li jpʼolmajeletik ti jaʼ toʼox chchonik li kʼusitik taje, ti te pasik ta jkʼulej ta stojolal li antse, nom xa chvaʼiik ta stojolal ta skoj ti chiʼik-o ti chil svokole, vaʼun ch-okʼik xchiʼuk chat yoʼontonik,
16 xi chalilanike: ‹¡Abol sba, abol sba... li mukʼta jteklume, ti slapoj lekil linoe, ti slapoj kuxul morado kʼuʼile xchiʼuk ti slapoj kuxul tsajal kʼuʼile, ti toj echʼ xa noʼox lek stsʼakubtasoj sba ta oro, ta alakʼ sba tonetik xchiʼuk ta perla tonetik,
17 yuʼun ta jun noʼox ora laj skotol li epal kʼulejale!›.
»Jaʼ yuʼun skotol li kapitan ta varkoetike, skotol li buchʼutik chanavik ta nabe, li j-abteletik ta varko xchiʼuk skotol li buchʼutik te chpʼolmajik ta nabe, te nom-o vaʼajtik
18 xchiʼuk avanik kʼalal te skʼelojbeik li xchʼailal skʼakʼale, xi laj yalike: ‹¿Kʼusi jteklumal xkoʼolaj-o li mukʼta jteklume?›.
19 La svij pukuk* ta sjolik xchiʼuk avanik, ch-okʼik xchiʼuk chat yoʼontonik, xi laj yalike: ‹¡Abol sba, abol sba... li mukʼta jteklume, ti jaʼ ta skʼulejal pasik-o ta jkʼulej skotol li buchʼutik oy svarkoik ta nabe, yuʼun ta jun noʼox ora lajem kom!›.
20 »¡Vinajel, kuxetuk noʼox avoʼonton* ta stojolal, jechuk kuxetuk avoʼontonik ek li buchʼutik chʼuloxuke, li voʼoxuk ti jtakboloxuke* xchiʼuk li voʼoxuk ti j-alkʼopoxuke, yuʼun chapanat xa yuʼun Dios ta aventaik!».
21 Jech xtok oy jun tsatsal anjel ti la spet jpʼej mukʼta ton* ti la sjip echʼel ta nabe, xi laj yale: «Jaʼ jech anil chichʼ jipel yalel ta olon li mukʼta jteklum Babiloniae, vaʼun mi jaʼuk xa bu chichʼ tael.
22 Muʼyuk xa chichʼ-o aʼiel ta atojolal li yechʼomal ye jkʼejimoletik kʼalal tstij yarpaike, li jtijsonetike, li jupanej amayetike xchiʼuk li jupanej okʼesetike. Jech xtok muʼyuk chichʼ tael ta atojolal junuk j-abtel ti kʼusiuk noʼox chabtelane xchiʼuk muʼyuk xa buchʼu chjuchʼ trigo sventa tspas ta arina.
23 Jech xtok muʼyuk xa bu chojobaj jsetʼuk slusal kantil ta atojolal xchiʼuk muʼyuk xa bu chichʼ aʼibel yechʼomal ye junuk jnupunel kerem xchiʼuk mi junuk jnupunel tseb ta atojolal. Jaʼik toʼox viniketik ti tsots yabtelik ta balumil li jpʼolmajeletik avuʼune, jech xtok te kʼejpʼuj ta be avuʼun skotol li krixchanoetik ta skoj ti chapasilan espiritismoe.*
24 Jech, te laj yichʼ tabel xchʼichʼel j-alkʼopetik li ta jteklum taje, jech xtok te laj yichʼ tabel xchʼichʼel li buchʼutik chʼule xchiʼuk skotol li buchʼutik laj yichʼik milel ta sba balumile».
Tsʼibetik ta yok vun
^ Por·nei·a ta griego. Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «polvo»; «tsʼubil lum»; «tan».
^ O: «pʼijuk noʼox avoʼn»; «nichimuk noʼox avoʼonton».
^ Kʼelo glosario.
^ Kʼelo glosario.
^ Kʼelo glosario.
