Apokalipsis 19:1-21
19 Oy kʼusi laj kaʼi kʼalal kʼot xaʼox ta pasel taje, xkoʼolaj kʼuchaʼal yechʼomal ye epal krixchanoetik ta vinajel. Xi chalike: «¡Kʼupil kʼoptaik li Jae!* Yuʼun jaʼ Jkoltavanej, oy ep sjuʼel xchiʼuk oy ep smukʼulal li Jdiostike,
2 melel skotol xchiʼuk tukʼ skotol kʼalal chchapanvane. Yuʼun laj xa xchapan li jchonbail ants* ti tsots sjuʼel ti jaʼ la sokes balumil ta skoj ti chmulivaje* xchiʼuk laj xa spakbe skʼoplal li xchʼichʼel smosotak ta stojolal li antse».
3 Ta ora noʼox xi laj yalik ta xchibal veltae: «¡Kʼupil kʼoptaik li Jae! Jech-o sbatel osil yakal chmuy batel xchʼailal li Babiloniae».
4 Vaʼun li 24 ta voʼ moletik xchiʼuk li chanib kuxlejaletike la skejan sbaik xchiʼuk laj yichʼik ta mukʼ Dios ti jaʼ te chotol ta chotlebal sventa ajvalilale, xi laj yalike: «¡Jechuk! ¡Kʼupil kʼoptaik li Jae!».
5 Jech xtok vinaj tal yechʼomal eil li ta chotlebal sventa ajvalilale, xi laj yale: «Kʼupil kʼoptaik Jdiostik, akotolik voʼoxuk ti smosooxuk ti axiʼtaojike, kʼupil kʼoptaik ta bikʼit ta mukʼ».
6 Jech xtok oy kʼusi chnik* laj kaʼi ti xkoʼolaj kʼuchaʼal yechʼomal ye epal krixchanoetike, ti xkoʼolaj kʼuchaʼal epal voʼ chnik yaʼele xchiʼuk ti xkoʼolaj kʼuchaʼal tsatsal chauk chnik yaʼele. Xi chalike: «¡Kʼupil kʼoptaik li Jae, yuʼun lik xa ajvalilajuk li Jdiostik Jeovae, li Buchʼu skotol xuʼ yuʼune!
7 Muyubajkutik,* kuxetuk tajek koʼontontik xchiʼuk kichʼtik ta mukʼ, yuʼun laj xa sta yorail chnupun li Chʼiom Chije xchiʼuk chapal xa li buchʼu chkʼot ta yajnile.
8 Jech, yuʼun li buchʼu chkʼot ta yajnile akʼbat xa slap lekil lino kʼuʼil ti solel xojobaj xchiʼuk ti sake, yuʼun li lekil linoe jaʼ smelolal li kʼusitik tukʼ tspasik li buchʼutik chʼule».
9 Vaʼun xi laj yalbun li anjele: «Xmuyubajik noʼox li buchʼutik takbilik ta ikʼel ta veʼel ta snupunel li Chʼiom Chije». Xi laj yalbun xtoke: «Liʼe jaʼ li kʼusitik melelik chal Diose».
10 Kʼalal jech laj yalbune likeji ta yok sventa chkichʼ ta mukʼ. Pe xi laj yalbune: «¡Kʼelo me aba! ¡Mu xapas jech! Yuʼun jaʼ noʼox jchiʼil jbatik ta mosoil xchiʼuk li avermanotak ti akʼbil yabtelik sventa chalbeik skʼoplal li Jesuse. ¡Jaʼ ichʼo ta mukʼ li Diose!, yuʼun li yalbel skʼoplal Jesuse jaʼ li kʼusi chakʼ ta naʼel li albil kʼope».
11 Laj kil jamal li vinajele, vaʼun, ¡kʼelo avilik!, oy te jkot sakil kaʼ. Tukʼ xchiʼuk Melel sbi li buchʼu te kajal batele, tukʼ* chchapanvan xchiʼuk tukʼ tspas kʼop.
12 Xkoʼolaj kʼuchaʼal leb kʼokʼ li sbekʼ sate xchiʼuk oy te ep koronaetik li ta sjole. Oy te tsʼibabil jtos biil ti chʼabal buchʼu xojtikine, jaʼ noʼox xojtikin li stuke,
13 jech xtok slapoj jlik kʼuʼil ti chichʼ lapel ta sba ti te vijbil chʼichʼe, xi sbiinoj xtoke: Li Skʼop Diose.
14 Jech xtok te tijilik batel ta sakil kaʼetik li soltaroetik ta vinajele, slapojik lekil lino ti sak xchiʼuk ti muʼyuk yikʼobale.
15 Te chlokʼ talel natil tsʼubtsʼub espada ta ye ti jaʼ tsyayijes-o li lumetike xchiʼuk tstunes xvaxton ti pasbil ta takʼin kʼalal chchabi li lumetik jech kʼuchaʼal jchabichije. Jech xtok chpechʼilanik ta tekʼel li spitsʼobil tsʼusub ti jaʼ sventa skʼakʼal yoʼonton Dios ti jaʼ li Buchʼu skotol xuʼ yuʼune.
16 Oy jtos biil li ta skʼuʼ tslap ta sbae, jech, li ta yoʼe, xi tsʼibabile: «Ajvalil yuʼunik li ajvaliletike xchiʼuk Kajvaltik yuʼunik li ajvaliletike».
17 Laj kil jun anjel xtok ti te vaʼal ta yeloval Kʼakʼal ti xi tsots laj yalbe skotol li mutetik ti te xviletik ta oʼlol vinajele: «Laʼik liʼe, tsobo abaik tal li ta mukʼta veʼel chakʼ Diose,
18 sventa xatibeik sbekʼtal ajvaliletik, komandanteetik yuʼun soltaroetik, tsatsal viniketik, sbekʼtal kaʼetik xchiʼuk li buchʼutik te kajajtik batele xchiʼuk kʼusiuk noʼox bekʼtalil, sbekʼtal buchʼutik kolemik, sbekʼtal mosoiletik xchiʼuk sbekʼtal ta bikʼit ta mukʼ».
19 Vaʼun laj kil li jtiʼaval chonbolom xchiʼuk li ajvaliletik ta balumil ti te tsobol xchiʼuk yajsoltarotakik sventa tspasik kʼop xchiʼuk li buchʼu te kajal batel ta kʼaʼe xchiʼuk li yajsoltarotake.
20 Vaʼun laj yichʼ tsakel li jtiʼaval chonbolom xchiʼuk li jloʼlavanej j-alkʼop ti la spas senyailtak ta yeloval li jtiʼaval chonbolom ti jaʼ la sloʼla-o li buchʼutik laj yichʼbeik smarkail li jtiʼaval chonbolome xchiʼuk li buchʼutik ichʼbat ta mukʼ li slokʼole. Kʼalal kuxulik toe koʼol laj yichʼik jipel ochel ta nab ti oy skʼakʼal* xchiʼuk ti chtil ta asufree.
21 Pe li yantike laj yichʼik milel li ta natil espada ti chlokʼ tal ta ye li buchʼu kajal batel ta kaʼe. Jech oxal noj tajek xchʼut li mutetik ta skoj sbekʼtal li buchʼutik lajik ta milele.
Tsʼibetik ta yok vun
^ O: «Aleluya». Li Jae jaʼ skomkom bi Jeova.
^ Kʼelo glosario.
^ Por·nei·a ta griego. Kʼelo glosario.
^ O: «chbakʼ».
^ O: «Pʼijuk koʼntik»; «Nichimuk koʼontontik».
^ Kʼelo glosario.
^ Kʼelo glosario.
